Praske Towarstwo přećelow Serbow (Společnost přátel Lužice – SPL) ma nowe wjednistwo. Na hłownej a wólbnej zhromadźiznje wuzwolichu Lukáša Novosada za předsydu SPL. Dotalny předsyda Petr Kadlec njebě hižo kandidował. Nowe wobliča su tež w předsydstwje, k nim słuša Milan Hrabal z Varnsdorfa. Wo zhromadźiznje kónc měrca w Serbskim seminarje měsačnik Česko-lužický věstník w mejsko-junijskim dwójnym čisle nadrobnišo pisa. Tež powěstnik ma nowu zamołwitu redaktorku – Elišku Papcunovu.

W rozmołwje nowy předsyda SPL wuzběhny, zo je za polěpšenje dźěła trjeba, „nawučić so druhe nahlady respektować a nawučić so respektować kritiku jako wujasnjenje měnjenjow“. Nowa redaktorka powěstnika přeješe sej za přichod tež přinoški w serbskej rěči z Łužicy. Za pjenježnu podpěru k zawěsćenju dalšeho wuchadźenja časopisa dźakowachu so na hłownej zhromadźiznje tež Domowinje a jednotliwcam, kaž Bogni Korjeńkowej.