To a tamne (19.01.17)
Pedalej płuna a borzdźidła zaměnił je šofer w myjerni awtow porynsko-pfalcskeho Bad Dürkheima. Kaž w policajskej rozprawje rěka, smaleše 65lětny z awtom po myjerni, při čimž sobudźěłaćerja snadnje zrani. Awto zjědźe přez dróhu hač na parkowanišćo kupnicy. Tam zrazy do parkowaceju jězdźidłow a wosta skónčnje stejo. Cyłkownu škodu trochuja na 70 000 eurow.
Z druheho poschoda wjaceswójbneho domu skočił je muž w Podstupimje, zo by so zajeću wuwinył. Do toho bě chětro wopity nan policistow při durjach wotpokazał, kotřiž za jeho 31lětnym synom z wukazom zajeća pytachu. Tón so na to w kupjeli schowa. Po tym zo běchu nana přewinyli, zastojnicy hrožachu, zo durje kupjele namócnje wotewru. Muž pak z woknom skoči a ćekny. Policisća zajachu jeho krótko na to w pincy.
Kandidataj wuzwolenaj
Berlin (dpa/SN). Cem Özdemir a Katrin Göring-Eckardt staj načolnaj kandidataj Zelenych k wólbam zwjazkoweho sejma. Wobaj politikarjej běštaj so wospjet za móžnu koaliciju Zelenych z CDU a CSU na zwjazkowej runinje wuprajiłoj. Göring-Eckardt dósta, byrnjež jako žona tak a tak nominowana, 70,63 procentow hłosow. Předsyda Cem Özdemir měješe z 35,96 procentami jara snadny předskok před Robertom Habeckom, kiž dósta jenož 75 hłosow mjenje. Lěwicar Anton Hofreiter nažnja 26,19 procentow.
Žněje kontrowersne reakcije
London (dpa/K/SN). Britiska premierka Theresa May je ze swojim připowědźenjom, kralestwo z europskich wikow wjesć, zbudźiła kontrowersne reakcije w kraju a we wukraju. Šefina šotiskeho knježerstwa Nicola Sturgeon pohrozy znowa z referendumom wo njewotwisnosći kraja. Z Brüssela a Berlina dósta May napominace hłosy. Wona wustupowaše w zasadnej narěči za dospołny łamk z Europskej uniju, bě pak za zrěčenje z EU wo swobodnym wikowanju.
Snowden wostanje w Ruskej
Za prezidenta wuzwoleny
Z poslednjej narěču
To a tamne (18.01.17)
K mjezynarodnemu dnjej joggingowych cholowow chce jedna z Mnichowskich kupnicow wšěm sekt wudać, kotřiž jutře w treningowych cholowach nakupować přińdu. Wabjenska akcija zbudźa wulki wothłós: Wjace hač 2 000 ludźi je připrajiło, zo přińdźe; 8 000 je w interneće swój zajim signalizowało. Poprawny dźeń joggingowych cholowow je sobotu. Kupnica pak chce tołkańcy zadźěwać, dokelž tam sobotu swójby nakupuja.
Konja z wodoweho basenka wuswobodźiła je wohnjowa wobora w Choćebuzu. Kóń bě wčera z pastwy w Depsku ćeknył a do poola skočił. 19 kameradow pool wuklumpa a namjeta do njeho słomjane walčki, po kotrychž móžeše skoćo skónčnje basenk zaso wopušćić. Wšón čas su wohnjowi wobornicy chribjet konja z ćopłej wodu wohrěwali. Wšako traješe akcija něhdźe tři hodźiny.
Wěstotny koncept za jubilej
Hannover (B/SN). Atentat na Berlinske hodowne wiki w decembru pohnuwa tež zarjadowarjow lětušeho jubileja reformacije hłubšo rozmyslować. „Z poradźowarjemi smy situaciju woměrje analyzowali“, rjekny jednaćel towarstwa Jubilej reformacije 2017 Ulrich Schneider. Njewotwisnje wot podawkow w minjenych tydźenjach su na wěstotnym koncepće za spominanske lěto we wuskim wothłosowanju ze zarjadami a policiju, krajneho knježerstwa Saksko-Anhaltskeje kaž tež z fachowcami intensiwnje dźěłali. Ćežišćo při tym su wulkozarjadowanja kaž zakónčaca Boža słužba 36. němskeho cyrkwinskeho dnja 28. meje.
Dušepastyr policije warnuje
Atentatnika zajeli
Istanbul (dpa/K/SN). Dwě njedźeli po atentaće na Istanbulski klub „Reina“, žadacym sej w silwesterskej nocy 39 smjertnych woporow, je policija móhła pozdatneho skućićela zajeć. Istanbulski guwerner Vasip Şahin zdźěla, zo pochadźa nadpadnik z Uzbekistana. Zajeli su tež Kirgiza, w kotrehož bydlenju bě wón skradźu přebywał. Wukubłali běchu jeho w Afghanistanje terorisća-talibanojo.
Pytaja za wotmołwami
Davos (dpa/K/SN). W Davosu započa so dźensa forum wo swětowym hospodarstwje. W přichodnych dnjach budźe na nim přibližnje 3 000 načolnych politikarjow ze wšěch kontinentow, topmanagerow swětowych předewzaćow, wu- znamnych wědomostnikow a šefow nje- knježerstwowych organizacijow za wotmołwami na aktualne prašenja pytać. Zahajił je zarjadowanje chinski prezident Xi Jinping. Z nim wobdźěli so na forumje prěni raz hłowa Chiny.
Přestanu lětadło pytać
Na třěchu jastwa Alcaçuz wućeknyli su sej tući jeći njedaloko ...
Stat Sakska ma pěstowarnje lěpje financować
Kamjenc (SN/MkWj). Kubłanski system w Sakskej modernizować a dale wuwić wostanje wažny towaršnostny nadawk, potwjerdźa zapósłanča Lěwicy w krajnym sejmje Marion Junge. Na wčerawšej kóždolětnej nowinarskej rozmołwje w Kamjenskim wobydlerskim běrowje Lěwicy je wona zdobom lětuše ćežišća swojeho dźěła rozłožiła. Kubłanje budźe tež hłowna tema zjawneje šulskopolitiskeje rozmołwy a diskusije, kotruž je Junge za štwórtk, 19. januara, do awle powołanskošulskeho centruma w Kamjencu zwołała. Swoje wobdźělenje připowědźiłoj staj tež za kubłanje zamołwitaj zapósłancaj CDU a SPD w Sakskim krajnym sejmje Lothar Bienst a Sabine Friedel.
Žadyn rozsud w prěnim přeběhu
Strasbourg (dpa/SN). Pytajo za naslědnikom prezidenta parlamenta EU Martina Schulza njeje prěni wólbny přeběh rozsud wunjesł. Žadyn z nastupjenych šěsć kandidatow njeje trěbnu absolutnu wjetšinu hłosow docpěł, kaž Schulz jako nawoda posedźenja zdźěli.
Najlěpši wuslědk z 274 hłosami bě sej kandidat Europskeje ludoweje strony, Italčan Antonio Tajani, wubědźił. Slědowaše italski socialist Gianni Pittella ze 183 hłosami. Wobaj běštaj faworitaj. Tamni štyrjo kandidaća reprezentowachu mjeńše frakcije a nimaja žane wuhlady. Při cyłkownje 683 wotedatych hłosach trjeba dobyćer 342 hłosow. W běhu popołdnja chcychu dalše wólbne koło přewjesć. Fachowcy su sej wěsći, zo ma Tajani najlěpše šansy so z prezidentom parlamenta stać.
Němski socialdemokrat Martin Schulz bě kónc nowembra njewočakowano připowědźił, zo Europski parlament wopušći, dokelž chce zaso w němskej zwjazkowej politice skutkować.
