Wot 3. do 8. nowembra wotměje so w Choćebuzu 25. festiwal wuchodoeuropskeho filma. Druhi króć budźe tam tež němsko-serbska sekcija „Heimat / Domownja“, a to 5. a 6. nowembra. Cordula Ratajczakowa je so ze zamołwitej dr. Grit Lemke rozmołwjała. 1965 w Grodku rodźena a we Wojerecach wotrostła promowowana europska etnologowka skutkuje wot lońšeho jako nawodnica filmoweho programa.
Kak wupada Waš koncept za Choćebusku sekciju „Heimat / Domownja“?
dr. G. Lemke: Tři hłowne zaměry su z njej zwjazane. W srjedźišću steji wězo Łužica. Sprěnja dźe wo to, filmy, kotrež su w regionje nastali, hromadu wjesć a pokazać. K tomu słušeja wězo tež serbske. Jim ma sekcija tohorunja forum poskićeć. Zdruha maja so ći hromadu wjesć, kotřiž tele filmy produkuja. A střeća chcemy so pod hesłom „Domizna zwonka Łužicy / Heimat outside Lausitz“ temam wěnować, z kotrymiž ma tež Łužica činić. Kak druhdźe z wudobywanjom brunicy wobchadźeja abo što druhe mjeńšiny činja?
Započinam z poslednim dypkom a tuž z widom zwonka Łužicy. Kotre filmy k tomu předstajiće?