Debata wo pozdatnej spektakularnej namakance pola Wałbrzycha
Waršawa. Dosć intensiwnje rozprawjeja pólske a mjeztym tež mjezynarodne medije wo pozdatnej spektakularnej namakance njedaloko delnjošleskeho města Wałbrzycha, wokoło kotrejež so tójšto bajow pleće: „złoty ćah“ z kónca Druheje swětoweje wójny, połny pokładow a drohoćinkow.
Wšitko nastorčił bě před tydźenjomaj pólski prawiznik. W nadawku swojeju mandantow – Polaka a Němca – wón zdźěli, zo staj wobaj wony drohotny ćah namakałoj a zo žadataj sej mzdu dźesać procentow wšeje hódnoty. Šansy na to wšak njejsu ani tak špatne: Hakle w juniju bě pólski parlament nowy zakoń wobzamknył, kotryž tajke dźesaćprocentowske myto předwidźi. Za to pak dyrbjało wěste być, zo je ćah woprawdźe namakany. Pječa je dopokazane, zo bě w meji 1945 ćah z Wrócławja do Wałbrzycha wotjěł, tam pak nihdy njedojěł. Pólske medije wuslědźichu swědkow, kotřiž su ćah hišće na swojej woči widźeli. Fakt tež je, zo bě we Wrócławju za čas němskeje okupacije wulka wotnožka němskeje Reichsbanki. Ju su na kóncu wójny ewakuowali.