To a tamne (14.06.21)
Mylnje wopačnu pincu wurumowało je předewzaće za přećahowanje we wjaceswójbnym domje w Plauenje. Wobydlerka domu so njemało stróži, jako wuhlada po wjacorych dnjach dospołnje wuprózdnjenu a wumjećenu pincu. Jewješe so podhlad, zo jedna so wo zaměnjenje. Rešerša policije wunjese, zo je předewzaće mylnje wobsydstwo 50lětneje sobu wzało, po tym zo bě bydlenje zemrěteje wobydlerki wurumowało.
Swojeho psa přećiwo paducham zakitowała je zmužita žona w Berlinje. Po informacijach policije běchu třo paduši spytali, žonje jeje staffordshire bullterriera w měšćanskim dźělu Tempelhofje wutorhnyć. Jedyn z paduchow bě psa majkał a sej žadał, zo žona powjaz pušći. Jako so wona spjećowaše, biješe ju do mjezwoča. Najebać to žona powjaz kruće dźeržeše, doniž so trójka njezminy.
To a tamne (11.06.21)
Štyrilětneho pakostnika su tele dny w kupnicy we Wittenberge lepili. Předawarki wobkedźbowachu, kak sej pachołk wšelake wěcy do zaka tyka. Zawołani policisća „rubiznu“ zawěsćichu a přepodachu hólčka staršimaj. Tam so wukopa, zo bě tón z pěstowarnje twochnył. Přećiwo staršimaj přepytuja nětko padustwa dla, přećiwo pěstowarni zranjenja dohladowanskeje winowatosće dla.
Na zetkanju ze znatej z interneta su 22lětneho w Hannoverje pozdatnje do měšćanskeho lěsa Eilenriede wabili a wurubili, kaž policija wčera zdźěli. Dwaj mužej staj 22lětneho při wječornym wuchodźowanju z nožom wohrozyłoj, jemu mjezwoči biłoj a pjenjezy preč wzałoj. Po wuprajenjach swědkow so žona a mužej na to spěšnje zminychu. Policija přepytuje ćežkeho rubježnistwa dla a skućićelow nětko pyta.
To a tamne (10.06.21)
Za hraćom chcyćiwa rjadniska sotra w Kaliforniskej je pječa wjele lět statysacy dolarow zekřiwiła, zo by sej na te wašnje wopyty kazina a dalše priwatne wudawki zaručiła. 79lětnu su nětko płokanja pjenjez a wobšudnistwa dla wobskoržili, kaž statne rěčnistwo w Los Angelesu informowaše. Klóšterska knježna je přiznała, zo bě sej wjace hač 835 000 dolarow do swójskeho zaka tykała.
Runje tak njehańbity kaž spektakularny kriminalny pad w Španiskej dopomina na legendarneho „stotnika z Köpenicka“: Pozdatneho serijoweho wulcečinjaka, kiž je rady spiona hrał, wjacorych ludźi za nós wodźił a so samo z medijowym starom stał, je Madridske krajne sudnistwo dźensa falšowanja dokumentow dla na lěto a dźewjeć měsacow do jastwa pósłało. Je to prěnja pokuta za 27lětneho, kiž pak ma hišće dalše jednanja na šiji.
To a tamne (09.06.21)
Jako sprawny namakar wopokaza so rjedźer na Hamburgskim hłownym dwórnišću, hdźež je 48lětnemu mužej z wuskosćow pomhał. Tón bě so cyle rozpjeršeny na wěstotnej straži na nastupišću zabyteho nachribjetnika z 1 000 euram, z klučom za bydlenje a z dokumentami dla přizjewił. Runje jako chcychu zastojnicy sobu pytać pomhać, zastupi rjedźer z nachribjetnikom. Wolóženy dźakowaše so jemu muž nablaku z namakanskim mytom 100 eurow.
Dźěra w dudławym štomje, „dubje nawoženje“ w Dodauskim lěsu pola Eutina w Schleswigsko-Holsteinskej, słuži hižo něhdźe sto lět jako kontaktna bursa za samotne wutroby. Listy a dopisnicy dochadźeja z cyłeje Europy, ale tež z USA abo Japanskeje. Listonoška Jule Engeldinger póštu k dubej nawoženje při kóždym wjedrje swěru roznošuje.
To a tamne (08.06.21)
Z mašinskej třělbu w rukomaj zadźeržachu ukrainscy hranicarjo w lěsu dweju kolesowarjow z Düsseldorfa, kotrajž běštaj z Pólskeje do kraja přijěć chcyłoj. Mužej w starobje 21 a 36 lět běštaj po puću do Thailandskeje. Wonaj z toho wuchadźeštaj, zo je Ukraina čłon EU a zo njetrjebataj namjezny přechod wužiwać. Při nócnej jězbje po lěsu je wšak na mjezy alarmowa připrawa reagowała. Hač smědźeštaj wonaj dale jěć, njeje znate.
Mjaso lubowacy paduch je w posaarskim Homburgu grilowanske twory z awtomata kradnył. Kaž policija w swojej rozprawje pisa, bě njeznaty skućićel škleńcu awtomata rozbił a mjaso a kołbaski w hódnoće 250 eurow spakosćił. Wón pak zawostaji cedlku, na kotrejž je so za swój njeskutk zamołwił.
To a tamne (07.06.21)
Na nakładnym ćahu k Baltiskemu morju po puću była je 27lětna žona z Čěskeje. Swědcy běchu železnicu wo tym informowali, kotraž na to policiju alarmowaše. Zastojnicy ćah pola braniborskeho Hohenleipischa zadźeržachu a namakachu 27lětnu pod planu. Žona přizna, zo bě w Bad Schandauwje na ćah do Rostocka zalězła. Tam chcyše dźeń při morju wostać a so na samsne wašnje domoj podać. Nětko dyrbi wězo pokutu płaćić. Zwotkel bě wědźała, zo ćah do Rostocka jědźe, a hač tomu scyła tak bě, policija njezhoni.
Nócne wołanje dweju skalneju wiwkow (Steinkauz) je w posaarskim St. Ingberće zasadźenje policije zawiniło. Ludźo sej myslachu, zo reaguje alarmowa připrawa na paduchow, a wołachu policiju. Njebě pak wjace hač wołanje ptakow, štož klinčeše woprawdźe kaž zwuki alarmoweje připrawy, samo zastojnicy wobkrućichu.
To a tamne (04.06.21)
Móšeń z 1 600 eurami namakał je dowolnik na Timmendorfskim přibrjohu nad Baltiskim morjom a je pjenjezy direktnje policiji přepodał. Jako chcyše wobsedźer na policajskim rewěrje přizjewić, zo je pjenjezy zhubił, móžachu je jemu tam hižo wróćić. Sprawny namakar drje njeje myto dóstał, zbožowny wobsedźer je pak přizjewił, zo chce so jemu dźakować.
Po tym zo je pokutu dwě lěće ignorował, by 59lětny Mnichowčan bjezmała do jastwa přišoł. Zastojnicy jeho na Mnichowskim lětanišću zadźeržachu, dokelž předležeše přećiwo njemu wukaz zajeća. Muž njebě spočatk lěta 2019 přikazanu pokutu 20 eurow zapłaćił. Zarjadniskich kóštow dla je suma mjeztym na 57 eurow rozrostła. Nětko bě sudnik zajeće hejateho muža wukazał. Tón pak pokutu radšo zapłaći a móžeše skónčnje do Turkowskeje lećeć.
To a tamne (03.06.21)
Wosa w awće rentnarki je wobchadne njezbožo ze škodu wjace hač 50 000 eurow zawiniła. 78lětna bě spytała wosu z awta wućěrić. Při tym wodźidło tak jara wokoło storhny, zo z puća zjědźe a do parkowaceho awta razy. A te suny so přez chódnik do fasady bydlenskeho domu. Tež štom so wobškodźi. Jako policija dojědźe, bě so wosa zminyła.
Chowajo so mjez izolaciskimi matami je paduch w srjedźnej Frankskej spytał, so zajeću wuwinyć. Kaž policija zdźěli, namakachu zastojnicy 44lětneho do matow zawiteho na łubi domu w Rüglandźe. Akcija traješe dlěje hač hodźinu, wšako běchu kóždy kućik přeslědźili. Muž bě k sydom měsacam jastwa zasudźeny, dokelž je so lěta 2018 na probowej jězbje z 3 800 eurow drohim elektrokolesom zminył. Nětko skónčnje móžachu jeho policisća do jastwa dowjezć.
To a tamne (02.06.21)
Pytanje za zhubjenej holčku je w bayerskim Altenmünsteru jeno dźesać mjeńšin trało. Staršej běštaj wohnjowu woboru wołałoj, dokelž njeběštaj dźowku nimale hodźinu wjace widźałoj a mjeztym so ćmičkaše. Wobornicy nańdźechu třilětnu spjacu pod kuchinskim blidom.
Do Karla Lauterbacha zalubowała je so 53lětna w Kölnje. To znajmjeńša twjerdźi kabaretistka Hazel Brugger, poćahowaca so na list žony, kotraž ju prosy styki k Lauterbachej nawjazać, zo njeby so list w „masy fanoweje póšty“ zhubił. Lauterbach bě žonje minjene měsacy kruta zepěra w koronakrizy, žona piše. Po spěwnym wustupje politikarja we wusyłanju „Carolin Kebekus Show“ bě pak „lubosćinski šok“ poćerpjeła, kaž piše. Dyrbjał-li so kontaktny pospyt nimokulić, chcyła so 53lětna wopić. Lauterbach je sam kubłacy nan pjeć dźěći.
To a tamne (01.06.21)
Spěšneje reakcije dźesaćlětneho dla je policija w Düsseldorfje ćeknjeneho zawinowarja njezboža zwěsćić móhła. Hólčec bě wobkedźbował, kak małotransporter do parkowaceho awta zrazy a je tak do dalšeho jězdźidła storči. Hólčec sej čisło na tafličce awta spomjatkowa a nana namołwi, policiju informować. Ta móžeše 41lětneho šofera transportera spěšnje zwěsćić a sćaza jemu jězbnu dowolnosć. Dźesaćlětnemu pachołej radźa, so pozdźišo na kóždy pad z policistom stać.
Paduši hromaka su na polu w južnej Hessenskej na šěsć kilometrach hromak „žnjeli“ a so z rubiznu 300 kilogramow zminyli. Po informacijach policije běchu njeznaći pakostnicy w nocy na njedźelu profesionalnje postupowali, jako hromak korektnje kałachu a nastate dźěry w nasypach zaso porjadnje zamjetachu. Škoda wučinja 3 000 eurow.
