Łužica (28.12.15)

póndźela, 28. decembera 2015
artikl hódnoćić
(0 )

Wopomnja zaso Lessinga

Kamjenc (SN). Město Kamjenc chce tež klětu kulturne žiwjenje z akcentami we wopomnjeću Gottholda Ephraima Lessinga wobohaćić, zdźěla tamniši Lessingowy muzej. K narodninam basnika 22. januara zahaja program, kotryž wopřijima jědnaće zarjadowanjow. Předwidźane su přednoški, čitanja, dźiwadłowe předstajenja kaž tež literarno-hudźbny wječor z huslerjom Kolju Lessingom a israelskim lyrikarjom Elazarom Benyoetzom. Hesło koncerta je „Štož nimaš před wočomaj, njemóžeš za sobu wostajić“. Lessing přežiwi čas dźěćatstwa w Kamjencu, prjedy hač poda so 1741 na wjerchowsku šulu do Mišna. Wón je němskemu narodnemu dźiwadłu puć rubał.

Wabja za turizm regiona

Budyšin (SN). Nowy prózdninski magacin Hornja Łužica nětko předleži, informuje Marketingowa towaršnosć Hornja Łužica-Delnja Šleska. Na sto stronach přeproša wón zajimcow na wopyt, a to wot łužiskeje jězoriny hač do Žitawskich horin. Jednotliwe prózdninske regiony prezentuja nimo wosebitosćow tež pućowanske a kolesowarske čary. Lubowarja kultury wjedźe pućowanje do srjedźowěkowsko-romantiskich městow Hornjołužiskeho zwjazka šesćiměstow a do zahrodowych krajinow. Na wšelakich stacijach předstaja brošura tohorunja Via sacru, najstaršu wikowansku dróhu regiona. Zajimcy móža sej darmotny prózdninski magacin w turistiskich informacijach wotewzać.

Za myto WiL so požadać

Budyšin (SN). Hač do 31. januara 2016 móža so zajimcy hišće za wědomostne transferowe myto požadać, piše hospodarska iniciatiwa Łužica (WiL). Hižo pjaty kroć maja so kooperaciske projekty mjez łužiskimi předewzaćemi a wědomostnymi zarjadnišćemi wuznamjenić. Myto je 10 000 eurow hódne. Prašane su projekty, kotrež wuwićowy, technologiski, wědomostny a praksisowy transfer doprědka ćěrja a industrijne stejnišćo Łužicu skrućeja. Zapodate koncepty měli w dalokej měrje zakónčene być, nic pak dlěje hač tři lěta.

Dźěła nimale skónčene

Njedźichow (SN). Spódk Njedźichowskeje radnicy je nimale dosaněrowany, kaž z tamnišeho měšćanskeho zarjadnistwa rěka. Wobmjetk bu wotstronjeny, wšitko skrućene a drenaža připrawjena. Něhdźe 58 000 eurow su dźěła dotal płaćili. Planowar Thomas Gröbe je namjetował, kamjentny wobłuk duri na južnych swislach restawrować. To pak ma so hakle wobzamknyć. W pincy domu chcedźa jednu rumnosć wobmjetać a z nowym špundowanjom wuhotować. Pospyt ma pokazać, hač hodźi so pinca hdy jónu tež wužiwać.

wozjewjene w: Łužica
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND