Jerusalem (dpa/SN). Statni a knježerstwowi šefojo z nimale połsta krajow wopominaja dźensa w Israelu wuswobodźenje zaničowanskeho lěhwa Auschwitz před 75 lětami. Po informacijach israelskeho wonkowneho ministerstwa jedna so při tym wo najwjetši statny podawk po załoženju Israela 1948. Jako prěni zwjazkowy prezident Němskeje chcyše Frank-Walter Steinmeier we wopomnišću holocausta Yad Vashem porěčeć. Pón­dźelu budźe­ tomu 75 lět, zo su sowjetske jednotki­ zaničowanske lěhwo Auschwitz w Pólskej wuswobodźili, kotraž bě wot Němskeje wobsadźena. Nacionalsocialisća běchu tam wjace hač milion ludźi morili, zwjetša Židow ze wšeje Europy.

Mjez hosćimi su mjez druhim prezidentaj Francoskeje a Ruskeje, Emmanuel Macron a Wladimir Putin, kaž tež wiceprezident USA Mike Pence a britiski naslědnik tróna princ Charles.

Pólski statny prezident Andrzej Duda je wobdźělenje wotprajił, dokelž njeběchu jemu dowolili w Yad Vashemje jako zastupjer potrjecheneho ludu rěčeć.

Sakska Lěwica žada sej program za lěpše zastaranje ludźi na wsach

Drježdźany (SN). Frakcija Lěwicy w Sakskim krajnym sejmje žada sej krajny program „Wjesne wobchody w Sakskej“. Dyrbjeli swójske iniciatiwy wobydlerjow přichodnje dołhodobnje podpěrać, zo by so zastaranje ludźi na wsach polěpšiło. Krajne knježerstwo měło lěpje wo wobstejacych spěchowanskich móžnosćach informować a nimo toho „Směrnicy za wjesne wobchody“ nastupajo jich wutworjenje, zarjadowanje a wobhospodarjenje zdźěłać. Wosebite „Stabowe městnobliskeho zastaranja na wsach“ měł zajimcow podpěrować, na přikład při zestajenju próstwow wo spěchowanske srědki z Europskeho ratarskeho fondsa za wuwiće wjesnych kónčin (ELER) respektiwnje Zhromadneho nadawka k polěpšenju ratarskeje struktury a škita pobrjohow (GAK). Nimo toho měli swobodny stat a komuny załožerjam tajkich mjeńšich wobchodow při pytanju za kmanej městnosću hodźace so objekty přewostajić.

Starši Radworčenjo so hišće dopominaja: Něhdy mějachu we wsy dwě rěznistwje, pjekarnju, wobchod žiwidłow a industrijnych tworow, póst, lutowarnju a někotre korčmy. Dźensa z toho tak derje kaž ničo wjace njewobsteji. W bywšim rěznistwje na nawsy předawa Wulkodubrawski pjekar swoje pječwo, a při sportnišću dóstawaš něšto k jědźi a piću. Za wšo druhe trjebaš awto abo bus. Iniciatiwa sakskeje Lěwicy na dobro wjesnych wobchodow je dobra. Přiwšěm njewěrju, zo so krajny sejm z tym chutnje zaběra, prosće toho­dla, dokelž přińdźe namjet wot Lěwicy. To znajmjeńša wuča nazhonjenja minjenych lět. Snano pak knježerstwo tež raz do druhich zwjazkowych krajow hlada, hdźež su so angažowani wobydlerjo sami starali a wjesny wobchod załožili. Tam drje je wšitko cent dróše hač w kupnicach, ale wjesna zhromadnosć zaso wožiwja a ludźo so derje čuja. Tajke něšto měło so podpěrać. Marko Wjeńka

Lěni listonoš je w Japanskej listy doma składował, město toho zo by je roznošował. To bě jemu „přewulka dračina“, kaž 61lětny policistam wuzna. Zastojnicy běchu na wšě 24 000 posyłkow w domje listonoša­ njedaloko Tokija namakali. Prawdźepodobnje bě muž hižo wjele lět tak dźěłał. Hakle při internej kontroli so to nětko wukopa. Zamołwići pósta posyłki přiwšěm hišće roznošuja a so pola škodowanych zamołwjeja.

Z wosebitym infomobilom chcedźa w zwjazkowej stolicy wopytowarjow sławneje East-Side-Gallery, dźěla bywšeje Berlinskeje murje, wo stawiznach objekta informować. Dotal poskićachu jenož wodźenja. Nětko móža so něhdźe štyri miliony wopytowarjow, kotřiž kóžde lěto podłu murje chodźa, lěpje wobhonić. Załožba Berlinskeje murje, kotraž je wot lěta 2018 za East-Side-Gallery a za kubłanske dźěło wokoło historiskeje městnosće zamołwita, infomobil wobhospodarja.