Ministrojo wuradźuja wo Ukrainje

póndźela, 13. apryla 2015 spisane wot:

Wonkowni ministrojo Němskeje, Francoskeje, Ruskeje a Ukrainy zetkaja so dźensa wječor w Berlinje, zo bychu wo dalšich kročelach k přewinjenju krizy na wuchodnej Ukrainje wuradźowali.

Berlin/Frankfurt n. W. (dpa/SN/K). Při jednanjach póńdźe wo zwoprawdźenje dojednanjow, docpětych w februaru na měrowych jednanjach w Minsku. W běłoruskej stolicy dorěčachu so Kijewske prozapadne knježerstwo a proruske mocy wo planje, předwidźacym mjez druhim přiměr a cofnjenje ćežkich bróni kaž tohorunja wuměnu jatych a amnestiju. Přiměr je přeco zaso łamany. Na Donjeckowskim lětanišću je wčera žurnalist zahinył, jako bu jeho awto wobtřělane. Kotra strona je třělała, njeje dotal zwěsćene.

Minister krajam podpěru přilubił

póndźela, 13. apryla 2015 spisane wot:
Berlin (dpa/SN). Zwjazkowy nutřkowny minister Thomas de Maizière (CDU) je w zwadźe wo kóšty zastaranja požadarjow azyla podpěru signalizował. „Bu­dźe­my wo tym rěčeć“ rjekny wón wčera wječor w sćelaku ZDF. Zdobom pak sej žadaše, zo měli tež zwjazkowe kraje swój dźěl přinošować. Zwjazk bě krajam při­lubił, jim za hospodowanje a zastaranje ćěkancow přidatnu miliardu eurow přewo­stajić. Kraje a komuny sej pak hladajo na raznje přiběracu ličbu ćěkancow mjez­tym wjace žadaja. Frakciski před­sy­da CDU Volker Kauder bě tute žadanja w sćelaku ARD wotpokazał. W tym zwisku wón kritizowaše, zo kraje přewostajene pjenjezy za druhe wěcy wužiwaja, na přikład za při­stajenje nowych wučerjow.

Bamž kritizowany

póndźela, 13. apryla 2015 spisane wot:
Istanbul (dpa/SN). Turkowski ministerski prezident Ahmet Davutoglu je wuprajenja bamža Franciskusa k „ludomordarstwu“ na Armenjanach raznje kritizował. Wone su „njezbožownje wuzwolene, wopačne a bjez zmysła“, dokelž złožuja so na wopačnu interpretaciju stawiznow, rjekny Davutoglu wčera w Istanbulu. „Zdobom wuprajenja bamža přiběracemu rasizmej w Europje polěkuja, wšako stajeja muslimow a Turkow pod kolektiwny podhlad winy.“ Bamž Franciskus bě masakrěrowanje Armenjanow w Osmaniskim mócnarstwje před sto lětami „prěnje ludomordarstwo 20. lětstotka“ mjenował. Turkowska skaza na to wulkopósłanca Vatikana do wonkowneho ministerstwa.

Stronamćěkaja čłonojo

póndźela, 13. apryla 2015 spisane wot:
Praha (ČŽ/K). Byrnjež čěske hospodarstwo pod koaliciskim knježerstwom Bohuslava Sobotki (ČSSD) rostło a wjetšich politiskich skandalow žanych njebyło, ćěkaja nimale wšěm w parlamenće zastupjenym stronam čłonojo. Najhórje dźe so něhdy knježacej ODS – ju wopušći w běhu jednoho lěta něhdźe 3 500 so­bustawow. Druhu najwjetšu stratu registruje KSČM, kotrejž je 1 353 sobustawow chribjet pokazało. KDU-ČSL z 1 184 wustupami nima so wo wjele lěpje. Čłonstwo TOP 09 bywšeho wonkowneho ministra­ Karla Schwarzenberga pomjeńši so wo 271 ludźi. Stabilny wosta Úsvit z dale dźewjeć čłonami. Jeničce „hibanje njespokojnych“ ANO financneho ministra-miliardara Andreja Babiša je jako politiska móc rozrostło. Jemu přistupi w běhu lěta dalšich 1 186 nowych čłonow. Politologa Pavel Šaradín měni, zo je „rozkćěw“ ANO był wočakować, dźiwajo na mócne wustupowanje Babiša. Čłonstwo jednotliwych stron: ČSSD 21 501, ANO 2 750, KDU-ČSL 27 357, KSČM 49 000, ODS 17 607, TOP 09 3 560 a Úsvit 9.

Zhromadnje za demokratiju a tolerancu płuwać

póndźela, 13. apryla 2015 spisane wot:

Płuwanje za demokratiju a tolerancu – tute zarjadowanje planuja dnja 28. junija w Kamjencu. Wot kónca tydźenja smědźa so zajimcy nětko za sportowy a politiski wjeršk přizjewić.

To a tamne (13.04.15)

póndźela, 13. apryla 2015 spisane wot:

Z kolijow wuskočiła je tramwajka w pólskim měsće Łódźi, z kotrejž bě statny prezident Bronisław Komorowski runje po puću na wólbnobojowe zarja­dowanje. „Někotři drje nětko tukaja, zo jedna so wo sabotažu“, žortowaše libe­ralnokonserwatiwny politikar w sćelaku TVP. Stražnicy pólskeho prezidenta na to k busej přewodźachu. Při njezbožu so nichtó njezrani.

Štyri lěta po tsunamiju je wrak japanskeho rybarskeho čołma pobrjóh USA docpěł. W nim nańdźechu sudobjo ze žiwymi makrelemi, kotrež běchu japanscy rybarjo do katastrofy popadnyli. Tsunami bě 11. měrca 2011 čołm sobu stor­hnył. Wot toho časa bě wona 8 000 kilometrow hač k pobrjohej stata Oregon po pu­ću. Ryby přepodadźa akwarijej.

Łužica (13.04.15)

póndźela, 13. apryla 2015 spisane wot:

Spěchuja sportowcow

Połčnica (SN/ch). Sakski statny sekretar dr. Michael Wilhelm je sportowemu towarstwu HSV 1923 Połčnica zdźělenku wo spěchowanju něhdźe 61 400 eurow přepodał. Ze srědkami ma so mjez dru­him­ twar připrawy za dalokoskok, wy­sokoskok a wysokoskok z tyčku w Stadionje Hempelowa hasa podpěrać. Pjenjezy maja so tež do přetwara płoniny z kumštneje maćizny zasadźić. Z planowanymi naprawami polěpša so za Połčničanskich sportowcow wuměnjenja trening­a a wubědźowanjow. Tež dźěći měšćanskich dźěćacych zarjadnišćow smědźa sportowu připrawu wužiwać.

Alarm zběhnjeny

Na zaměstnjenju požadarjow azyla w kwartěrach z wjace hač sto městnami so Budyska wobydlerska iniciatiwa Greenpark postorkuje. Wčera je wona přećiwo tomu protestowała.

Budyšin (CS/SN). Nimale sto ludźi zetka so nawječor před Budyskim krajnoradnym zarjadom na Dwórnišćowej. Protestowachu tam přećiwo tomu, zo so w domje za požadarjow azyla Greenpark 260 abo samo hišće wjace potrěbnych zaměstni. Na hesłowym transparenće woni zwuraznichu, zo njejsu přećiwo azylowemu domej, ličba tam zaměstnjenych pak měła so na maksimalnje sto wobmjezować. W narěči předsyda wobydlerskeje iniciatiwy Christian Haase wozjewi, zo namołwja w aprylu kóždy štwórtk k demonstraciji. To chcedźa tak dołho prak­tikować, doniž njebudźe krajny rada Michael Harig (CDU) skónčnje zwólniwy, so z wobydlerjemi rozmołwjeć.

Jarosław Kaczyński, nawoda pólskeje opziciskeje strony Prawo a sprawnosć a dwójnik něhdyšeho statneho prezidenta Lecha Kaczyńskeho, je dźensa składnostnje 5. róčnicy lětadłoweje katastrofy pola Smolenska před prezidentskim palastom we Warša­wje kwěćel połožił. 10. apryla 2010 bě Lech Kaczyński z man­dźel­skej Mariju­ a ze 94 dalšimi wosobami smjertnje znjezbožił. Foto: dpa/Jakub Kamiński

Wjacori mortwipři nadpadźe talibanow

pjatk, 10. apryla 2015 spisane wot:
Kabul (dpa/SN). Při sebjemordarskim nad­padźe talibanow na konwoj NATO we wuchodoafghaniskej prowincnej stolicy Dshalalabadźe su wjacore wosoby zahinyli. Atentatnik storhny znajmjeńša štyrjoch ciwilistow sobu do smjerće, 13 ludźi so zrani. Wo móžnych wukrajnych woporach žane informacije njepředležachu. Talibanojo su atentat mjeztym při­znali. Hakle srjedu běchu woni ameri­ske­ho wojaka morili. Wčera nadpadnychu talibanojo w uniformach afghaniskeje armeje sudnistwo w sewjeroafghaniskim Masar-i-Sharifje. Tam je poslednje ze­pěranišćo Zwjazkoweje wobory. Pólne lěhwo­ němskich wojakow leži zwonka města.­

nawěšk

nowostki LND