Waršawske knježerstwo wobara so přiběracej kritice z wukraja

Berlin/Waršawa (dpa/K/SN). Nětčiše pólske knježerstwo pod nawodom radikalno-konserwatiwneje strony Prawo a sprawnosć (PiS) twjerdošijneho Jarosława Ka­czyńskeho drje swěru jědźe kurs tak mjenowaneho „znarodnjenja kraja“, přiwšěm jemu wětřik chětro mjezwoči duje – wotnutřka a hišće bóle wotwonka.

We wjace hač 20 pólskich městach su sobotu dźesaćitysacy znjeměrnjenych ludźi na dróhu šli, demonstrujo wosebje přećiwo pjatk wobzamknjenemu nowemu medijowemu zakonjej, z kotrymž widźa demokratiju wohroženu. Z hesłami kaž „Ruce preč wot radija“ abo „Knježerstwo łži“ wustupowachu woni naležnje za jeho cofnjenje. K demonstracijam bě namołwił Komitej k zakitowanju demokratije, kotrehož załožićel Mateusz Kijowski we Łódźi, dźiwajo na hižo přewjedźene změny na čole zjawnoprawneje telewizije a rozhłosa, rjekny: „Změny w zjawnych medijach su hižo nětkole widźeć.“