To a tamne (06.07.17)

štwórtk, 06. julija 2017 spisane wot:

Z wulkimi mnóstwami lětacych mrowjow bědźachu so wčera wo­pytowarjo a tenisća we Wimbledonje na kromje Londona. Stajnje zaso dyrbjachu hrajerjo małe zwěrjatka wot drasty wotčesać abo sej je z mjezwoča trěć. Britojo maja za to samo mjeno: Flying Ant Day. Mrowje w hoberskich rojach wotleća, hdyž nowa kralowna hnězdo wopušći. Ćopłe a włóžne wjedro z 30 stopnjemi tomu polěkuje.

Wódne suwadło wupruwowałoj staj policistaj­ w ameriskim Ashvillu w staće North Carolina. Do toho bě jeju susod wołał, dokelž měješe suwadło, kotrež bě muž składnostnje dnja njewotwisnosće natwarił, za ilegalne. Zastojnikaj pak njemóžeštaj techniske njedostatki namakać a sunyštaj so po skłoninje, kotraž bě z wodu a mydłom preparowana. Medije běchu so na widejowu scenu dohladali, kotraž je mjeztym w interneće widźeć.

To a tamne (05.07.17)

srjeda, 05. julija 2017 spisane wot:

72 kołbaskow w dźesać minutach je 33lětny Kaliforničan do so stykał. Tradicionalne napřemojědźenje hotdogow wotmě so w New-Yorkskim zabawjenskim parku Coney Island. Joey Chestnut, serijowy dobyćer minjenych lět, je tak swój rekord wo dwě kołbasce polěpšił. Přiwšěm njebě wón cyle spokojom, dokelž je w druhej połojcy popušćił. Po­prawom chcyše 90 hotdogow zjěsć.

Spodźiwne rejwanje muža pod hołym njebjom a pozdatna rozmołwa ze štomom stej pěška w badensko-württembergskim Steinenje pohnułoj, policiju zazwonić. Alarm pak njebě trěbny. Zastojnikam 62lětny rozłoži, zo słuži „rejwanje“ sebjezakitowanju a wotpočinkej. „Poprawom činju to w lěsu. Tónkróć pak sym čakanje na lěkarski termin za swoje zwučowanja wužił. Druzy čitaja, hdyž dyrbja čakać. Ja zwučuju.“

To a tamne (04.07.17)

wutora, 04. julija 2017 spisane wot:

Jenož w kupanskich cholowach, z kupanskej čapku a płuwanskimi nawočemi chce 30lětny Joseph Heß 600 kilometrow samlutki po Łobju płuwać, wot čěskeje mjezy hač do Hamburga. Hospodarski inženjer ze Sakskeje planuje za to dźesać dnjow. Sobudźěłaćer Kamjeničanskeje TU dyrbješe sej dowolnosć w 15 institu­cijach wobstarać. Startować chce wón 4. awgusta w Bad Schandauwje.

Dweju rubježnikow dosahnył je poli­cajski pos w münsterlandskim Dülmenje. Mužej běštaj so z dalšim komplicu do banki­ zadobyłoj. Swědk něšto słyšeše a zawoła policiju. Ta přijědźe z psom Casperom,­ kotryž ćěkacych muži pře­sćěhaše. Prěnjeho kusny do ruki, na čož so tón poda. Krótko po tym Casper­ tež druheho paducha wučušli. Třeći skućićel pak móžeše ćeknyć, byrnjež z helikopterom za nim pytali.

To a tamne (03.07.17)

póndźela, 03. julija 2017 spisane wot:

Z policajskim awtom na wěrowanje přijěła­ je njewjesta w Durinskej. Do toho bě šoferka taksija z dwěmaj hosćomaj do kwasneho awta zrazyła. Po protokolowanju njezboža wosta njewjesće runje hišće štwórć hodźiny, zo by na 15 kilometrow zdaleny hród Scharfenstein dojěła. Zastojnicy dołho njewahachu a dowjezechu ju hromadźe z maćerju na hród. „Po poslednich informacijach bě wěrowanje wuspěšne“, rěka w policajskej rozprawje.

Njeplanowany wustup psa na koncerće Wienskeho komorneho orchestra w Turkowskej je jako widejo w interneće wulce prašany. Labrador bě 20. junija na je­wišćo amfiteatra w Ephesusu přiběžał a měješe při hudźbje Felixa Mendels­sohna Bartholdyja wočiwidnje wjele wjesela. Sydny so pódla huslerja na zemju, zo by so połnje na hudźbu koncentrował. Wopytowarjo spontanje přikleskowachu.

To a tamne (30.06.17)

pjatk, 30. junija 2017 spisane wot:

Psyči problem měješe Mnichowska wohnjowa wobora wčera rozrisać: Pos bě w lifće zawrjeny, jeho wobsedźerjo pak steještaj před nim. Prawdźepodobnje bě so psyči powjaz w durjach zapopadnył, tak zo so hižo njewotewrěchu. Tež sobudźěłaćer klučoweje słužby njemóžeše pomhać. Hakle powołanska wohnjowa wobora blokowane durje skónčnje wočini a Jack Russella wuswobodźi.

Hdyž sy alkohol pił, da awto radšo stejo wostaj. Tole je mužomaj w starobje 26 a 27 lět na awtodróze do mysli přišło. Tak zastaštaj na nuzowej čarje na A 29 pola Cloppenburga a lehnyštaj so spać. Zastojnikaj awtodróhoweje policije dyrbještaj chětro raznje klepać, zo byštaj jeju wubudźiłoj. Test alkohola wunjese 2,3 a 2,8 promilow. Jedyn tamneho winowaše, zo je jěł. Policisća dachu awto ze strašneho parkowanskeho městna wotwlec.

To a tamne (29.06.17)

štwórtk, 29. junija 2017 spisane wot:

Njesebičny mandźelski je njezbožu swojeje žony zadźěwał. Na kolesowanskim wulěće blisko bayerskeho Oberstdorfa 50lětna mandźelska měnješe, zo borzdźidła e-bika njefunguja. Na to muž z kolesa skoči a so jej před e-bike ćisny, zo njeby wona do bliskeho płota prasnyła. Wobaj so snadnje zrani­štaj. Při kontroli elektrokolesa wšak dyrbještaj zwěsćić: Borzdźidła běchu bjezporočne.

Kuriozny pad měješe Drježdźanska wohnjowa wobora wčera zmištrować. Muž bě sej kolesowy zamk wokoło bjedrow přizamknył. Jako chcyše jón zaso wotamknyć, so klučik wotłama. Poda so tuž po najspěšnišim­ puću na wohnjowobornu stražu w měšćanskim dźělu Albertstadt, hdźež prošeše wo pomoc. Kameradojo rady pomhachu a zamk přetřihachu.

To a tamne (28.06.17)

srjeda, 28. junija 2017 spisane wot:

Žorta we wólbnej kabinje dla dyrbi wjace hač tysac wobydlerjow w Bad Karls­hafenje wólby měšćanosty wospjetować. Tole je parlament hessenskeho města rozsudźił, byrnjež jenož jedyn z měšćanskich dźělow potrjecheny był. Njestronjan bě wólby z jeničkim hłosom předskoka dobył. Jedyn z wolerjow bě so we wólbnej kabinje stejo pomocnikow prašał, hač ma wólbny lisćik tež podpisać. Mějo to za žort, jemu tući smějo přiwo­łachu „haj, wězo“. Muž podpisa, z čimž bě hłós njepłaćiwy.

Z pjeć hodźinami zapozdźenja je lětadło w chinskim Shanghaiju wotlećało, po tym zo bě přiwěrkojta žona twjerde pjenjezy do turbiny mjetała, měnjo, zo to zbožo přinjese. Technikarjo tuž turbinu rozšrubowachu a woprawdźe jedyn pjenjez namakachu. W Chinje maja stajnje zaso nje­wšědne dožiwjenja z ludźimi, kiž prěni króć w žiwjenju z lětadłom leća.

To a tamne (27.06.17)

wutora, 27. junija 2017 spisane wot:

Derje schowane, tola nic derje dosć: W hornjej Bayerskej je pašowar tysacy cigaretow mjez druhim w rezerwowym kolesu schował. Z röntgenowym nastrojom pak namakachu cłownicy při kontroli małotransportera na awtodróze A 8 na wšě 11 000 cigaretow. Někotre běchu samo w třěše awta schowane. Cigarety nětko zniča. 26lětnemu pašowarjej su skóržbu wupisali. Trěbny tobakowy dawk dyrbješe wón nablaku zapłaćić.

Dom dźěda a wowki zapalił je dwana­ćelětny w Dippoldiswaldźe, jako njerodź zaničowaše. Z elektriskim palakom bě wón njerodź na dworje wotstronjał. Škrě zapalichu carport, zwotkelž so płomjenja spěšnje na jednoswójbny dom rozpřestrěchu. Na nim nasta škoda 200 000 eurow­. Dwanaćelětny poćerpje šok, runje tak tež dźěd a wowka.

To a tamne (26.06.17)

póndźela, 26. junija 2017 spisane wot:

Radijowy program za psy maja wot najnowšeho w Badensko-Württembergskej. „Wusyłamy hudźbu, kotraž po našim měnjenju a wědźenju psy změruje“, rjekny moderator Stephan „Stocki“ Stock. 30lětny Heilbronnjan měješe ideju za digitalny program „Halo, Hasso“. Z hudźbu chcedźa psam posrědkować, zo njejsu same. Najlěpje hodźi so měrna hudźba kaž klasika abo gitarowe hippie-spěwy.

Kuriozne mišterstwa w napodobnjenju spěwanja honačow přewjedźechu wčera w porynsko-pfalcskim Göcklingenje. Wjace hač 20 muži a žonow tam nastupi. Šěsć jurorow je spěwanje a kročenje čłowječich honačow posudźowało. Na wšě 1 300 wopytowarjow ze wšeje Němskeje bě za to do městačka přijěło.

To a tamne (23.06.17)

pjatk, 23. junija 2017 spisane wot:

Rěčaca ampla ma dźěći a dorosćenych w Neu-Ulmje pohnuć, dróhi jeno při zelenej swěcy přeprěčić. „Dźakuju so, hnydom budźe zelene“, rjeknje dźěćacy hłós, hdyž něchtó knefl při ampli pěškow tłóči. Tak chcedźa wěstotu dźěći powjetšić, kaž ze schwabskeho města rěka. W sewjero­rynsko-westfalskim Marlu maja hižo tři lěta rěčace ample. Pilotowy projekt tam mjeztym wulki wothłós zbudźa.

Štyri policajske a wohnjowoborne awta, gumijowy čołm, 17 muži – a to wšo za jeničku kačku. Wona bě so njedaloko milinarnje Kiebingen w Rottenburgu nad Neckarom w šnórje wudy zapopadnyło, kotraž wisaše při milinowodźe nad rěku. Pěška bě ju w tymle njepřijomnym połoženju wuhladała a zastojnikow alarmowała. Něhdźe hodźinu pozdźišo bě kačka z putow wuswobodźena a móžeše skónčnje dale płuwać.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND