To a tamne (16.08.22)
Předrasćeny jako policist je młody muž při hłownym dwórnišću Hagen wustupował. Policisća pak su 21lětneho w nocy na sobotu lepili, jako měješe wón dźěle policajskeje uniformy zwoblěkane, policija wčera zdźěli. Tak chcyše młody muž zaćišć zbudźić, zo je zastojnik. Jako wopodstatnjenje mjenowaše wón produkciju krótkich widejow za swój account w socialnych medijach. Při tym by so wosoby naprašował. Nětko pak je policija přećiwo 21lětnemu jednanje znjewužiwanja powołanskich pomjenowanjow a drasty dla zahajiła.
W Čěskej je wubědźowanski wóz formule 1 na awtodróze jěł a so wo kedźbnosć postarał. Policija je přepytowanja k pozdatnje ilegalnej jězbje zahajiła, zdźěli wčera rěčnica přisłušneho policajskeho prezidija w Praze. Zastojnicy zawěsćichu wšitke wideja podawka, kotrež buchu dotal w socialnych medijach wozjewjenje.
To a tamne (15.08.22)
Zhubjeneho barika je policija w Mannheimje z awtodróhi wuchowała a swojemu wobsedźerjej wróćiła. Šofer motorskeho bě dar za połdralětnu dźowku spřećeleneje swójby při jězbje po zwjazkowej awtodróze A 6 zhubił, policija minjeny pjatk zdźěli. Zo njeby so barikej ničo stało, su zastojnicy wobchad skrótka zadźerželi a jeho z jězdneje wuchowali. Hač na někotre blaki njeje so zwěrjatku ničo stało. Jako dopomnjenku na swoje njewšědne wuchowanje ma barik nětko wopon policije na bančiku připinjeny.
Po třoch měsacach smědźa so kóčki w badensko-württembergskim Walldorfje zaso swobodnje pohibować. Dwě njedźeli zašo hač předwidźane je so dźensa jónkrótny lockdown za kóčki zakónčił. Młodźata wot wotemrěća wohroženych chocholikow (Haubenlerche) su dźakowano wjedrowemu połoženju tak daloko wuwite, zo hižo riziko njewobsteji, zo móhli je kóčki napadnyć.
To a tamne (12.08.22)
Jako štom předrasćeny muž je w bayerskim Ingolstadće kolesowarku wustróžił, a to tak jara, zo je 45lětna padnyła a so zraniła. Žona bě ze swojim mandźelskim w měšćanskim parku po puću, jako so z plastowymi łopjenami zdrasćeny muž naraz pokaza. Wón drje jej hišće pomoc poskići, potom pak so naraz zminy. Policija pyta nětko za swědkami tuteje kuriozneje situacije.
Dwaj měsacaj po zajeću Jasona Alexanera před domom spěwarki Britney Spears su něhdyšeho mandźelskeho spěwarki ranjenja domjaceho měra a ranjenja ćěła dla wobwinowali. Napřećo statnemu rěčnistwu je Alexander wumjetowanja přiznał, zo by so procesej wuwinył. Jeho su mjeztym pušćili. Wón dyrbi pak wotstawk sto metrow k Spears dodźeržeć. Spěwarka bě so 2004 na swojeho přećela wudała, mandźelstwo dźeržeše 55 hodźinow.
To a tamne (11.08.22)
Z hamorom su policisća w Hövelhofje pola Paderborna dwaj měsacaj stare dźěćo ze zamknjeneho awta wuswobodźili. 33lětna mać bě dźěćo mylnje zamknyła a na klučiki w awće zabyła. Starosćo so wo swoje dźěćo wołaše žona nuzowe čisło policije. Jedyn z policistow z nuzowym hamorom wokno šofera kedźbliwje rozbi, zo njeby dźěćo zranił. Přiwšěm wołachu tež wuchowansku słužbu.
200 eurow pokuty napołožić chcedźa w chorwatskim dowolowym měsće Baška na juhu kupy Krk kóždemu turistej, kiž sej z pomocu trjenja lěhadło při brjoze morja „rezerwuje“. Tole su zamołwići za turizm města připowědźili. Dotal njeje jasne, kak chcedźa zakaz přesadźić, wšako dyrbiš ludźi při wupołoženju trjenja lepić. Na kupje Teneriffa sćelu wjacori hotelownicy swojich sobudźěłaćerjow, kotřiž trjenja při poolu prosće zhromadźa.
To a tamne (10.08.22)
Spěwacy honač je w durinskim Friedrichroda zasadźenje policije zawinował. 51lětny bě so wčera rano pola policije přizjewił a rjekł, zo słyši we wobłuku lěsneje kupjele dźěćo za maćerju wołać. Na městnje so potom wukopa, zo njepochadźeja zwuki wot žałosćaceho dźěsća, ale wot honača. „Muž so pola zastojnikow za misnjenje a za zawinowanje policajskeho zasadźenja zamołwi, policisća reagowachu z humorom“, policija piše.
Wobchadnej njezboži a 11 000 eurow škody je kuna na awtodróze A 17 zawinowała. Zwěrjo běžeše póndźelu wječor 53lětnemu šoferej pola wotjězda Gorbitz před wosobowe awto. Šofer na to raznje zaborzdźi, zhubi kontrolu nad awtom a zrazy do nabóčneho wobhrodźenja. Krótko po tym zrazy 44lětny na samsnym městnje do kuny. Zwěrjo zražku njepřežiwi. Nichtó so njezrani.
To a tamne (09.08.22)
Padušnicu nakupowanskich wozyčkow su w braniborskim Nowym měsće nad rěku Dosse lepili. Sobudźěłaćerjam kupnicy bě 71lětna wospjet napadnyła, dokelž přińdźe prawidłownje nakupować a so po tym z wozyčkom wotsali. Přistajeny jej sćěhowaše a zwěsći, zo steješe na kilometer zdalenym statoku, hdźež žona bydleše, hižo 13 wozyčkow. Policija je sej žonu mjeztym na stražu skazała.
Swojej maćeri w Mnichowje žiwjenje wuchował je syn – w Londonje. Warnowanska připrawa za kur bě jeho na mobilnym telefonje alarmowała, mjeztym zo mać w Mnichowje spaše a alarm njesłyšeše. Muž informowaše policiju, kotraž kolegow w Mnichowje a tak wohnjowu woboru wołaše. Žona bě na jědź na kachlach zabyła a sej wusnyła. Jědź so zapali a alarmowu připrawu zbudźi. Wohnjowa wobora móžeše žonu wuswobodźić.
To a tamne (08.08.22)
Dospołnje přećeženej nakładnej awće je policija na awtodróze A 2 pola Hamma našła. Kaž rěčnik policije zdźěli, transportowaštej awće šokolodu. Jedyn wóz wažeše dźesać tonow, tamny wjace hač dwanaće, byrnjež byštej najwjace 7,5 tonow wozyć směłoj. Transportna firma dyrbješe třeće awto organizować a šokolodu překładować. Předewzaću hrozy pjenježna pokuta 300 eurow.
Jenož krótke bě wjeselo 14lětneho, po tym zo bě na hermanku w delnjofrankskim Marktheidenfeldźe pistolu-hrajku dobył. Policija jemu hrajku wotewza. Do toho bě sobudźěłaćer hermanka pachoła namołwjał, bróń hakle doma wupakować. 14lětny pak tole ignorowaše a z brónju, kotraž wupada kaž prawa pistola, po swjedźenišću běhaše. Wón smě sej bróń na policajskej straži wotewzać. Předawarjow proša, tajke hrajki wjace njepředawać.
To a tamne (05.08.22)
Mylnje nuzowe borzdźidło ćahnył je dowolnikar z Bayerskeje w powjaznicy w Awstriskej a je tak wjetšu wuchowansku akciju zawinował. 50lětny z Nürnbergskeje kónčiny chcyše so při jězbje w powjaznicy Dachstein-Krippenstein njedaloko Obertrauna kruće dźeržeć. Při tym hrabny pak nuzowe borzdźidło. Tole njezawinowaše jenož hnydomny stop kabiny, ale tež techniski defekt. 38 pasažěrow dyrbjachu z powjazami wuchować.
Po šěsć tydźenjach su zhubjeneho muža z Němskeje na kupje Mallorca namakali. Policisća 61lětneho wuhladachu, kiž ćerpi na demencu. Mandźelska bywšeho policista bě doma w Sewjerorynsko-Westfalskej lisćinu muža namakała. Na njej bě wón napisał, što chcył w swojim žiwjenju hišće zdonkonjeć, mjez druhim jězbu na Mallorcu. Bjez kóždeho słowa bě muž do lětadła zalězł a wotlećał.
To a tamne (04.08.22)
Dźesatki hudźbnikow su dźensa awtodróhowe twarnišćo njedaloko Treptowskeho parka w Berlinje wobsadźili. Po informacijach iniciatiwy „zynki žiwjenja“ měri so akcija přećiwo dalšemu wutwarej A 100. Dźěła buchu přetorhnjene. Hudźbnicy zahudźichu twarskim dźěłaćerjam, kotřiž jim připosłuchachu. Policija rěčeše wo „spontanej akciji“.
Drogi a mobilne telefony je katolski dušepastyr do jastwa w sewjerorynsko-westfalskim Heinsbergu přinjesć chcył – schowane w denerach. Duchowny měješe cyłkownje 13 denerow při sebi, kotrež běchu za skupinske zarjadowanje w jastwje myslene, jako so při straži přizjewi. W pjeć denerach namakachu zastojnicy 153 gramow hašiša, wjacore telefony a kable za nabiwanje. Aachenske biskopstwo je dušepastyrja mjeztym wot jeho nadawkow wuwjazało.
To a tamne (03.08.22)
Mylnje po schodźe wosoboweho tunla dele jěł je 86lětny šofer wosoboweho awta w jednym z Mnichowskich dwórnišćow. Poprawom chcyše muž do parkowanskeho domu. Na zbožo njebě za čas njezboža nichtó na schodźe. Wohnjowi wobornicy awto muža wućahnychu. Starc chcyše na to dale jěć, štož jemu policija zakaza, dokelž njeběchu škody na awće spočatnje znate. Nětko dyrbi muž na test, hač je hišće kmany awto wodźić.
Na hłowje zrosćeneju siameziskeju dwójnikow su w jednej z brazilskich chorownjow wuspěšnje dźělili. Po nimale štyrjoch lětach a dźewjeć operacijach je so lěkarjam naročna kročel skónčnje poradźiła. „Smy jara spokojom z wuslědkom, dokelž njeje nichtó wjace do wuspěcha operacije wěrił“, rjekny rěčnik mozoweho centruma w Rio de Janeiru. „Smy stajnje do toho wěrili, zo mamy hišće šansu
