Łužica (30.06.15)

wutora, 30. junija 2015 spisane wot:

Vattenfall rozprawu wotpokazał

Choćebuz (dpa/SN/ch). Vattenfall je wotpokazał medijowe rozprawy, zo matej dwaj blokaj w Janšojskej milinarni dźěłać přestać. Na zwjazkowej runinje diskutuja tuchwilu wo klimoškitnym pakeće, po kotrymž maja stare brunicowe milinarnje na rezerwu dźěłać a so potom krok po kroku wotpinać. Energijowe předewzaća měli za to financielne wurunanje dóstać. „Hač a w kotrej formje so Vattenfall na rezerwje wobdźěli, hodźi so hakle rozsudźić, hdyž je parlament naprawu wobzamknył“, praji rěčnik šwed- skeho statneho koncerna. Rezerwowa warianta je alternatiwa k zwoprědka planowanemu wotedawkej za starše brunicowe milinarnje.

Wo přichodźe Łužicy

Łužica (29.06.15)

póndźela, 29. junija 2015 spisane wot:

Wobydlerjo znjeměrnjeni

Wjelcej (dpa/SN/ch). Móžny stop přihotow přesydlenja za planowany wutwar brunicoweje jamy Wjelcej-juh blisko Choćebuza Wjelčanow wulce znjeměrnja. „Trjebamy wěstotu planowanja, wuwiće města njehodźi so wot jednoho dnja na druhi změnić“, zwurazni pjatk zastupowacy měšćanosta Rainer Schmidt. „Wosebje tragiske je to za něhdźe 800 wot přesydlenja potrjechenych wobydlerjow, kotřiž nětko zaso njewědźa, kak ma dale hić.“ To samsne płaći za přistajenych Vattenfalla­, kiž so wo swoje dźěłowe městna boja. Energijowy koncern Vattenfall je přestał přesydlenje wobydlerjow za wutwar Wochožanskeje jamy planować. To samsne pruwuje nětko za jamu Wjelcej-juh.

Ambroziju wutorhali

Łužica (26.06.15)

pjatk, 26. junija 2015 spisane wot:

Ambroziju wutorhali

Wětošow (dpa/SN/ch). Wobydlerjo Wětošowa su dźensa kołowokoło lětnjeje kupjele alergije wuskutkowacu rostlinu ambroziju wutorhali. Strach za strowotu při tym njeknježeše, dokelž rostlina hišće njekćěje, praji zapósłanc města Winfried Böhmer (Zeleni). Přičina akcije bě jutřiši cyłoswětowy dźeń ambrozije. Z nim ma so na přiběrace rozšěrjenje rostliny skedźbnjeć. Kontakt z njej wuwabja swjerbjenje­ a wuražki kože.

Prěje wotpohlad morjenja

Łužica (25.06.15)

štwórtk, 25. junija 2015 spisane wot:

Inowaciski centrum zahaji dźěło

Podstupim/Choćebuz (SN/ch). Inowaciski centrum Moderna industrija Braniborska na Braniborskej techniskej uniwersiće Choćebuz-Zły Komorow (BTU) započnje w juliju dźěłać. Tak nastanje nowy­ kontaktny a poradźowanski běrow za małe a srjedźostawske předewzaća, kotrež chcedźa wužadanjam přiběraceho splećenja produkcije z informaciskimi technologijemi wotpowědować. Braniborska je kraj srjedźneho stawa. Nimale 95 procentow zawodow w předźěłacym přemysle su małe a srjedźne předewzaća. W inowaciskim centrumje dóstanu wone radu a podpěru ekspertow z wědomosće a slědźenja.

Rozsudźa wo spěchowanju

Łužica (24.06.15)

srjeda, 24. junija 2015 spisane wot:

Rěča wo rozšěrjenju jamy

Rań (dpa/SN/ch). Wuběrki Braniborskeho krajneho sejma a jich kolegojo z Berlina dźensa w Ranju wuradźuja, hač je planowane rozšěrjenje jamy Wjelcej-juh energijopolitisce trěbne. Jězbje po brunicowym stejnišću přizamkny so posedźenje. Ćežišćo diskusije je energijowa změna, zdźěli Ralf Holzschuher (SPD), předsyda hospodarskeho wuběrka w krajnym sejmje. Braniborska bě hižo před dobrym lětom za wutwar jamy energijoweho koncerna Vattenfall hło­sowała. Berlin pak sej lětsa w januaru žadaše, zo chce při tym słowčko sobu rěčeć. Na to posedźenje namjetowachu.

Wjace poskitkow za dźěći

Łužica (23.06.15)

wutora, 23. junija 2015 spisane wot:

Předstaja němsko-pólski projekt

Zhorjelc (SN/ch). Wuměłske naćiski němsko-pólskeho projekta „Görlitzer ART“ su wot dźensnišeho na Johannesa Wüstenowej žurli Barokneho domu Nysowa 30 widźeć. Na wotewrjenje witachu tež wosom wuměłcow z Pólskeje, kotřiž běchu za zjawny rum města Zhorjelca wuměłske twórby naćisnyli. Wot 1. apryla 2016 hač do 1. apryla 2017 chcedźa je potom na markantnych městnach města nad Nysu pokazować. „Görlitzer ART“ je projekt Zhorjelca a Wrócławja. Tamniši měšćanski prezident Rafał Dutkiewicz a Zhorjelski wyši měšćanosta Siegfried Deinege (njestronjan) staj dźensa wotpowědne dojednanje podpisałoj. Koopera­cija je zapołožena jako satelitowy projekt za program europskeje kulturneje stolicy, kotraž Wrócław klětu budźe.

Wotstronjeja škody při rěce

Łužica (22.06.15)

póndźela, 22. junija 2015 spisane wot:

Za mjezu překročace nawjazanje

Zhorjelc/Drježdźany (dpa/SN/ch). Do zetkanja šefa Němskeje železnicy Rüdigera Gruby a sakskeho ministerskeho prezidenta Stanisława Tilicha (CDU) wčera w Drježdźanach je iniciatiwa „Dalokowobchad za Zhorjelc“ ćišć wukonjała. Po zastajenju železniskeje čary Drježdźany–Zhorjelc–Wrócław kónča so wšitke zbywace wuchodo-zapadne čary w Drježdźanach abo w Choćebuzu. Po koncepće Němskeje železnicy njezmějemy hižo žadyn mjezu překročacy dalokowobchad přez Zhorjelc, kritizuje politikar Zelenych a sobu- iniciator Stephan Kühn. Iniciatiwa, ke kotrejž słušataj tež Zhorjelski wyši měšćanosta Siegfried Deinege (njestronjan) a generalny sekretar CDU Michael Kretschmer, sej žada, zo so němsko-pólski železniski wobchad spěšnje polěpši a zwisk do Wrócławja znowa nawjaza.

Budu mjeńše firmy podpěrować

Łužica (19.06.15)

pjatk, 19. junija 2015 spisane wot:

MGO pyta noweho jednaćela

Kamjenc (SN/ch). 66 procentow wolerjow w Biskopicach je sej z Holgerom Großu noweho wyšeho měšćanostu wuzwoliło. 1. awgusta ma wot Zwjazka 90/Zelenych, CDU a FDP podpěrany kandidat zastojnstwo nastupić. Předchadnik Großy Andreas Erler chce jemu zastojnstwo hižo do toho zjawnje přepodać. Po intensiwnych rozmołwach ze sobudźěłaćerjemi radnicy chce so Große hnydom do dźěła dać. Jednaćelstwo Marketingoweje towaršnosće Hornja Łužica-Delnja Šleska (MGO) wón tuž wot awgusta hižo wukonjeć njemóže. Krajny rada Michael Harig, zdobom předsyda do­hladowanskeje rady MGO, je jeje to­warš­nikow informował, zo Große zastojnstwo jednaćela złoži. Na zhromadźiznje towaršnikow – je to skupina wobeju lutowarnjow a krajneju radow wokrjesow Zhorjelc a Budyšin – ma so pozicija jednaćela MGO rozjimać a znowa wupisać.

Teledźěło wuspěšne

Łužica (18.06.15)

štwórtk, 18. junija 2015 spisane wot:

Mostowe myto Junckerej

Zhorjelc (dpa/SN/ch). Prezident komisije EU Jean-Claude Juncker dóstanje dźensa wječor Mjezynarodne mostowe myto europskeho města Zhorjelca/Zgorzeleca za lěto 2014. Wone hódnoći zasłužby Junckera wokoło zjednoćenja Europy a jeho žiwjenski skutk. Myto přepodadźa w Pětrowej cyrkwi zapozdźene, dokelž dyrbjachu termin w aprylu krizoweho wjerška k dramje ćěkancow dla přestorčić. Juncker dlěje hač 20 lět žiwjenski rum Europy pod hospodarskimi, ale tež socialnymi a kulturnymi aspektami wuhotuje, wobkrući Mostowa towaršnosć swoju wólbu. Z 2 500 eurami dotěrowane myto spožčeja wot lěta 1993 wosobinam, kotrež maja zasłužby na wujednanju a dorozumjenju w Europje.

Njezbožo přepytować přestali

Łužica (17.06.15)

srjeda, 17. junija 2015 spisane wot:

Rogeński hród restawrowany

Choćebuz (dpa/SN/ch). Wjacore rumnosće Rogeńskeho hrodu w Choćebuzu su restawrowane. Su to přijimowanska stwa, Módry salon a spanski kabinet, kaž piše załožba Wjercha Pückleroweho muzeja Rogeński park a hród. Wot dźensnišeje srjedy su rumnosće tež wopytowarjam zaso přistupne. Na Rogeńskim hrodźe je Hermann von Pückler (1785–1871) w starobje bydlił. Ekscentriski wuhotowar zahrodow a wužiwar žiwjenja bě kołowokoło hrodu něhdźe 600 hektarow wulki park připrawić dał. Tež w Mužakowje koncipowaše wón hoberski krajinowy park. Wot lěta 2004 słuša tón k swětowemu kulturnemu namrěwstwu UNESCO. W Rogeńskim parku je Pückler tež pochowany.

Žadyn dorost baćonow

nawěšk

SERBSKE NOWINY podpěruja:

Novi Sad – kulturna stolica Europy

nowostki LND