Dlěši čas bě dowolowa oaza wo­srjedź hornjołužiskeje hole a hatow blisko Komorowa­ wopušćena, doniž njejstaj ju před třomi lětami Simankec mandźelskaj­ z Brěmjenja přewzałoj.

Bywša dowolowa oaza při puću mjez Komorowom a Kupoju je kaž mały paradiz wosrjedź přirody. Idealna městnosć to so wočerstwić. Tónle potencial staj tež Steffen a Sabine Simank spóznałoj. Rozsudźištaj so tuž, areal přewzać a wožiwić. Tež nowe mjeno měješe dóstać a rěka nětko prózdninski dwór.

W prědnim dźělu dwora steji hosćenc ze stanom, hdźež hodźa so najwšelakoriše zarjadowanja přewjesć. Tule su Simankecy tež hrajkanišćo za­rjadowali. Bjezposrědnje pódla je wobhrodźeny areal za wowcy, kozy a nukle. „Komorowska Domowinska skupina je namaj pomhała tule zaso wšitko spo­rjad­kować“, praji Sabine Simank. Tež star­ši jeju podpěrachu, starachu so wo zwěrjata a picowachu je.

W zadnim dźělu dwora steji w połkruhu dźewjeć drjewjanych dowolowych domčkow, hdźež móže stajnje pjeć wosobow přenocować Rady­ přebywaja tu mjeńše abo wjetše skupiny.