POKUTU, samo chětro selenu, dyrbješe Vilémovske ratarske předewzaće ZSAT zapłaćić. Čěska wobswětowa inspekcija (ČIZP) w Havličkovym Brodźe je firmu pochłostała z nic mjenje hač 1,5 milionami krónow (něhdźe 55 555 eurow). To je jedne z najwyšich chłostanjow, wuprajene minjeny čas na zakładźe wobswětoweho zakonja, piše k tomu dźenik Lidové noviny. ZSAT je wina na tym a dyrbi za to pokućić, zo je swój čas w rěčce Doubravka wjace hač 8 000 rakow zahinyło. Přičina jich smjerće bě zajědojćena woda rěčki, k čemuž je dóšło, dokelž běchu podźěle pesticida nurelle z nutřkozawodneje kanalizacije­ ratarskeho předewzaća do Doubravki zběželi. „Mortwe raki smy našli na 6,5 kilometrow dołhim wotrězku Doubravki. Njeńdźe wšak jenož wo to, zo su rěčne raki zahinyli, nimoměry toksiska maćizna je w spomnjenym wotrězku nimale wšitke žiwe organizmy kaž tež dalše škitane družiny zwěrjatkow zničiła“, rjekny direktor ČIZP Jan Panský. Po jeho sudźenju je tak cyły wokolny ekologiski system chětro wulku škodu poćerpjeł.