Přiznawam, zo spočatk 1980tych lět astronomija runjewon k mojim najlubšim šulskim předmjetam njesłušeše. Mi běchu zapřijeća cuze, dimensije abstraktne a někajke wobličenja bjez zmysła. Jako pak minjeny tydźeń runja čłonam gmejnskeje rady Ralbicy-Róžant dožiwich, kak wědomostny direktor europskeje swětnišćoweje agentury ESA prof. Günther Hasinger wo nowych dopóznaćach uniwersum nastupajo rěčeše, zo móhli daty swětnišćowych wobkedźbowanjow runje w třiróžku – Kamjenc – Wojerecy – Budyšin wuhódnoćić a zo móhł tule hoberski podzemski teleskop nastać, to sym so tež ja kusk wot jeho zahoritosće natyknyć dał, směm-li to w času korony tak rjec. Móžeš sej jeno ćežko předstajić, kotre plany wědomost­nicy we Łužicy maja a zo chcedźa tu raz daty z cyłeho swěta a swětnišća zběrać, hdyž tola dźensa hišće wšudźe dosć spěšny internet nimaja. Mi znajmjeńša bě to za­jimawa wučbna hodźina astrofyziki a wuhlad na přichod. Marian Wjeńka

Spěšnje hišće swojej přewodźerce domoj dowjezć chcyše 38lětny pjany šofer wosoboweho awta, po tym zo bě jeho policija w Hagenje zadźeržała. Muž rjekny, zo bě ze žonomaj na party a zo je jenož jedne piwo pił. Alkomat zastojnikow pak po­kaza 1,67 promilow. Jako chcychu jeho sobu­ na stražu wzać, muž praji, zo wšak chcył žonje hišće domoj dowjezć. Z toho ničo njebu: Policisća wzachu jemu klučik.

Hižo třeću nóc za sobu w korčmje přenocować dyrbja wopytowarjo puba na sewjeru Jendźelskeje. Dotal njeje jasne, hdy budźe dróha k wotležanemu hosćencej w narodnym parku Yorkshire Dales­ zaso swobodna. Sylny sněhowy wichor­ bě něhdźe 60 hosći překwapił a wobchadny chaos zawinił. K jědźi maja hišće dosć, korčmarka měnješe. Hosćo zaběraja so ze wšelakimi hrami. Alkohol pak syda hakle popołdnju po třoch.

Załožbowy etat za lěto 2022 je schwaleny. Lětsa zahajene pomjeńšenje personalnych deficitow w serbskich institucijach klětu dale powjedu, kaž bě srjedu na nowinarskej rozmołwje zhonić.

Budyšin (SN/at). Posedźenje załožboweje rady minjenu wutoru bě prěnje po 30. róčnicy wutworjenja Załožby za serbski lud 19. oktobra 1991 we Łazu. Předsyda parlamentariskeje přirady, zapósłanc Sakskeho krajneho sejma Marko ­Šiman, poda tam zarys stawiznow załožby. Wšako njeje wjetšina nětčišich radźićelkow a radźićelow jeje započatki sobu dožiwiła. Składnostnje róčnicy je politisko-parlamentariski wječork w Berlinje předwidźany, podšmórny předsydka załožboweje rady Susann Šenkec. Wo konkretnym terminje pak wona ničo njerjekny, dokelž zdawa so aktualne pandemiske połoženje najwjetše haćidło być.

Berlin (dpa/SN). Němske wojerske lětarstwo je dźensa započało, na koronawirus intensiwnje lěkowanych pacientow přepołožić. Za to je Airbus MedEvac po informacijach powěsćernje dpa na bayerskim lětanišću Memmingen přizemił a wottam pacientow do Münstera-Osnabrücka w Sewjerorynsko-Westfalskej transportował. Zwjazkowa wobora ma dwě tajkej lětadle. Tak móža pacientow w běhu krótkeho časa po wšej Němskej rozdźělić, hdyž su chorownje wućežene.

Hotuja so na triažu

Berlin (dpa/SN). Hladajo na zdźěla dramatiske połoženje w chorownjach koronawirusa dla je předsyda swětoweho zwjazka lěkarjow Frank Ulrich Montgomery alarmowany: „Hotujemy so wšitcy na triažu“, rjekny wón nowinarjam. Lěkarjo wšitko činja, zo bychu tajkemu surowemu rozsudej zadźěwali. „Přiběracych ličbow dla pak dyrbja so na to přihotować.“ Triaža rěka, zo dyrbja medicinarjo pobrachowacych móžnosćow dla rozsudźić, komu najprjedy pomhaja.

Južna Afrika wirusowa kónčina