To a tamne (05.10.18)

pjatk, 05. oktobera 2018 spisane wot:

Tysacy litrow mórskeje wody chcyše Němc w Italskej pokradnyć, zo móhł z njej doma akwarije pjelnić. 48lětny bě minjeny tydźeń z nakładnym awtom do sewjeroitalskeho Triesta přijěł, na kotrymž měješe 24 sudobjow. Dohromady 24 000 litrow wody móžeš do nich pjelnić. Wobydler pak muža při klumpanju wobkedźbowaše a zawoła policiju. Ta pakostnikej přikaza, wodu zaso do morja pušćić. Nimo toho dyrbi 1 549 eurow pokuty płaćić. Muž jeničce rjekny, zo trjeba wodu za swój wobchod akwarijow.

Wosebje přećelny postrow napřećo policistam njeje 38lětnemu w Durinskej zajeće zalutował. Nawopak: Zastojnicy dohladachu so w Geraskej kupnicy postrowa dla muža, kiž zdawaše so jim znaty być. A kontrola wupokaza wunjese wěstotu, zo předležeše přećiwo 38lětnemu padustwa dla wukaz zajeća. Dowjezechu jeho k sudnikej a na to do jastwa.

To a tamne (04.10.18)

štwórtk, 04. oktobera 2018 spisane wot:

Nukla bjez jězdźenki našła je sobujěduca w regionalnym ćahu mjez Düsseldorfom a Essenom. Zwěrjo z dosć morchejemi zastarane sedźeše samelutke w transportnej boksy. „Dokelž njemóžachmy identitu nukla zwěsćić, njetrjeba wón tež z chłostanjom pobrachowaceje jězdźenki dla ličić“, rěka w zdźělence policije.

Wulke myše su tysacy knihow Stuttgartskeje uniwersitneje biblioteki zničili. Nimale 8 000 zwjazkow je potrjechenych, a nastata škoda wučinja dohromady něhdźe 200 000 eurow. Po 200 metrach stejachu knihi na polcach, hdźež běchu so wulke myše zaměstnili. Te wšak su tam jeno swoje hromadki zawostajili a so přez kanalizaciju zaso zminyli. Po tym zo su zamołwići problem zwěsćili a wotpowědnje reagowali, je do biblioteki nětko zaso měr zaćahnył. Jeli tomu dale tak wostanje, drje njetrjebaja dom generalnje saněrować.

To a tamne (02.10.18)

wutora, 02. oktobera 2018 spisane wot:

Wosebity jězbny stoł z legoklockow ma nopawa w Baltimorskim zwěrjencu. Tón bě zwěrjo po operaciji bróńčki (Panzer) dóstało, tak zo móže so nětko zaso bjez ćežow pohibować. Legoklocki móže team zwěrjenca lochko přetwarić a tak na změny reagować. Nopawu chcedźa po wuhojenju zaso do přirody wusadźić. Mjeztym njetrjeba wona žane medikamenty wjace a je hižo zaso jara aktiwna.

Dale a wjetšich pódlanskich wuskutkow dweju potencneju pilow dla je muž policiju zawołał. Wón so njesměrnje poćeše a měješe wulke ćeže z wobtokom, tak zo so boješe z awtom na A 8 w Badensko-Württembergskej k swojej přećelce dale jěć. Zawołana wuchowanska słužba pak móžeše 30lětneho po přepytowanju zaso pušćić. Kak je so nóc pola přećelki skónčiła, wšak policija a wuchowanska słužba njezhoništej.

To a tamne (01.10.18)

póndźela, 01. oktobera 2018 spisane wot:

Dokelž nochcyše na žadyn pad swój lět skomdźić, chwataše pasažěr w Dublinje za lětadłom a chcyše mašinu zastajić. Policija jeho tuž zaja. Kaž irski sćelak RTÉ zdźěli, chcyše 23lětny do Amsterdama lećeć, bě pak ze žonu přepozdźe na lětanišću. Po diskusiji z přistajenymi klepaše wón wo wokno lětanišća a chcyše durje namócnje přełamać, při čimž so magnetiski zamk wobškodźi. Randalěrar měješe so nětko před sudnistwom zamołwić. Njeje pak so ani kuska za swoje jednanje kał, ale pokaza čakacym žurnalistam před sudnistwom swój nahi zadk.

Luksuriozny bus, kotryž wužiwachu popularni hudźbnicy kaž David Guetta jako swój domicil za čas tury, stej mandźelskaj w britiskim Manchesteru kupiłoj a přetwariłoj. Wotnětka smědźa bjezdomni w nim bydlić. W tym času dóstanu woni podpěru při pytanju bydlenja.

To a tamne (28.09.18)

pjatk, 28. septembera 2018 spisane wot:

Swoju móšnju z falšnymi pjenjezami a wupokazom zhubił je 22lětny Awstričan. Kaž policija z Eisenstadta zawčera­wšim zdźěli, njeje sprawny namakar ničo z móšnje wzał, ale ju połnje pjelnjenu z třomi bankowkami 50 eurow wotedał. Wopačne pjenjezy běchu lochce jako tajke spóznajomne. Kaž 22lětny zastojnikam rjekny je bankowki w darkneće skazał,­ zo móhł sej drogi kupić.

Chětro zadźiwane reagowachu ludźo nětko w Hannoveru, jako wuhladachu tołsteho muža, kiž na pjeć městnach w awće sedźeše. Kaž so wukopa, jednaše so wo dźiwadźelnika w kostimje, kiž aw­to­ wodźeše. Muž steješe w srjedźišću wabjenskeho filma předewzaća, kotrež je w Hannoveru busam, taksijam a tramwajkam konkurenca. Powěsć njewšědneje wabjenskeje akcije rěka: „Ja trjebam pjeć městnow. Ty nic. Jědźće tola hromadźe.“

To a tamne (27.09.18)

štwórtk, 27. septembera 2018 spisane wot:

Swoje mjeno z něčim pozitiwnym zwjazować, a nic z grawoćiwym hurikanom, kotryž bě srjedź septembra na juhowuchodźe USA howrił, chcyše štyrilětna holčka Florence. Tuž chodźeše wot domu k domej a zběraše za wopory hurikana dary. Powěsć w socialnej syći Facebook z wobrazom holčki je k tomu wjedła, zo su ludźo po cyłym kraju tójšto darow nahromadźili. Tuž móže so Florence nětko nad jeje mjenom zawěsće zaso wjeselić.

Njewšědny zwěrjeći wopyt mějachu zapósłancy Europskeho parlamenta w Brüsselu. Tam bě pony z mjenom Dinky do domu přišoł, kiž přewodźeše slepu awtorku Monique Van den Abbeel. Z wopytom pokazachu na to, zo hodźa so nimo psow tež druhe zwěrjata, kiž zamóža ludźom pomhać. Tuž měli přichodnje wšitke ­zwěrjata přistup k zjawnym twarjenjam měć, štož měli zakonsce zrjadować.

To a tamne (26.09.18)

srjeda, 26. septembera 2018 spisane wot:

Swojeho psyka njepušćił a z nim po nahłej skłoninje při bayerskim jězorje Königssee 40 metrow dele padnył je 46lětny muž z Berlina. 37lětna přewodnica chcyše mužej pomhać, so tohorunja suny a wosta tčacy. Hórska straža dyrbješe znjezboženeju wuchować a kaž wčera zdźěli, njejstej so žona a psyk zraniłoj. Muž pak dyrbješe do chorownje.

W hódnoće něhdźe jedyn milion eurow ma so 3. oktobra bleša whiskyja přesadźować, zdźěli předwčerawšim znaty awkciski dom Bonham. Cyłkownje dwanaće blešow 60 lět zrawjeneho whiskyja palernje Marcellan na sewjeru Šotiskeje scyła eksistuje. Etiket je italski wuměłc Valerio Adami naćisnył. Jedna bleša whiskyja bu lětsa hižo w Hongkongu ­za něhdźe 910 000 eurow přesadźena. Kelko z dwanaće blešow scyła hišće eksistuje, je njejasne.

To a tamne (25.09.18)

wutora, 25. septembera 2018 spisane wot:

Wjace hač 150 mótkow ma mjeztym sakski ministerski prezident Michael Kretschmer (CDU). Zawčerawšim je jich w Lipšćanskim zwěrjencu zetkał, hdźež witaše mjez druhim tež 13 nowych trójnikow a kwartet dweju holcow a hólcow Helen, Merle, Boas a Pepe. Wot lěta 1995 je sakski ministerski prezident awtomatisce čestny kmótr za trójniki hač do 14. žiwjenskeho lěta.

Rozhóršeny je tele dny britiski wonkowny minister Jeremy Hunt, kiž postorkuje so dla powěsće prezidenta Europskeje rady Donalda Tuska na internetnej plat­formje Instagram. Tam bě Tusk wobraz premierministerki Wulkeje Britaniskeje Theresy May před tykancowym bufetom wozjewił a k tomu napisał: Chceće tykanc? Bohužel pak njejsu hižo žanych wišnjow. Powěsć měrješe so přećiwo Wulkej Britaniskej, kotrejž wumjetuja sej hladajo na Brexit jenož to najlěpše wu­běrać.

To a tamne (24.09.18)

póndźela, 24. septembera 2018 spisane wot:

Zo budźetej historisce widźanej poćežowanej mjenje Hitler a Lenin we woprawdźitym žiwjenju raz mjezsobu wojować, bě skerje njemóžne. Přiwšěm stejitaj sej Hitler Alba a Lenin Rodriguez napřemo a požadataj so wo městno wjesnjanosty peruanskeje wsy Yungar. Zdobom zdźěli Hitler Alba, zo nima žanych sympatijow za němskeho diktatora. Staršej pak historiski kontekst mjena njeznaještaj.

Štóž zamóže na wodźe derje balansować, móhł so tež do wužłobjeneho kirbsa sydnyć, po wodźiznach čołmikować a tak za wosebite mišterstwa zwučować. Cyłkownje 35 žonow a runje tak wjele muži su so mjenujcy zawčerawšim na 15. němskich mišterstwach w Ludwigsburgu zetkali a so wubědźowali. Zarjadowanje je dźěl programa po cyłym swěće najwjetšeje kirbsoweje wustajeńcy z něhdźe 450 000 eksemplarami.

To a tamne (21.09.18)

pjatk, 21. septembera 2018 spisane wot:

Dźesać młodych bykow je sej zahrodu jednoswójbneho domu w Friziskej za nowu pastwu wuzwoliło. Wobydler we Va­relu nochcyše wčera rano swojimaj wočomaj wěrić, jako byki na zahrodźe ležo ­wuhlada. Wone běchu w nocy z pastwy ćeknyli a susodne zahrody přečušlili. Alarmowany wobsedźer je skoćata pozdźišo z připowěšakom zaso na poprawnu pastwu dowjezł. Jich zawostajenstwa na zahrodźe dyrbješe wězo tež zrumować.

Rozestajenje mjez sydomlětnym a jeho maćerju porjada w dźěćacej stwě dla je w badensko-württembergskim Weilu zasadźenje policije wuskutkowało. Mać bě hólčeca namołwjała, skónčnje stwu zrumować. Tón pak to nochcyše a so z maćerju wurěčowaše, při čimž wospjet wótře wo pomoc wołaše. Susod alarmowaše zastojnikow, kotřiž wobeju prošachu wěcku ­woměrje rozrisać.

nawěšk

nowostki LND