Drježdźany (dpa/SN). Krajny zwjazk sakskich ratarjow je zawrjenje tydźenskich wikow pod hołym njebjom raznje kritizował. „Naprawa je katastrofa. Njeje zrozumliwe, čehodla Sakska jako jenički zwjazkowy kraj tajke něšto wukaza“, rjekny hłowny jednaćel Manfred Uhlemann powěsćerni dpa. „Na jednym boku su čerstwe ratarske wudźěłki direktnje z regiona, na tamnym boku njeje strach, so pod hołym njebjom z wirusom natyknyć, wjetši hač w kupnicy.“

Tež na tydźenskich wikach móža prawidła desinfekcije dodźeržeć a wotstawki mjez kupcami samo hišće wjetše być a přihódnišo rjadować. Nimo toho su tajke wiki runje we wjesnych kónčinach mnohim ludźom njeparujomny poskitk, sej žiwidła wobstarać. Zwjazk ratarjow ministerku za strowotnistwo Petru Köpping (SPD) prosy, zakaz zaso zběhnyć.

Berlin (dpa/SN). Zwjazkowa kanclerka Angela Merkel (CDU) ma debatu wo tym, hač njemóhli wšelake naprawy přećiwo rozpřestrěću koronawirusa zaso zbě­hnyć, za přechwatanu. Wona chcyła „jara jasnje rjec, zo njeje hišće načasu wo wolóženjach nastupajo naprawy rěčeć“, kaž wčera w Berlinje wuzběhny. Ličba nowoinfekcijow je dale wulka. Zaměr naprawow je, strowotniski system nje­přežadać. Kanclerka dyrbi tuž „ludźi w Němskej wo sćerpnosć prosyć“. Zdobom wona připowědźi, „wo wolóženju naprawow hakle rozmyslować, ručež su pozitiwne efekty widźeć. Bohužel smy wot toho hišće cyły kónc zdaleni.“

W Němskej je so mjeztym nimale 44 000 ludźi z wirusom natyknyło, 6 600 wjace hač dźeń do toho. Je to najwjetši rozrost w dotalnej krizy scyła. Po wšej republice je 267 pacientow zemrěło. Zwjazk a kraje su dotal njesłyšane naprawy wukazali, zo bychu rozšěrjenju wirusa zadźěwali. Hłownje maja so socialne kontakty wobmjezować. Mjeztym pak je hižo rěč wo tym, naprawy zaso zběhnyć.

W Pólskej wirusa dla razne naprawy wukazane – premier optimistiski

Waršawa. Naprawy pólskeho knježerstwa přećiwo koronawirusej so na towaršnostne žiwjenje a na wšědny dźeń wobydlerjow sylnje wuskutkuje. Wot srjedy maja Polacy přikazane w swojich bydlenjach a domach wostać. Wuwzaće je puć na dźěło a domoj, do wobchoda abo apoteki. Za pomocnikow w boju přećiwo pandemiji płaća wosebite rjadowanja. Wjace hač dwě wosobje njesmětej so wotnětka w zjawnosći zetkać. W busach a tramwajkach ma kóžde druhe městno njewobsadźene wostać. Mjeza kraja wostanje zawrjena. Polacy, kotřiž so do swojeje domizny nawróćeja, dyrbja tam najprjedy raz dwaj tydźenjej do karanteny. Bože mšě smědźa drje so dale wotměwać, wjace hač pjeć wosobow pak njesmě so na nich wobdźěleć. Pohrjeby a wěrowanja su jenož hišće we wuskim kruhu swójbnych. Naprawy płaća najprjedy raz hač do ćicheje soboty, 11. apryla.

Wo hnydom dwaj nowej poskitkaj za dźěći a swójby je serbski digitalny swět wot wčerawšeho rozrostł. Swójbne kubłanje RCW a serbska dźiwadłowa pedagogika NSLDź chcetej z internetnej stronu „dźiwaj so“ dźěćom a staršim doma w ćežkim času koronawirusa runje tak pomhać kaž redaktor Płomjenja Pětr Šołta z online-seriju „Krimije přećiwo wustudźe“. Serbski pedagogiski poradnik za staršich, lute pokiwy za swójbnu zabawu, nastorki za dźěći, kak móža same dźiwadłowe předstajenja zwoprawdźić, hódančko w formje jednoreje słuchohry – kreatiwne hłójčki nje­trjebaš tu žane pytać, dyrbiš je jenož dźěłać dać. „Hdźež pak je strach (kriza), tam tež to wumóžace rosće“, rjekny hižo Friedrich Hölderlin, na kotrehož 250. narodniny smy dźens tydźenja spominali. Nowe ideje wězo njetrjebaja hnydom wumóžace abo přemóžace być. Fantazija dosaha. Móžemy wćipni być, što wšo hišće z toho wurosće. Cordula Ratajczakowa