Stefan Richter z Kubšic, wědylačny młody pjekarski mišter, ma kruty wotpohlad wjesne žiwjenje wožiwić
„Wědomosć je spóznała, zo ma ručne dźěło wulki wliw na čłowjesku psychu a wuskutkuje dobre žiwjenske začuće.“Pjekarnja w Kubšicach njenapadnje. Žana wulka reklama a ničo njewšědne njepokazuje na twarjenje, w kotrymž Richterec swójba wšědny chlěb za wokolinu pječe. A přiwšěm je myslenje w pjekarni hinaše hač pola druhich pjekarjow. Přičina toho stej wědylačnosć a zajim młodeho pjekarskeho mištra Stefana Richtera za žiwjenje wokoło sebje. Njebychu-li jeho lětsa wuznamjenili z předewzaćelskim mytom Budyskeho wokrjesa a njeby-li so požadał jako pjekar pola discountera Lidl, by był pjekarski mišter, kajcyž su to mnozy jeho kolegojo.
Do swěta a žiwjenja
Powołanski puć Stefana Richtera so wot toho druhich pjekarjow rozeznawa. Po pjekarskim wukubłanju w Budyšinje je hnydom hišće připowěsnył poł lěta wukubłanja na konditarja, štož bě za njeho wunošne, dokelž bu jemu po klasiskim přikładźe sposrědkowane.
