Sobudźěłaćer LND Handrij Bjeńš předstaja hornjołužiske stawizny
Štóž dźěćo ma, kotrež na serbsku šulu chodźi, móže sej wěsty być, zo ma doma knihu, kotruž je hižo w ruce poměł – wšojedne, hač nastupa to matematiku, hudźbu, geografiju abo rěč. Wšako ma Handrij Bjeńš w Ludowym nakładnistwje Domowina realizowanje wšitkich serbskich šulskich knihow na starosći, kotrež zhromadnje z Rěčnym centrumom WITAJ (RCW) nastajeja. Wón wě, kak knihu činiš, a to nic jenož wot wčerawšeho dnja. 1971 bě jako 16lětny w tehdyšej Serbskej ćišćerni rjemjesło pismikistajerja nawuknył. Pozdźišo staraše so w serbskim nakładnistwje wo zhotowjenje njeličomnych knihow, po załoženju RCW lěta 2001 jenož hišće šulskich. W tymle času pak bě hižo dawno započał připódla swójske knihi pisać.
Nimale kóžde druhe lěto z nowej publikaciju
Tež lisćina knihow a zešiwkow, hdźež je so Handrij Bjeńš jako awtor sam pjera přimał, móže so widźeć dać: dohromady dźewjeć je w minjenych 23 lětach wušło. Nimale kóžde druhe lěto nowa samostatna publikacija, to tež njeje za hłownje powołansce skutkowaceho spisowaćela špatny přerězk.
