To a tamne (15.02.24)

štwórtk, 15. februara 2024 spisane wot:

Fan Harryja Pottera je w Jendźelskej bjez wědźenja wobšěrne zasadźenje policije wuwabił. Wjacori zastojnicy chwatachu we wsy Enderby blisko Leicestera k hotelej, po tym zo běchu tam wosoby pječa muža „z wulkim nožom“ wuhladali. Policisća móžachu pad spěšnje rozrisać. Po naprašowanjach zwěsćichu, zo jednaše so wo fana kuzłarja Harryja Pottera z kuzłarskim kijom. „Na zbožo njeje wón nikomu škodźił a tež Voldemort njebě nihdźe widźeć“, policija na Facebooku wozjewi.

Jejko z romskeho časa, kotrež bu před někotrymi lětami w jendźelskim měsće Aylesbury namakane, je hišće židke. Fachowcy wuchadźeja z toho, zo jedna so wo jejko kokoše. Wědomostnicy maja namakanku za wulku sensaciju.

To a tamne (14.02.24)

srjeda, 14. februara 2024 spisane wot:

Njeznaty je we Weimarje dźěl płota pokradnył a so z cedlku zamołwił. Kaž policajska inspekcija zawčerawšim rozprawješe, je so pozdatny skućićel w nocy na njedźelu na ležownosć dóstał a při tym wobhrodźenje wobškodźił. Po tym je dźěl płota pokradnył. Wočiwidnje nic bjez hubjeneho swědomja.

Štyri metrow dołheho mortweho pytona je pasant w Berlinskim parku Hasenheide namakał. Pasant je sobudźěłaćerjow zamołwiteho zarjada za zelenišća informował, kotřiž su hada zawčerawšim pod štomom namakali. Nětko chce zarjad pad wuslědźić a prosy ludnosć wo pomoc.

To a tamne (13.02.24)

wutora, 13. februara 2024 spisane wot:

W sewjernej Posaarskej wčera ćeknjeny kenguru je zaso pola swojeje wobsedźerki we Wadernje. Kaž policija dźensa zdźěli, je wona zwěrjo wuspěšnje přiwabiła. 40lětna šoferka awta bě wčera kenguru na dróze wobkedźbowała. Dokelž je žona z toho wuchadźała, zo jej to nichtó njewěri, wona zwěrjo jako dopokaz fotografowaše.

Awto 27lětneho je so w Drježdźanskim měšćanskim dźělu Laubegast do Łobja sunyło. Kaž wohnjowa wobora wčera zdźěli, je šofer zawčerawšim wječor swoje awto při přibrjohu wotstajił a so do picerije podał. Krótko po tym přidružichu so pasanća do hosćenca a powědachu, zo su awto we Łobju wuhladali. 27lětny je jenož hišće přihladował, kak so awto podnuri. Zawołana wohnjowa wobora je bjez wuspěcha za jězdźidłom we Łobju pytała.

To a tamne (12.02.24)

póndźela, 12. februara 2024 spisane wot:

Z metalowym gratom je Mnichowska wohnjowa wobora 8lětnu holcu z poschodoweho łoža wuswobodźiła. Kaž wohnjowa wobora minjeny štwórtk zdźěli, je sej dźěćo z Berlina, kotrež ze swójbu w Mnichowskim hotelu za čas dowola přebywaše, nohu mjez rěblom a łožowym kašćikom zatłusnyło. Sama njemóžeše so wuswobodźić, tak zo bě swójba wohnjowu woboru zazwoniła. Wohnjowi wobornicy móžachu holčce na zbožo pomhać.

Něhdźe 30 čłonow towarstwa „Rostockskich mórskich psow“ su sej zawčera­wšim w kostimach do 3,8 stopnjow zymneje wody Baltiskeho morja zalězli. Towarstwo póstniske kupanje hižo dlěje hač 35 lět organizuje. Kupanska sezona „Rostockskich mórskich psow“ dźe wot septembra do apryla. Tež na Usedomje běchu so mnozy zymscy płuwarjo w pisanych kostimach na tradicionalnym spektaklu lodoweho kupanja wobdźělili. Zarjadowanje tam měješe lětsa swój 10. jubilej.

To a tamne (09.02.24)

pjatk, 09. februara 2024 spisane wot:

Hołbika su podhlada spionaže dla wosom měsacow dołho w Indiskej dźerželi. Nětko je wón zaso swobodny, rozprawjeja indiske medije. Policija je hołbika zašłu meju blisko finančneho centruma Mumbai popadnyła. Na křidłach bě policija pječa pismowe znamješka namakała a tute za chinske měła. Přepytowanja policije wudachu, zo njejedna so wo chinskeho ale taiwanskeho hołbja. Dokelž su hołbja zabyli, dyrbješe měsacy dołho w jatbje wostać.

Dźiwadźelnik Ryan Gosling, kotryž hraješe we woblubowanym filmje Barbie rólu Kena je so tež wot telewizijneho formata Bachelorette inspirěrować dał. Dokelž so w tutych formatach mužojo často na stereotypy a jednotliwe charakterne kajkosće redukuja, je sebi Gosling, kotryž tež hewak mnoho reality-tv hlada, tójšto wot nich wothladał.

To a tamne (08.02.24)

štwórtk, 08. februara 2024 spisane wot:
Braniborske města chcedźa so podróšenja při parkowanju za ćežke awta wšelakich přičin dla wzdać – hinak hač w Parisu. Z naprašowanja mjez wjacorymi městami wuchadźa, zo tuchwilu žane plany kaž w Parisu njejsu. Při wobydlerskim rozsudźe w francoskej stolicy je minjenu njedźelu wjetšina wolacych planam města k potrojenju parkowych tarifow za ćežke awta, tak mjenowane SUV, přizwoliła. Na hodźinu parkowanja w centrumje maja šoferojo za ćežke SUV wot sep­tembra na hodźinu 18 eurow zapłaćić. Płaćizna za šěsć hodźinow wučinja tam samo 225 eurow. Předewšěm wopytowarjo města dyrbja tam wjele pjenjez za parkowanje płaćić. Wobydlerjo, rjemjeslnicy a hladanske słužby nimaja wot toho potrjecheni być.

To a tamne (07.02.24)

srjeda, 07. februara 2024 spisane wot:

Strach před wysokosću je za tele dźěłowe městno špatna kajkosć. Tola wěda wo łódźnistwje a watowym morju stej porno tomu lěpšina. Za swoju Staru swětłownju pyta mała wuchodofriziska kupa Wangerooge noweho stražnika abo stražnicu. Požadarjo za dźěło měli po wupisanju dźěłoweho městna gmejny nimo toho ćělnje fit być. Dyrbiš znajmjeńša dwójce wob dźeń 161 schodźenkow přewinyć móc. 39 metrow wysoka čerwjeno-běło-čorna swětłownja je jedne z charakteristiskich znamjenjow znateje kupy w Sewjernym morju.

Do finala Stuttgartskeje olympiady kucharjow su wčera tak mjenowane Live-Carver swoje zamóžnosće dopokazali a z nožom wuměłske figury ze zeleniny a sada, twarožka, cokora a šokolody rězbarili. W běhu třoch hodźin dyrbjachu pjeć wšelakich twórbow pokazkow zhotowić.

To a tamne (06.02.24)

wutora, 06. februara 2024 spisane wot:

Na žeńtwu hotuje so 70lětny Dieter ­Bohlen ze swojej přećelku Carinu, z kotrejž je mjeztym 18 lět hromadźe žiwy. Tole je Bohlen nowinje Bild přeradźił. Pječa je datum hižo postajeny. 30 lět młódša Carina pak sej žada, zo Bohlen ju porjadnje wo mandźelstwo prosy. Bohlen sam je kedźbliwy: „To by třeće mandźelstwo było, te ma hač do kónca žiwjenja dźeržeć.“ Pola swojeje přećelki pak je sej Bohlen tónkróć dospołnje wěsty.

Dwanaće metrow do hłubiny padnył je štyrilětny hólc w sewjerorynsko-westfalskim Lünenje – a je přežiwił. Hólc bě wčera popołdnju w štwórtym poschodźe wjaceswójbneho domu zawrjene wokno wočinił, z woknom zalězł a do hłubiny zrazył. Helikopter dowjeze hólca do chorownje, hdźež jeho operowachu. Policija wuchadźa z „tragiskeho njezboža“. Pokazki na njeskutk nimaja.

To a tamne (05.02.24)

póndźela, 05. februara 2024 spisane wot:

Wjace hač 3 000 lubowarjow motorskich je so minjeny kónc tydźenja při njepřijomnym wjedrje ze swojimi mašinami w Bayerskim lěsu na „zetkanje elefantow“ zhromadźiło. Wjacore dny trajacy spektakl zarjaduje cyłoněmski zwjazk motorskich. Miholenje postara so wo chětro błóćane wobstejnosće. Bayerski hospodarski minister Hubert Aiwanger přińdźe w gumijowych škórnjach. Zasadna ideja „zetkanja elefantow“ je dobra zhromadnosć při lěhwowym wohenju bjez piwoweho stana a wulkeho swjedźenja.

Njebojazni kuparjo w lódzymnej wodźe su so sobotu na brjoze Baltiskeho morja we Warnemünde zešli. Mužojo a žony přińdźechu zdźěla w pisanych kostimach. Morjo bě pjeć stopnjow zymne. Tole pak něhdźe 50 wobdźělnikow lodoweho kupanja njewottraši. Tysacy wćipnych su spektaklej přihladowali.

To a tamne (02.02.24)

pjatk, 02. februara 2024 spisane wot:

Ćeknjenu wopicu zaso popadnyli su sobudźěłaćerjo zwěrjenca w Šotiskej po dny trajacym pytanju. Makak bě so njedźelu ze zwěrjenca zminył. Wobydlerjo běchu wobkedźbowali, zo so wopica rady w ptačich chěžkach z picu zastaruje. Pomocnicy tam na nju čakachu a zwěrjo z kłokom pohłušichu. Mjeztym je makak zaso w zwěrjencu.

Z winom na nadróžnych blokadach spytaja sej francoscy burja mjez šoferami wosobowych awtow sympatije zdobyć. Telewizijne sćelaki rozprawjeja wo přećelnej atmosferje a šoferach, kotřiž so ratarjam dźakuja a jich w stawku pohonjuja. W interneće pak jewja so tež kritiske hłosy: „Kraj pičkow! Žadyn dźiw, zo mamy najwyšu kwotu alkoholikarjow po wšěm swěće“, tam pisaja. Druzy so hórša, zo njejsu wobrazy žane dobre wabjenje za dostojnych francoskich winicarjow.

Serbska debata

nowostki LND