To a tamne (24.10.23)
Njewšědny podawk sta so w delnjosakskim Tangendorfje, jako 13 ćěkancow njewočakowano při durjach chěže młodeje maćerje steješe. Kaž tamniša nowina „Winsener Anzeiger“ nětko rozprawja, běchu sobudźěłaćerjo wokrjesneho zarjada puć do přebywanišća za ćěkancow wopak wopisali. Tuž zaklinkachu 13 muži pola Natalie L., kotraž běše runje z dźěćkom zaběrana. Dokelž je na to wulki njeměr před durjemi młodeje maćerje nastał dyrbješe policije situaciju rozrisać.
Pony je w Zhorjelskim wokrjesu po pinčnych schodach dele padnył. Wohnjowa wobora dyrbješe zwěrjo wuswobodźić. Wohnjowi wobornicy z Hainewalde a Wulkeho Šunowa trjebachu za to dwě hodźinje. Hač je so pony zranił, njemóžeše rěčnik wuchowanskeje straže rjec.
To a tamne (23.10.23)
„Goofy“ je „młodźinske słowo lěta lěta“ 2023. Při wothłosowanju nakładnistwa Langenscheidt přesadźi so słowo z 39 procentami napřećo druhim namjetam. Dobyćerske słowo, kotrež wopisuje njelepu abo hłupikojtu wosobu abo jeje zadźerženje, kotrež je směšne, předstajichu njedźelu prěnjotnje na 75. knižnych wikach w Frankobrodźe nad Mohanom. Wjacore miliony młodych ludźi je wot junija hižo za swoje najlubše słowo wothłosowało.
Předrasćene psy su zhromadnje ze swojimi wobsedźerjemi w New Yorku sezonu Halloweena zahajili. 15000 čłowjekow, najwjace z nich z psom, wobdźělichu so na tak mjenowanym „Tompkins Square Halloween Dog Festival“. Kostimy běchu přewšo wšelakore a sahachu wot Barbie přez Kena hač k gitaristam. Dobył je naposledk psyk, kotryž bě jako Winnie Pooh kostiměrowany.
To a tamne (20.10.23)
Pyton su w kontejneru za staru drastu we Waibstadće pola Heidelberga namakali, jako chcychu jón pomocnicy wuprózdnić. Wulki had bě hižo zymu ćerpjeł, policija wčera zdźěli. Zastojnicy su wuzamknyli, zo je so pyton sam do kontejnera dóstał. Had su na organizaciju za wuchowanje zwěrjatow přepodali. Policija pad přeńdźenja přećiwo zakonjej za škit zwěriny dla přepytuje.
Policisća storčichu 13lětneho hólčeca ze swojeho kolesa, wohrožachu jeho z brónjemi a jeho zajachu. Wulku kritiku wuwabi zasadźenje policije wodoweje pistole dla w Londonje. Iniciatiwa Alliance for Police Accountability (APA) wčera wuzběhny, zo jednaše so cyle jasnje wo hrajku, wšako bě pistola hólca pisana. Z njej bě sej 19. julija ze swojim młódšim bratrom a sotru hrajkał. Zastojnik to wuhlada. Wón měješe to za potencielny wohrožacy podawk, štož policajskej staciji přizjewi. Na to so wobrónjene jednotki k pozdatnemu městnu njeskutka podachu a hólčeca zajachu.
To a tamne (19.10.23)
Z awtomatizowanej analyzu zwěrjećich zwukow hodźi so po studiji derje wuwiće mnohotnosće družinow we wotpowědnej kónčinje sćěhować. Tole wuchadźa z wuhódnoćenja z pomocu kumštneje inteligency (KI). W tropiskich kónčinach, hdźež bu wjele lěsa zničene, so zaso dale a wjac zwěrjatow zaměstnja. Tole wozjewi team wokoło wědomostnika Jörga Müllera z Würzburgskeje uniwersity w fachowym žurnalu „Nature communications“. Fachowcy su z pomocu kumštneje inteligency zwuki ptačkow, amfibijow a cycakow wuhódnoćili.
Zwěrjenc w Barcelonje žaruje wo Pedra. Zwěrjo běše najstarši w Europje žiwy nosorohač a je minjenu póndźelu w starobje jasnje nad 50 lětami zemrěł, zdźěli zwěrjenc španiskeje metropole.
To a tamne (18.10.23)
Dokelž je so muž w Baltiskim morju „wolóžił“, dyrbješe so wón tele dny před hamtskim sudnistwom w Lübecku zamołwić. Sobudźěłaćerjo porjadoweho zarjada běchu jeho mjenujcy w nocy při tym lepili. Pad dyrbješe sudnistwo wobjednawać, dokelž nochcyše muž 60 eurow pokuty zapłaćić. Sudnistwo je nětko rozsudźiło, zo njeje muž nikoho šarował. W ćmě wšak njebě spóznajomne, što wón tam dokładnje čini. Tohorunja steješe wón z chribjetom k móžnym přihladowarjam.
Ćěsla z Badensko-Württembergskeje wobsedźi nimo psyka tež dźiwje swinjo jako domjace zwěrjo. Kundroz z mjenom Friedrich Hannibal Schnitzel je něhdźe 50 kilogramow ćežki a ma swój domicil hnydom direktnje při domskim ćěsle. Hdys a hdys smě wón samo do běrowa abo do dźěłarnje, hdźež so jara derje čuje.
To a tamne (17.10.23)
To a tamne (16.10.23)
W centrumje Lipska bědźachu so šoferojo jězdźidłow zawčerawšim z ješću. Kaž policija wčera zdźěli, běchu njeznaći sobotu substancu do třoch studnjow sypnyli, čehoždla ješćowe pucherki nastawachu. Ješć šumješe po dróze a tuž běchu dróhi a chódniki hładke. Nimo toho chětro wichorješe, tak zo ješćowe pucherki wokoło lećachu. Studnje dyrbjachu zamołwići města nachwilnje hasnyć.
Kedźbliwa susodka pěstowarnje přizjewi so w nocy na sobotu pola policije w Rangsdorfje, dokelž je paduchow w kubłanišću wuhladała. Jako bě policajske awto po puću k pěstowarni, žona zastojnikow wo wuwiću dale informowaše a rozprawješe, zo paduši nětko samo wokna rjedźa. Kaž so pozdźišo wukopa njeběchu so paduchojo do kubłanišća zadobyli, ale rjedźerjo. Policija so přiwšěm kedźbliwej wobydlerce dźakowaše.
To a tamne (13.10.23)
W spódnich cholowach schował je paduch 5 000 eurow, kiž bě wón do toho sobujěducemu w ćahu pokradnył. Na jězbje z Bonna do Regensburga měješe 24lětny pjenjezy za dlěše pućowanje po Němskej w tobole sobu, kotraž wisaše nad ławku. Jako so muž skrótka wotsali, 42lětny paduch tošu hrabny a so zminy. 24lětny hnydom za pjenjezami pytajo paducha narěča a jeho zadźerža. Přiwołana policija muža přepytujo pjenjezy skónčnje w toho spódnich cholowach namaka. Nětko přećiwo njemu přepytuja, tež, dokelž bě bjez płaćiweje jězdźenki po puću.
Wopita z awtom na policajsku stražu přijěła je 62lětna žona w Breisachu nad Rynom w Badensko-Württembergskej. Žona chcyše skóržbu zapodać, dokelž bě ju něchtó ćělnje zranił. Zastojnikam alkoholowa wóń napadny. Test wunjese 1,22 promilow. Jězbnu dowolnosć sćazachu.
To a tamne (12.10.23)
Jenož dny po swojim rekordźe při skočenju z parašutom je 104 lět stara Američanka zemrěła. Dorothy Hoffner z Chicaga je w nocy na njedźelu „spokojnje wusnyła“, nowiny rozprawjeja. Dokładnu přičinu smjerće hišće njeznaja. 1. oktobra, bě w starowni bydlaca žona nowy swětowy rekord najstaršeje skakarki z parašutom nastajiła. W starobje sto lět bě wona „z wulkim wjeselom“ hižo raz skočiła. Tež tón króć bě ju nazhonity skakar jako tandem přewodźał.
Z 3,4 promilemi alkohola w kreji je so šofer nakładneho awta wosrjedź awtodróhi A81 pola Böblingena w Badensko-Württembergskej spać lehnył. Policija z toho wuchadźeše, zo ma stejace awto techniski problem. W kabinje namakachu 48lětneho pjaneho we łožu. Zastojnicy muža wubudźichu a wzachu jeho sobu na stražu, zo bychu jemu krej brali.
To a tamne (11.10.23)
Wosrjedź jězby městna w awće měnjeć chcyłoj staj mužej w Freisingu pola Mnichowa – a zrazyštaj ze swojim transporterom do płotu. Do toho běchu policisća awto zadźeržeć chcyli. Na to chcyše 28lětny městno z 20lětnym změnić. Při tym zhubištaj kontrolu nad jězdźidłom. Wukopa so, zo njeměješe 28lětny šofer jězbnu dowolnosć. Nichtó njebu zrajeny.
Na wšěch 941 króć w běhu 24 hodźin z mosta skočił je 41lětny Mike Heard w Nowoseelandskej. Muž je po tutym puću dotalny swětowy rekord w bungee-skakanju, kotryž běchu loni ze 765 skokami w Šotiskej nastajili, jasnje překročił. Haerd bě sej předewzał, znajmjeńša 800 skokow docpěć. Zo je na kóncu 941 skokow zdokonjał, njeje sej do toho myslił. Zamołwići Guinnessoweje knihi rekordow dyrbja nowy wukon hišće wobkrućić. Nowoseelandska je domizna bungee-skakanja.
