Berlin (dpa/SN). Zwjazkowy minister za strowotnistwo­ Jens Spahn (CDU) nima za trěbne, mjezy Němskeje rozšěrjenja corona-wirusa dla zawrěć. Tež wotprajenje wulkozarjadowanjow abo zawrjenje předewzaćow njeje zasadnje radźomne, rjekny Spahn w Berlinje. Tajke naprawy njejsu wotpowědne a přiměrjene. Zawrjene mjezy bychu so masiwnje wuskutkowali, tež přetorhnjene direktne lěty mjez Chinu a Němskej. Tajka kročel móhła k tomu wjesć, zo dyrbjeli hač do 30 000 Němcow z Chiny z lětadłom domoj přiwjezć.

Pola předewzaćow a zarjadowanjow měli kóždy jednotliwy pad pruwować. Je rozdźěl, hač je zawod jenož regionalnje aktiwny abo hač přińdu do mjezynarodneho koncerna wšědnje sobudźěłaćerjo z wukraja. Zamołwići wulkozarjadowanjow dyrbjeli pruwować: Štó su wobdźělnicy a přińdu woni snano z rizikowych kónčin? Město toho zo zarjadowanja wotpraja, móhli wopytowarjam wšelake naprawy napołožić, Jens Spahn argumentowaše. Jeničce zamołwići strowotniskeho zarjada na městnje měli na kóncu rozsudźić.

Z punkpop-band Little Big chce Ruska na lětušim Eurovision song contesće w nižozemskim Rotterdamje dypki zběrać. Skupina je w Ruskej jara znata. Minjene lěta je sej kraj stajnje zaso dobre městna wubědźił: Sergej Lazarow bě loni třeći. Wjele kedźbnosće zbudźił bě před lětami pisany cyłk wowkow Buranowskije babuški, kotrež docpěchu samo druhe městno. Zarjadowanje wotměje so w meji. Za Němsku nastupi 22lětny Ben Dolic.

Sylny wichor a temperatury pod nulu su domy při Erie-jězoru w USA njedaloko kanadiskeje mjezy na skurilne objekty změnili: Wone su z hač do 90 centimetrow tołstej worštu lodu pokryte. Ludźo starosća so mjeztym wo swoje twarjenja, na přikład, hač třěchi ćežki lód wudźerža. Fotografojo­ porno tomu so wjesela: Woni maja motiwy, kajkež tak hižo wjele lět widźeć njeběchu.

Leinefelde (B/SN). Mjeztym jědnaty króć su Eichsfeldske nory w Leinefeldskej cyrkwi swj. Bonifacija póstnisku Božu mšu swjećili. Farar Markus Könen witaše hosći z wosom karnewalskich wotrjadow, kiž běchu w swojich kostimach přišli. Nora­ móže tež raz přez postronki bić a činić, štož so jemu lubi, a njetrjeba so měć po etikeće, měnješe farar Könen. Klětu chcył wón ekumeniske póstniske kemše swjećić.

Ordiněruja dalšich rabinerow

Podstupim (B/SN). Na Abrahama Geigerowym kolegu rabinerow w Podstupimje změja bórze šěsć absolwentow. W juniju chcedźa jich w jednej z Berlinskich sy­nagogow ordiněrować. Jedyn z rabinerow stanje so ze židowskim kantorom a budźe oficialnje do zastojnstwa za­poka­zany. Nowi rabinerojo pochadźeja z Israela, Madźarskeje, Norwegskeje, USA a Čěskeje.

Swoju identitu zhubili

Washington (dpa/SN). Krótko do jutřišeje wólbneje „super-wutory“ je moderatny kandidat demokratow za zastojnstwo prezidenta USA Pete Buttigieg swoju kandidaturu cofnył. Wón k nowemberskim wólbam hižo njenastupi, rjekny 38lětny wčera w měsće South Bend w zwjazkowym staće Indiana. Sobotu bě Buttigieg při wólbach demokratow w staće South Carolina­ jenož hišće 8,3 procenty dóstał. Jutře wola w dwanaće statach.

Zaso wólby w Israelu

Jerusalem (dpa/SN). W Israelu wola dźensa nowy parlament – hižo třeći króć w běhu dwanaće měsacow. Přiwšěm njeje jasne, zo budźe wólbny wuslědk tónkróć jasny nastupajo nowe knježerstwo. Po tuchwilnych naprašowanjach ma ministerski prezident Benjamin Netanjahu runje telko wolerjow kaž jeho opoziciski wužadar, bywši general Benny Gantz. Minjene­ dwoje wólby su so njerozsudnje skónčili. Ani Netanjahu ani Gantz njemóžeštaj knježerstwo wutworić.

Kandidaća so zetkaja