To a tamne (19.02.18)

póndźela, 19. februara 2018 spisane wot:

Dwanaćelětny je w Berlinje-Spandauwje spěšnik ICE prawdźepodobnje za mě­šćansku železnicu měł a tak město do centruma stolicy do Wolfsburga jěł. Po puću je hólčec přewodźerce w ćahu napadnył, na čož wona zwjazkowu policiju zawoła. Zastojnicy pachoła we Wolfs­burgu přewzachu a informowachu jeho staršeju. Z přichodnym ćahom pósłachu syna – pod dohladom dalšeho přewodźerja – wróćo do Spandauwa, hdźež staršej na njeho hižo čakaštaj.

Paduch drjewa bě swoje awto w porynsko-pfalcskej gmejnje Ellerstadt tak połne nakładował, zo je na polu tčacy wostał. Policija nańdźe njezamknjene wozydło w nocy na njedźelu blisko składźišća drjewa. Mějićelka awta zastojnikam rjekny, zo bě mandźelski z nim po puću. Z přiwuznymi smědźeše wona drjewo wčera na składźišću wróćo staplować.

To a tamne (16.02.18)

pjatk, 16. februara 2018 spisane wot:

Nadal wulki je zajim za tradicionalnu zymsku wustajeńcu ke kultowemu filmej „Tři worješki za popjelawku“ na Moritzburgskim hrodźe. Na wšě 100 000 wopytowarjow su tam dotal zličili, kaž zarjadnistwo hrodu zdźěla. Nadźijeli běchu so 80 000 hosći. Přehladku z kostimami, rekwizitami a kulisami woblubowaneho bajkoweho filma běchu 18. nowembra 2017 wotewrěli. Wona je hišće hač do 25. februara přistupna.

Zbožo w njezbožu měješe staruška w Brettenje pola Karlsruhe. Ju běchu wobšudnicy wobkradnyli, prošo 79lětnu, jim pjenjezy měnjeć. Při tym torhnychu jej móšničku z 500 eurami z ruki a zminychu so. Pjenjezy bě žona za swoje 80ćiny na bance wotzběhnyła. Hosćo na susodnej póstniskej party spontanje reagowachu, zběrachu za starušku pjenjezy a přepodachu jej dohromady 200 eurow.

To a tamne (15.02.18)

štwórtk, 15. februara 2018 spisane wot:

Dźesatki pizzow wšědnje je Dortmundski prawiznik přez dlěši čas dóstawał, bjez toho zo bě je scyła skazał. Štó je na tym wina, policija nětko přepytuje. Tukaja na „pizza-stalking“, šikanu z pomocu skazankow w mjenje druheho. Akcija je nimo, za skućićelom pak dale pytaja. ­Pizzy zapłaćić prawiznik njetrjeba. Škodu zaruna dodawar pokładźeneho pječwa.

Při mosće wisajo wostało je nakładne awto w Kamjenicy. Prawdźepodobnje bě 62lětny šofer Lkw-ja wysokosć mosta wopak posudźował. Pod mostom bě jenož 3,50 metrow wysoko městno. Na připowěšaku nakładowane twory pak přesahowachu wjace hač štyri metry. Na nakładnym awće a na mosće nastatu škodu trochuje policija na něhdźe 8 500 eurow. Wona wšak tež přepytuje, kak móžeše šofer dale jěć, byrnjež wysokosć mosta wupokazana była.

To a tamne (14.02.18)

srjeda, 14. februara 2018 spisane wot:

Ze sněhowymi bulemi je jědnaćelětny hólčec z Hannovera w awstriskim centrumje zymskeho sporta Obertauern 54lětneho muža tak rozhorił, zo tón hólca namócnje k policiji sobu wza, bjez toho zo by staršeju informował. Pachoł bě so ze sněhom na nimo jěduce awta měrił. Policisća pak njemějachu za postupowanje šofera zrozumjenje, nawopak. Wón dyrbi nětko ze skóržbu ranjenja ćěła dla ličić, dokelž bě hólca na łochću snadnje zranił. Nimo toho njebě tón žane z awtow trjechił.

Třichnjenja swojeje žony dla je so 81lětny šofer wosoboweho awta w Biskopicach tak nastróžił, zo wón kontrolu nad wodźidłom zhubi. Awto zrazy na to z wotmachom do parkowaceho Toyoty. Mandźelska šofera w samsnej starobje so snadnje zrani. Nastatu wěcnu škodu wšak trochuja na 10 000 eurow.

To a tamne (13.02.18)

wutora, 13. februara 2018 spisane wot:

Swój handy mylnje do syły norow ćisnył je póstniski princ Dubby I. w poruhrskim Oberhausenje. Na princowskim wozu stejo bě wón sobotu z plackami mjetał a při tym na swojim mobilnym telefonje wuslědki kopańcy sćěhował. Na to połoži wón telefon do faška ze słódkosćemi. Jako bě nastroj nadobo fuk, wón z druhim telefonom swoje čisło zazwoni. Na tamnym boku přizjewi so policija. Sprawny karnewalist bě handy tam wotedał.

Skandalni turisća, kotřiž sej sto metrow dołhu dźěru na awtodróze A 20 w Mecklenburgsko-Předpomorskej wobhladuja a so tam sami fotografuja, zamołwitych přiběrajcy starosća. Ći nětko rozmysluja, prawnisce přećiwo wudźěrakam postupować. Čara je zawrjena, na nju stupić je zakazane. Po njej běhać je přewšo lochkomyslne a jara strašne, dróhotwarski zarjad zdźěla.

To a tamne (12.02.18)

póndźela, 12. februara 2018 spisane wot:

W kerčinje tčacy wostał je paduch w badensko-württembergskim Riedlingenje, po tym zo bě so podarmo do hrajneje hale zadobyć spytał. Wohnjowi wobornicy dyrbjachu 31lětneho z motorskej piłu wuswobodźić. Wón bě so do kazina zadobył, při čimž so alarmowa připrawa zapiny. Bjez rubizny muž na to ćekny, daloko pak njepřińdźe: Policisća jeho poł hodźiny pozdźišo w kerčinje metry dale namakachu a zajachu.

Kaž ručna granata wupadacy młynčk korjeninow je w Frankfurće nad Mohanom zasadźenje policije zawinował. Swědcy běchu podhladny nastroj při zachodźe garažoweho kompleksa namakali a zastojnikow wołali. Fachowcy hessenskeho kriminalneho zarjada pak móžachu jich změrować: Jednaše so wo korjeninowy młynčk, z kotrymž móžeš mjez druhim marihuanu rozmlěć.

To a tamne (09.02.18)

pjatk, 09. februara 2018 spisane wot:

Mylnje 15 000 jejow skazało je norwegske mustwo na Olympiskich zymskich hrach w juhokorejskim Pyeongchangu. Tam běchu chětro překwapjeni, zo přiwjeze nakładne awto město skazanych 1 500 jejow dźesać króć telko, norwegska powěsćernja NTB rozprawja. Zamołwići běchu jeja internetnje skazali. Při tym drje je so zmylk při přełoženju do korejšćiny stał. Wulki dźěl jejow móžachu zaso wróćo dać. Zbytk dyrbja zjěsć.

Dźěl hoberskeje hory tuka Londonskeje kanalizacije je wot dźensnišeho w měšćanskim muzeju wustajeny. 250 metrow dołhi kolos pjelchow, lapow, kondomow a stołstnjeneho tuka bě loni kanal zatykał. Sobudźěłaćerjo města trjebachu tydźenje, zo bychu 130 tonow ćežki monstrum wotstronili. Tójšto wobydlerjow swoje wotpadki a tež horcy tuk přez toaletu wotstroni. Njerjad so tam zlěpi.

To a tamne (08.02.18)

štwórtk, 08. februara 2018 spisane wot:

Hoberska dźěra na awtodróze A20 njedaloko mecklenburgsko-předpomorskeho Tribsesa je dźeń a wjetša. Mjeztym je so­ wona wot spočatnje 40 na 95 metrow rozšěriła, wobchadne ministerstwo w Schwerinje zdźěli. Jězdnja bě so kónc septembra na wjacorych metrach sypnyła. Něšto tydźenjow pozdźišo dyrbjachu awtodróhu dospołnje zawrěć. Hłowna přičina je poch (Torf) pod awtodróhu, kotryz njeběchu drje při twarje dosć wobkedźbowali. W nalěću chcedźa twarske dźěła k wuporjedźenju zahajić.

Dypkownje w 11.11 hodź. je so dźensa we wjacorych městach póstniski čas zahajił. W Düsseldorfje wobsadźichu předrasćene žony radnicu. Tež w Kölnje a Mainzu so póstniske nory zhromadźichu. Přiwótřenych wěstotnych naprawow dla dyrbja karnewalowe kluby lětsa wjace pjenjez nałožić hač hewak.

To a tamne (07.02.18)

srjeda, 07. februara 2018 spisane wot:

Rybjacy hat wurubili su njeznaći sewjernje Drježdźan. Nětko pobrachuje tam 300 karpow, šćukow a mjeńšich rybow. Wobsedźer hata je njeskutk póndźelu zwěsćił. Skućićeljo běchu prawdźepodobnje w času wot 1. do 5. februara deski spušćadła wućahnyli a wodu hata w měšćanskim dźělu Weixdorf wotpušćili.

Na wšě 660 eurow za wotamknjenje duri je sej chětro „drohi“ zamkar w badensko-württembergskim Albbrucku žadał, čehoždla ma nětko­ mjerzanje z policiju. Kaž ta zdźěli, bě 56lětna žona bydlenske durje zawrěła, kluč pak wotnutřka tčacy wostajiła, na čož wołaše zamkarja. Monter, kiž hakle połdra hodźiny pozdźišo přijědźe, wšak trje­baše dlěje hač dwě hodźinje, zo by durje wotamknył. A za to měješe jemu žona 660 eurow nablaku z ec-kartku zapłaćić. Z wašnjom by najwjace 200 eurow było.

To a tamne (06.02.18)

wutora, 06. februara 2018 spisane wot:

Hromady sněha na třěše měješe dalokobus ze Šwedskeje, jako bě w Šwicarskej po puću. Policija je jězdźidło na awtodróze zapadnje Züricha zadźeržała. Sněh bě so na 40 centimetrow nakopił a wažeše něhdźe 1 600 kilogramow. „Hdyž so tele hromady pušća, móže za nim jěducy wobchad chětro wohroženy być“, zdźěli rěčnik policije. Šofer dyrbješe sněh wotmjesć a nimo toho někotre sta eurow pokuty­ zapłaćić.

Šoferojo awtow w Berlinje dyrbjachu loni­ přerěznje 44 hodźin na zatykanych dróhach čakać. To wuchadźa z najnowšeho přepytowanja instituta za zběranje wobchadnych datow Inrix. Lěto do toho běchu hišće přerěznje 38 hodźin zličili. „Stolica zatykanych dróhow“ bě loni Mnichow z 51 hodźinami čakanja. Kaž analyza wujewja, wuskutkowachu kopjenja wobchada kóšty dohromady něhdźe 6,9 miliardow eurow.

nawěšk

nowostki LND