To a tamne (11.07.19)
W škitnych woblekach přećiwo atomowym, chemiskim a biologiskim škódnym maćiznam su wohnjowi wobornicy w Ratingenje pola Düsseldorfa twory za grilowanski wječor nakupowali. Bě to spontany dźěl prawidłowneho zwučowanja specialneje jednotki, kotraž dyrbi nawuknyć z wobmjezowanej komunikaciju, ze špatnym widźenjom a hibanjom wobchadźeć. Grilować wšak smědźachu bjez škitnych woblekow.
Wjace hač 500 myšow w jednym bydlenju nańdźechu sobudźěłaćerjo weterinarneho zarjada w Essenje. Mějićel bě myše dźeržał, bjeztoho zo by je po splahu dźělił. Tak běchu so „bjez kontrole“ rozmnožili. Přiwšěm je so jim w bydlenju wočiwidnje derje šło, hewak njebychu so tak rozmnožili. Weterinarny zarjad ma nětko problem, telko myšow w zwěrjatownjach zaměstnić.
To a tamne (10.07.19)
Chorobne awto pokradnył je 40lětny muž w Remscheidźe. Zo by spěšnišo domoj přišoł, wza sej wón awto, kotrež před chorownju čakaše. Samsny wóz bě jeho hodźiny do toho do chorownje přiwjezł. Kölnscy policisća wšak móžachu muža na awtodróze A3 njedaloko Königsforsta zajeć. Wón bě pjany, nimo toho njeměješe žanu jězbnu dowolnosć.
Wopačni policisća su starušku w Poruhrskej wo złoto a debjenki w hódnoće jednoho miliona eurow wobšudźili. Njeznaći běchu so při telefonje jako policisća wudawali, kotřiž su runje rumunsku cwólbu paduchow zajeli. Paduši mějachu pječa adresu 79lětneje w Dortmundźe při sebi. Radźachu jej drohotne wěcy policiji přepodać a namołwichu ju, złoto a debjenki w płatowych měškach na kěrchowje wotpołožić. Wot skućićelow zatrašena žona je to štyri razy činiła.
To a tamne (09.07.19)
Pozdatne falšowane pjenjezy su w delnjofrankskim Lohru nad Mohanom zasadźenje policije zawinili. Wikowar klawěrow bě ju wołał, dokelž měješe 15 bankowkow po 200 eurach za wopačne, kotrež bě jemu kupc klawěra přepodał. Zastojnicy po dokładnym pruwowanju zwěsćichu, zo běchu pjenjezy płaćiwe, ale mjeztym 17 lět stare. Su tuž hinak wupadali hač dźensniše bankowki.
Paduchow 40 000 prózdnych sadowych kistow su w Meckenheimje pola Bonna zajeli. Mužojo běchu je přez tydźenje stajnje zaso ze składa předawarnje kradnyli. Hłowna přičina: Kóžda kista wunjese štyri eura zastawka. Jedyn ze sobudźěłaćerjow je na nócnej patruli minjeny kónc tydźenja skućićelow wuhladał a policiju informował. Ta móžeše třoch paduchow njedaloko kupnicy zajeć.
To a tamne (08.07.19)
Swójskeho syna wobskoržiłoj staj staršej w Neuruppinje, dokelž bě jeju awto skradźu a bjez jězbneje dowolnosće wužiwał. Do toho běštaj chłostanku přespěšneho jězdźenja dla dóstałoj, na kotrejž bě 28lětny syn jako šofer spóznajomny. Dźeń po tym policisća jeho kontrolowachu a zwěsćichu přeco hišće 2,26 promilow alkohola w kreji. Młody muž wšak zastojnikam klučiki awta dobrowólnje přepoda.
W zawodźe za grilowanske wuhlo a přisłušk w Essenje je w nocy na njedźelu woheń wudyrił. Hašenske dźěła trajachu cyły dźeń, a płomjenja so jara spěšnje rozpřestrěchu. Hłowne twarjenje, hdźež bě material składowany, je so mjeztym sypnyło. Wulkeje horcoty dla njemóžachu so wobornicy hišće k centrumej wohenja předrěć a liča z hoberskej wěcnej škodu. Na zbožo so nichtó njezrani.
To a tamne (05.07.19)
Spodźiwnje wulki narostł je bywši francoski prezident Nicolas Sarkozy a je mjeztym samo wjetši hač jeho žona Carla Bruni. Tak znajmjeńša zdawa so to na foće na titulnej stronje magacina „Paris Match“. Dotal bě Sarkozy stajnje mjeńši hač Carla Bruni był. Po dźiwnych a wusměšowacych komentarach w interneće je magacin wěcku nětko rozjasnił. Fotografowali běchu jeju na schodach, při čimž steješe Sarkozy schodźenk wyše hač jeho mandźelska.
Nošenje žonow steji wot dźensnišeho w srjedźišću swětowych mišterstwow w finskim Sonkajärviju. 34 porikow je přizjewjenych, su mjez druhim z Ruskeje, Francoskeje, Němskeje, USA a Nowoseelandskeje. Mužojo dyrbja ze žonu na chribjeće 235,5 metrow dołhu čaru, połnu zadźěwkow, běžeć.
To a tamne (04.07.19)
Jězdźenje z podzemskej železnicu ma we Wienje přichodnje tež wonjate dožiwjenje być: W štyrjoch ćahach maja z klimowej připrawu wónje družin „Relax“, „Energize“, „Fresh White Tea“ a „Happy Enjoy“ prudźić, kaž informuja. Ludźo móža na internetnej stronje wobchadneho předewzaća wo wonjatym dožiwjenju rozprawjeć. Zaměr akcije je, jězbu z ćahom runje w času horcoty a poćenja atraktiwnišu sčinić.
Elvis Presley jako amplowy mužik: Silueta „krala rock ‘n‘ rolla“ ma nětko na ampli pěškow w hessenskim Bad Nauheimje widźeć być. Fanowe skupiny běchu ideju nastorčili, kotruž je město nětko zwoprawdźiło. Ampla je wot dźensnišeho aktiwna. Presley bě wot oktobra 1958 hač do měrca 1960 wojak w bliskej kasernje Američanow a bydleše w Bad Nauheimje.
To a tamne (03.07.19)
Pokradnjeny wóslik dźěćaceho karusela w bayerskim Günzburgu je zaso namakany. Postawa bě so na kónctydźenskim měšćanskim swjedźenju z karusela zhubiła. Nětko su ju w 20 kilometrow zdalenej wsy na zahrodźe wuhladali. Wobsedźer ležownosće twjerdźi, zo je wóslika na dróze namakał a sej myslił, zo chce jeho něchtó wotbyć. Wobsedźer ležownosće dyrbi nětko ze skóržbu ličić, dokelž bě sej namakanku přiswojił.
Dotal njeznatu družinu pawka su slědźerjo Uniwersity Hamburg w Awstralskej wotkryli a po twórcu mody Karlu Lagerfeldźe (1933–2019) pomjenowali. Pawk dopomina na stil Lagerfelda: Čorne nóžki asociěruja slědźerjo z rukajcami, kotrež Lagerfeld stajnje nošeše; hoberskej woči pawka wupadaja kaž čorne nawoči njeboh wuměłca.
To a tamne (02.07.19)
Njewšědny napohlad skićeše so njedźelu rano wobydlerjam mexiskeho města Guadalajara: Sylny zliwk bě cyłe město z krupami pokrył. W někotrych dźělach města ležachu wone cyły meter wysoko, awta běchu jenož hišće zdźěla widźeć. Zamołwići mějachu ruce połnej dźěła, krupy z dróhow rumować, rěka w zdźělence města na juhu kraja z 1,5 milionami wobydlerjow.
Had z plasty je w Porynsko-Pfalcy policajsku akciju zawinił. Žona bě wčera w Fußgönheimje kobru z pozběhnjenej hłowu na swojej zahrodźe wuhladała a policiju zawołała. Zo njemóhła kobra ćeknyć, połoži žona šklu na hada a poćeži ju z kamjenjom. Policisća pak nańdźechu jeničce plastowu hrajku w formje hada. „To bě kuriozne zasadźenje“, rěka w zdźělence policije, „w našej kónčinje drje su hady, tajki pad pak hišće njemějachmy.“
To a tamne (01.07.19)
73lětnej wuměnkarce z Budyšina su móšeń wróćili, kotruž běchu jej před nimale dźesać lětami na zahrodźe w Ringenhainje pokradnyli. Nětko je ju 29lětny Čech na wuchodźowanju po lěsu pola Šluknova našoł a na Habrachćičanskej policajskej staciji wotedał. Chorobna zawěsćenska karta a diwersne dalše karty wšak su mjeztym njepłaćiwe. Ale snadź móže rentnarka ze wšelakimi bonusowymi kartkami hišće něšto započeć.
Rozkora mjez stami hosćimi lěsneje kupjele w Düsseldorfje je zasadźenje policije zawinowała. Dźesatki zastojnikow su minjenu sobotu spytali zwadu změrować. K ćělnym rozestajenjam na zbožo dóšło njeje. Někotři z kupacych běchu so na skupinu hewrjekacych młodostnych hóršili. Tući pak njedachu sej ničo rjec. Na to so tež dalši wopytowarjo werbalnje do młodostnych dachu.
To a tamne (28.06.19)
W parku so słónčić móže jara drohe być. W italskim Venedigu je so 23lětna Kanadźanka na Papadopoli-zahrodach w bikiniju słónčiła a dyrbješe za to 250 eurow pokuty płaćić. Zo njeje dowolene po lagunowym měsće z jeho wuznamnym historiskim centrumom w kupanskej drasće so pohibować, na zjawnych městnach přebywać abo priwatne jězdźidło wužiwać, wona njewědźeše.
Město Mnichow je porno Venedigej wotewrjeniši. Hač mužojo abo žony, wšitcy smědźa so při rěce Isar tež jenož w kupanskich cholowčkach słónčić. Hłowna wěc, zo su primarne splažne dźěle njewidźomne, tak rěkaše tele dny jednohłósnje w Mnichowskej měšćanskej radźe. To wšak hladajo na přewšo katolsku Bayersku chětro překwapja. Zwonka wupokazanych městnow pak maja wšitcy wotpowědnje zdrasćeni być.
