Łužica (29.04.16)

pjatk, 29. apryla 2016
artikl hódnoćić
(0 )

CDU žada sej plan za Łužicu

Podstupim (dpa/SN). Opoziciska CDU w braniborskim sejmje je krajne knje­žerstwo namołwiła, strukturnu změnu we Łužicy pjenježnje podpěrać. „Štož pobrachuje, je plan za Łužicu“, wobžarowaše hospodarskopolitiski rěčnik CDU, Dierk Homeyer wčera w aktualnej hodźinje parlamenta­. „Trjebamy spěšnu a njebě­rokratisku pomoc za předewzaća, kotrež so na nowe wobłuki zwaža.“ Přiwšěm je jasne, zo je brunica hišće dołho za spušćomne a zapłaćomne zastaranje ludźi z milinu trěbna, Homeyer rozłoži. Braniborske knježerstwo pak měło wotwidźomneho kónca zmilinjenja dla strukturnu změnu zahajić. „Dźe wo industrijny zakład wšeho kraja“, wón napominaše.

Ochranowske hesła zestajane

Ochranow (dpa/SN). Z cyłkowneho wobstatka něhdźe 1 800 hesłow Stareho testamenta su w Ochranowskej ewangelskej wosadźe hesła za lěto 2019 zestajeli. Kóždemu z nich přirjaduja w přichodnymaj lětomaj hesło z Noweho testamenta, kaž wosada wčera zdźěli. K tomu přiń­dźetej hišće kěrluš a modlitwa. Zestajenje hesłow přez wosadnych je starodawna tradicija. Wone su mjeztym najrozšěrjeniša modlerska knižka w Němskej. Ochranowska wosada hesła wot lěta 1731 wudawa a mjeztym w 55 rěčach z milionom eksemplarow rozšěrja.

Kontrolera z retlom zranił

Choćebuz (dpa/SN). Z retlom je muž bjez jězdźenki w Choćebuzu kontrolera na hłowje zranił. 52lětny wopor z krawjacej ranu dyrbjachu do chorownje dowjezć, kaž statne rěčnistwo w Choćebuzu wčera srjedu informowaše. Srjedu běchu štyrjo kontrolerojo 21lětneho, kiž bu hižo wospjet bjez jězdźenki lepjeny, w tramwajce narěčeli. Na to wućahny muž retl a jednomu z kontrolerow njejapcy na hłowu biješe. Kolegojo bička přemóchu a kruće dźeržachu, doniž policija njepřijědźe. 21lětnemu hrozy chłostanje strašneho ranjenja ćěła dla, statne rěčnistwo připowědźi.

„Kóždy je přewinjomny“

Choćebuz (dpa/SN). Koparski ligist FC Energija Choćebuz čerpa zaso nadźiju. Po zasłuženym­ dobyću přećiwo Stuttgartej minjeny tydźeń chcedźa Łužičenjo jutře popołdnju přećiwo třećemu tabulki 3. koparskeje ligi Würzburger Kickers zaso wuspěšnje wobstać. „Budźe drje ćežko, ale přećiwo Stuttgartej smy pokazali, zo to zamóžemy. To chcemy přećiwo Würzburgej tohorunja dopokazać, rjekny trenar Energije Claus-Dieter Wollitz. Jeho mustwo steji tuchwilu z 38 dypkami na njewotstupnym 16. městnje, trjeba pak nuznje dalše dypki, zo by swoju poziciju skrućiło. „W tutej lize je kóždy přewinjomny“, je Wollitz swojim chowancam do jutřišeje hry sobu na puć dał.

wozjewjene w: Łužica
wjace z tohole wobłuka: « Łužica (28.04.16)
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND