To a tamne (28.11.19)
Štyri kamele wosrjedź města su w sewjerorynsko-westfalskim Remscheidźe zasadźenje policije zawinili. Wone přechodźowachu so wčera rano cyle měrnje po měsće a posłužowachu so w zahrodkach. Jich wobsedźer wšak bě spěšnje zwěsćeny: hóstny cirkus. Sobudźěłaćerjo kamele bjez problemow wróćo wjedźechu.
Zelene sportowe črije, kotrež bě bywši lochkoatlet a superstar Usain Bolt při swojich swětowych rekordach wužiwał, je wón nětko Němskemu črijowemu muzejej w porynsko-pfalcskim Hauensteinje darił. „Powostanki tartanoweje čary a wobškodźenja póduše dopokazuja, zo je Bolt w črijach woprawdźe běhał“, zdźěli direktor muzeja. Klětu nalěto planuje dom wosebitu prezentaciju črijow prominentnych, tak tež Angele Merkel, Borisa Beckera, Thomasa Gottschalka a wjacekrótneho olympiskeho dobyćerja Bolta.
Přilubja widźomnu změnu
Strasbourg (dpa/SN). Nowa prezidentka komisije EU Ursula von der Leyen je wobšěrnu a za wšitkich widźomnu změnu w Europje přilubiła. „Činimy to, dokelž mamy to za prawe“, rjekny křesćanska demokratka dźensa do rozsudneho wothłosowanja wo komisiji w Europskim parlamenće. Ursula von der Leyen zasadźa so za to, rólu Europy w swěće sylnić. Dyrbjał-li parlament w běhu dnja komisiju wuzwolić, móhła von der Leyen ze 26 komisarami 1. decembra dźěło zahajić.
Trump na słyšenje přeprošeny
Washington (dpa/SN). Justicny wuběrk Domu reprezentantow USA je prezidenta Donalda Trumpa w zwisku z přepytowanjemi k jeho wotsadźenju na słyšenje přeprosył. Předsyda wuběrka Jerry Nadler bě so jeho pisomnje prašał, hač nochcył so ze swojimi prawiznikami přichodny tydźeń srjedu na posedźenju wobdźělić, zo móhł so sam swědkow prašeć. Wšitcy wšak z tym liča, zo njebudźe Trump, kiž mjenuje přepytowanja „honjeńcu“, přeprošenje sćěhować.
46 přežiwjenych wuchowali
Z knježerstwom wotličili
Bamž pjenježny skandal přiznał
Braniborska jenož w srjedźnym polu
Berlin/Podstupim (dpa/SN). Nastupajo wutwar wobnowjomnych energijow dóstawa Braniborska w cyłoněmskim přirunanju jeno spokojace znamki. Po tym zo bě sej kraj w prěnim přirunowanju krajow lěta 2008 hišće prěnje městno wudobył a to po tym dwójce wobkrućił, je so nětko na šeste městno w srjedźnym polu wotsunył. To wuchadźa z dźensa předpołoženeje přirunanskeje studije zwjazkowych krajow 2019.
Braniborska bě sej minjene lěta při wutwarje wobnowjomnych energijow wulke zasłužby zdobyła, kaž w rozprawje rěka. Napinanja na tym polu pak su widźomnje popušćili. Přichodnje dyrbjał so kraj zaso bóle za to zasadźeć. W koaliciskim zrěčenju noweho braniborskeho knježerstwa je wutwar wobnowjomnych energijow zakótwjeny. Tak chcedźa wjace solarnych připrawow twarić a akceptancu wětrnikow mjez ludźimi polěpšić.
To a tamne (27.11.19)
Z awtom hač ke kasy: W Awstriskej je 42lětna ze swojim awtom do předawarnje meblow zrazyła. Wóz jědźeše wjacore metry po wobchodźe a wosta hakle před kasu stejo. Sobudźěłaćerce wobchoda w zwjazkowym kraju Delnja Awstriska so zesuwanych meblow dla zraništej. Šoferka chcyše swoje awto poprawom na parkowanišću před wobchodom wotstajić. Čehodla je přez wukładne wokno do wobchoda jěła, dotal jasne njeje. Alkoholowy test bě negatiwny.
Rěznikej ćeknyła je kruwa w mecklenburgsko-předpomorskim Vipperowje nad jězorom Müritz. Jako chcyše ju ratar na připowěšak ćěrić, wona twochny a ćekny k jězorej. Něšto pozdźišo ju pěšcy wuhladachu: Kruwa tčeše hač k šiji w błóće. Wohnjowi wobornicy ju z powjazami a traktorom wućahnychu. K rězu pak najprjedy raz njetrjebaše.
W Albanskej zemja ržała
Tirana (dpa/SN). Najćeše zemjerženje minjenych lětdźesatkow je dźensa rano zapadne kónčiny Albanskeje střasło. Po informacijach geologow měješe wone sylnosć 6,4. Epicentrum ležeše něhdźe 30 kilometrow zapadnje stolicy Tirany. Po dotalnych informacijach je znajmjeńša šěsć ludźi žiwjenje přisadźiło. Wideja pokazuja sypnjene twarjenja, kotrež su ludźo panisce wopušćili. Při něšto słabšim zemjerženju w septembru bě so wjace hač sto ludźi zraniło.
Prawa dźěći zakótwić
Berlin (dpa/SN). Zwjazkowa justicna ministerka Christine Lambrecht (SPD) předpołoži dźensa w Berlinje dołho wočakowany naćisk zakonja, z kotrymž maja so prawa dźěći we wustawje zakótwić. Unija a SPD běštej so w koaliciskim zrěčenju na to dojednałoj. Dźěłowa skupina Zwjazka a krajow bě přez měsacy wo naćisku wuradźowała. Wšako žada sej změna wustawy wjetšinu dweju třećinow zwjazkoweho sejma a Zwjazkoweje rady.
Třinaće wojakow zemrěło
Rozměr škody w muzejudale njejasny
Drježdźany (dpa/SN). Policija pyta dale za skućićelemi, kotřiž su wčera rano zahe na dosć chrobłe wašnje z historiskeho Zeleneho wjelba w Drježdźanach drohotne debjenki pokradnyli. Znaty njeje přeco hišće rozměr straty, z kotrejž je sławna barokna zběrka drohoćinkow mjezynarodnu kedźbnosć zbudźiła. Ani direktor muzeja Dirk Syndram njemóže wobjim škody dotal jasnje pomjenować. Nastatu škodu wobšěrnje bilancować je hakle móžno, hdyž je přepytowanje wšitkich slědow wotzamknjene. „Ručež su fachowcy hotowi, móžemy zwěsćić, što we witrinje pobrachuje“, praji direktor Syndram. Njeskutk sam mjenuje wón „super-Gau“.
Specialisća kriminalneje policije su dźensa rano ze swojim dźěłom pokročowali. Za genetiskimi slědami skućićelow pytać njeje jednore, wšako je w Zelenym wjelbje stajnje wjele wopytowarjow.
Wuradźuja wo klětušim etaće
Berlin (dpa/SN). Němski zwjazkowy sejm započa dźensa wo zwjazkowym etaće 2020 wuradźować. Hač do pjatka maja zapósłancy rozsudźić, kak srědki 362 miliardow eurow rozdźělić, štož je 5,6 miliardow wjace hač lětsa. Nowe kredity nochcedźa žane brać.
Financny minister Olaf Scholz (SPD) je naćisk etata knježerstwa přećiwo kritice z rjadow opozicije nastupajo inwesticije do přichoda zakitował. Po jeho słowach je etat solidny, „ale tež jara ekspansiwny“ z rekordnymi inwesticijemi.
Etatowy politikar FDP Otto Fricke naćisk porno tomu kritizuje: „Naš kraj njemóže sej tele knježerstwo dalšej dwě lěće dowolić. Zašłosć stej unija a SPD zapłaćiłoj, přitomnosć je zarjadniska, a přichod scyła rjadowany njeje.“ Etatowy politikar Zelenych Sven-Christian Kindler rjekny powěsćerni dpa: „Koaliciji pobrachuje wola jednać. Klimowa kriza, snadne inwesticije, słaba konjunktura – na wužadanja přichodneho časa nima etat koalicije žane wotmołwy. Lěwica kritizuje, zo knježerstwo njeinwestuje, ale radšo lutuje.
