To a tamne (01.03.22)
Wjace hač štyri promile alkohola měješe wodźer nakładneho awta w kreji, jako na awtodróze A 2 pola Ziesara njedaloko Podstupima znjezboži a so zrani. Šofer zhubi kontrolu, jako chcyše k tankowni. Najprjedy šmórny so jeho Lkw pobóčneho wobhrodźenja. Na to zrazy do dalšeju nakładneju awtow a so powróći. Po tym zo su pomocnicy sylnu „chorhojčku“ zwěsćili, přewjedźe policija test alkohola.
Něhdźe 100 000 eurow škody na železniskim mosće načinił je šofer nakładneho awta w Hennigsdorfje, dokelž njebě kran swojeho awta porjadnje zrumował. Móst njeje hižo wužiwajomny. Po prěnich dopóznaćach bě 61lětny šofer do njezboža dwaj kontejneraj nakładował. Po tym njeje kran po předpisach zaso do zakładneje pozicije přinjesł, ale wotpołoži jón na kontejneromaj. Jako chcyše pod mostom jěć, dóńdźe k zražce.
To a tamne (28.02.22)
Na powjazu 30 metrow wysoko je němski artist Alexander Schulz před palastom Red Fort w indiskej stolicy New Delhiju běžał. Bě to zarjadowanje składnostnje 75. róčnicy njewotwisnosće Indiskeje. Schulz steji ze swojimi rekordami hižo w Guinnessowej knize rekordow. Před lětomaj bě wón nad aktiwnym wulkanom w južnym Pacifiku kročił. Lěto na to přeprěči Schulz na 1,7 kilometrow dołhim powjazu hłubinu – a to 800 metrow wysoko ze zawjazanymaj wočomaj.
Kozoła na zadnjej ławce swojeho awta měještaj policistaj w Durinskej sedźo. Do toho běchu při zasadźenju objekt přepytali. Jako swědk bě tež wobsedźer kozoła na městnje. Tón zastojnikow hnydom warnowaše, zo „kozoł rady z awtom jědźe“. A hižo skoči tón do woza, zo by sobu jěł. Přeće pak jemu policistaj njespjelništaj, kozoł dyrbješe awto wopušćić.
To a tamne (25.02.22)
Psa na lisćinje čłonow su francoscy konserwatiwni republikanojo při wólbach swojeho kandidata za prezidentske wólby 10. apryla stejo měli. Jedyn z čłonow bě w korčmje mysličku zrodźił a swojeho psa Clovisa pod swojej adresu napisał a samo čłonski přinošk zapłaćił. Nowinarjam bě napadnyło, zo maja republikanojo třoch zemrětych a psa na lisćinje. Čłon na to swój „žort“ přizna.
Do jamy błóta padnyła je žona, jako so w lěsu w delnjobayerskim Egingu wuchodźowaše, a njemóžeše so hižo sama wuswobodźić. Wohnjowi wobornicy su 60lětnu skónčnje z dźěry njedaloko Passauwa wućahnyli. Cyłu hodźinu dyrbješe žona w štyri kwadratne metry wulkej dźěrje wutrać a wołaše wo pomoc. Přemjerznjenu dowjezechu ju do chorownje. Dźěra bě drje přez dešć minjenych dnjow nastała.
To a tamne (24.02.22)
Kaž bychu sej to dorěčeli: Předwčerawšim, 22. februara 2022, je we woběmaj uniwersitnymaj chorownjomaj Sakskeje dokładnje 22 dźěći na swět přišło, jědnaće w Lipšćanskej uniwersitnej klinice a jědnaće w Drježdźanskej. Tak bě druha palencowa ličba woblubowaniša hač prěnja 2.2.22. Tón dźeń bě so w Lipšćanskej klince pjeć ćěšenkow narodźiło, w Drježdźanskej wosom.
Wikowarja falšowanych šćěpjenskich wupokazow je policija w Berlinje lepiła. 19lětny bě z bydlenja swojeju staršeju w měšćanskim dźělu Kreuzberg z wopačnymi dokumentami wikował. Wón bě wupokazy z nalěpkami, lěkarskim kołkom a podpismom w interneće poskićał. Jako chcyše štyri tajke šćěpjenske wupokazy na Dieffenbachowej přepodać, jeho zastojnikaj zaještaj. W bydlenju namakaštaj na to kołki a nalěpki.
To a tamne (23.02.22)
Naročny projekt plahowanja je so w Južnej Africe radźił. Wón měješe zaměr, wutupjenu družinu quagga – měšeńcu konja a cebry – zaso wožiwić. Je to poddružina cebry bjez smuhow. Lěta 1883 wotemrěty quagga słušeše něhdy do typiskeho wobraza južnoafriskich stepow. Ze zaměrnym plahowanjom su wot lěta 1987 spytali družinu wožiwić. Mjeztym maja jich něhdźe 200 zwěrjatow.
Ludźi wobćežowace dźiwje swinjo je so na stanowanišću Boek nad jězorom Müritz wo zasadźenje policije postarało. Wone bě tak njemdre, zo dyrbješe swójba před nim ćeknyć. Wšitke pospyty, je z wołanjom, hałzami abo gestami wuhnać, zwrěšćichu. Tuž so zastojnicy rozsudźichu skoćo zatřělić. Po prěnich wutřělach ze słužbneje pistole zranjene dźiwje swinjo do rohodźe ćekny. Hajnik z psom dyrbješe na to za nim pytać.
To a tamne (22.02.22)
W paslach tčacy paduch je w Bielefeldźe policiju wołał. 19lětny bě so do lěkarskeje praksy zamknyć dał, zo by ju za pjenjezami přeslědźił. Přez balkony zalěze wón do dalšeje praksy, njemóžeše pak durje běrowa přewinyć. Na to so do prěnjeje praksy nawróći, zwrěšći pak při zamknjenych durjach. Po hodźinach so rozsudźi, nuzowe čisło wolić. Sudnik pósła jeho nablaku do jastwa, dokelž je w jědnaće dalšich tajkich padach podhladny.
Zawěru železniskeho přechoda přełamał je rentnar ze swojim awtom na Rujanach – a je so ze swojim wobškodźenym awtom zminył. Zastojnikomaj, kotrajž 86lětneho krótko po tym w porjedźerni awtow nańdźeštaj wón rozłoži, zo njebě zawěru na přechodźe widźał. Policija chce nětko pruwować dać, hač je starc scyła hišće kmany awto wodźić. Nimo toho dyrbi so zasahnjenja do wobchada dla zamołwić.
To a tamne (21.02.22)
Wohnjowych wobornikow jako třěchikryjerjow zasadźić chcyše muž w sewjerofriziskim Brookmerlandźe w Aurichskim wokrjesu. Do toho bě wón pomocnikow z nuzowym čisłom přiwołał. Woni zwěsćichu, zo bě wichor štyri třěšne cyhele wotnjesł. Wobsedźer sej wot nich žadaše třěchu sporjedźeć, štož wobornicy wotpokazachu. Nimo toho wón chcyše, zo křiwy štom na zahrodźe pušća, štož pak tohorunja wotpokazachu.
Ze samotwarjenym mopedom je muž w braniborskim Fürstenwaldźe kedźbnosć policije zbudźił. 29lětny měješe swojemu kolesu pomocny motor přitwarjeny a bě wočiwidnje spěšnišo hač 25 km/h po puću był. Nimo toho njeměješe zawěsćensku tafličku. Spodźiwneho zadźerženja muža dla přewjedźeny test na drogi bě pozitiwny na amfetaminy, a tak dyrbješe mopedist-kolesowar na test kreje.
To a tamne (18.02.22)
Po nasypje lećacu kruwu dale přez wuchodofrizisku krajinu pokazuje wobrazowa montaža, kotruž je policija wčera wozjewiła. Tónle wobraz dyrbješe ludźi před wohroženjemi orkana warnować, wosebje šoferow awtow, zo měli kedźbliwje jěć. Kaž policajska rěčnica mjeztym wozjewi, njetrjebaja so ludźo lětacych kruwow bojeć. Z montažu chcychu zastojnicy jeno sylnosć wichora na humorne wašnje wuzběhnyć.
Mini-swinko w bydlenju bě wčera tema na Hannoverskim sudnistwje. Přenajerka 35 kwadratnych metrow wulkeho bydlenja je přećiwo wotnajerjej skoržiła, dokelž sej tam hunčko bjez jeje dowolnosće dźeržeše. Hižo trójce je jemu wupowědźiła, 38lětny pak nochcyše dotal wućahnyć. Po krótkim jednanju je wón nětko tola zwólniwy ze swojim Bruceom bydlenje hač do kónca awgusta wopušćić.
To a tamne (17.02.22)
Mały pokazowak časnika na cyrkwinej wěži pokradnyli su njeznaći w porynskim Kranenburgu – a to 50 metrow wysoko. Paduši zalězechu na twarske róšty, kotrež su tam za ponowjenje cyrkwje myslene. Prawdźepodobnje zwrěšćichu při pospyće, tež wulki pokazowak wotšrubować a zawostajichu jón wobškodźeny. Po wšěm zdaću měrjachu so na metal pokazowaka katolskeje cyrkwje swj. Měrćina. Snano chcychu paduši tež jeno suweněr.
Přez sćěnu domskeho jěła je žona ze swojim awtom w sewjerorynsko-westfalskim Hagenje. Prawdźepodobnje bě wona kontrolu nad wodźidłom zhubiła. Jězdźidło přerazy płót zahrody, durje terasy a skónčnje sćěnu domu. Pomocnicy wućahnychu šoferku snadnje zranjenu z awta. Dom, kiž hrozy so sypnyć, dyrbješe Techniski pomocny skutk zawěsćić. Policija je test kreje 58lětneje wukazała.
To a tamne (16.02.22)
W swojim awće kruće spjacy muž je w Drježdźanach zasadźenje wohnjoweje wobory zawinił. Přećelce njebě so poradźiło jeho w awće wubudźić, kotrehož motor běžeše. Hakle jako přiwołani wobornicy wóz zhromadnje zatřasechu, muž wotući. Njezranjeny wón wulěze a poda so do swojeho bydlenja, hdźež móžeše woměrje dale drěmać.
Powětr z wobručow 150 awtow wotpušćili su wobswětoškitni aktiwisća minjeny tydźeń w Berlinje. Policija je mjeztym dweju podhladneju zwěsćiła. Potrjechene běchu předewšěm wulke a drohe SUVje. Skućićeljo běchu powětr z jedneje abo tež hnydom ze wšěch wobručow wotpušćili. W dwěmaj padomaj wobruče rozkałachu. Na wjacorych awtach zawostajichu cedlu „z wobswětopolitiskim poćahom“ abo z namołwu za „hnydomnej wobchadnej změnu“.
