Posledni wolejbulowy turněr lěta 2018
Mjez hodami a Nowym lětom wobdźěli so we Wojerecach hižo 22. raz 18 mustwow w VBH-arenje Sportoweho kluba Wojerecy na „poslednim wolejbulowym turněrje“. Měšane teamy běchu z Wojerec, Budyšina, Łaza, Worklec, Kamjenca, Grodka, Kamjenicy, Lipska, Drježdźan a Jeny. Tež měšany cyłk Bartolomej a jeho rubježnicy, wopřijacy wolejbulistki a wolejbulistow z Lipska, Zhorjelca a Worklec, bě nastupił a je turněr dobył.
Wot dopołdnja w dźesaćich hrajachu šestki wo zaćah do kónčneho koła. Byrnjež olympiske moto „Pódla być je wšitko“ a wjeselo na prěnim městnje stałoj, nasta tójšto duelow na wysokim niwowje. Dobyćer lěta 2017 „Darmotne piwo za wšitkich“ wobsadźi tónraz jenož pjate městno a při kónčnej hrě knježeše wulka napjatosć. Hakle w poslednjej sadźbje přesadźichu so Bartolomej a jeho rubježnicy cyle snadnje přećiwo Rjadowanemu chaosej. Čerwjenu latarnju dóstachu Chaoća z Ćiska. 23. nakład turněra budźe lětsa 27. decembra, w VBH-arenje. Werner Müller
Tež w aktualnej hrajnej dobje běchu wolejbulisća ST Marijineje hwězdy w pokalnym kole nastupili a so z dwěmaj poražkomaj spěšnje zaso rozžohnowali. Poprawom chcychu w pokalu k wjeselu a jako trening hrać, na polu pak běchu přestatiscy a nerwozni.
ST Marijina hwězda – ST Sokolnik Wjazońca 0:2 (19:25, 17:25)
Přewšo spokojom móža koparjo-stari knježa Sokoła Ralbicy/Hórki na lěto 2018 zhladować.
Halowa sezona bě so za nich w decembrje 2017 na wokrjesnych mišterstwach koparjow nad 35 lětami z docpěćom 2. městna wuspěšnje zahajiła. W januarje slědowaštej dalšej turněraj. W Kulowje wobsadźichu Ralbičanscy stari knježa štwórte a we Wojerecach 3. městno. Swójski turněr tohorunja na 3. městnje zakónčichu.
Awtor dźensa
Tomaš Faska
Byrnjež tež lětsa prěni awtor tuteje tradicionalneje kolumny w našim serbskim dźeniku njebył – po tym zo je so nowačka Tereza Wićazowa zašłu srjedu tu trochu bliže předstajiła –, chcu Wam, waženi čitarjo a přećeljo sporta, ze swojimi prěnimi słowami wosobinsce hišće wupřeć strowe a wuspěšne lěto 2019. A pokuknu dźensa zdobom za Was a z Wami zhromadnje, prěnju póndźelu noweho lěta, na protyku lětušich sportowych wjerškow. Na čo směmy so wjeselić?
Wokrjesna klasa mužojo, stafla sewjer
1. SC Wojerecy 5 10 : 1 10
2. Módro-běli Wojerecy III 5 8 : 3 8
3. Módro-běli Wojerecy IV 4 6 : 4 4
4. ST Kupoj-Nowa Łuka III 5 2 : 8 2
5. Viktoria Worklecy II 5 0 : 10 0
07.01. 19:00 Sokoł Budyšin –
MSV Budyšin 04 IV
07.01. 20:00 Sokoł Budyšin –
TSV Wóspork
Wokrjesna klasa mužojo, stafla wuchod
1. SZ Budyšin sewjer 8 13:5 12
2. ST Chróstawa 4 8:0 8
3. Sokolnik Wjazońca 4 8:1 8
4. ST Marijina hwězda 6 8: 6 8
5. ST Hnašecy-Dobruša 4 4: 5 4
6. TSV Wóspork/Hrodźišćo 6 3:10 2
7. MSV Budyšin 04 IV 6 3:12 0
8. Sokoł Budyšin 4 0: 8 0
09.01. 19:00 ST Chróstawa –
ST Marijina hwězda
(w Chróstawje)
09.01. 20:00 ST Marijina hwězda –
Sokolnik Wjazońca
(w Chróstawje)
Pytaja mustwa za koparski tenis
Sportowy zwjazk Budyskeho wokrjesa chce 15. februara dwě sportowej družinje kombinować a turněr w koparskim tenisu přewjesć. Štwórty nakład pak budźe prěni raz w sportowej hali a nic pod hołym njebjom. W sportowni na Budyskim Třělnišću wubědźuja so potom wot 19 hodź. stajnje třo hrajerjo na štyrjoch polach dźesać mjeńšin. Maksimalnje 20 mustwow smě so na zarjadowanju wobdźělić. Holcy a hólcy wot 15 lět smědźa so hišće hač do 11. januara přizjewić, a to pola Tomaša Henčla (03591/ 2706314), abo Leonie Gries (03591/ 2706320), l.gries@sportbund-bautzen.de.
Delanscy koparjo přizjewjeni
Sobotu, 12. januara, přewjedźe Zapadołužiski koparski zwjazk w sportowni při Kamjenskim lětanišću tak mjenowany RB-cup. Tež Sokoł Ralbicy/Hórki je prěni raz mustwo muži za turněr přizjewiło. Hrate budźe wot 15 hodź. w dwěmaj skupinomaj. Skupinu A tworja Wojerowski FC, LSV Hory, ST Ćisk II a FSV Bretnig-Hauswalde, skupinu B Sokoł Ralbicy/Hórki, Natwar Němske Pazlicy, ST Wóslink/Skaskow a ST Mały Wjelkow.
Sokoljo startuja jako prěni
28. halowy koparski turněr wjesneje skupiny CDU we Worklecach
Wjesne koparske mustwo z Chrósćic je zašłu njedźelu 28. halowy turněr wjesneje a gmejnskeje skupiny CDU we Worklecach dobyło. W finalu přesadźi so wone přećiwo zakitowarjej titula z Róžanta z 2:1. Třeće městno w dźesać cyłkow sylnym polu a połnje wobsadźenej Worklečanskej sportowej hali wobsadźichu wjesni koparjo z Pěskec, štwórte bu na kóncu prěnje mustwo Worklečanskich ženjenych. Duel wo třeće městno, kotryž bě so 1:1 skónčił, dyrbjachu kopy ze zdalenosće sydom metrow rozsudźić. Najlěpšej třělcaj z dźewjeć wrotami běštaj Fabian Korjeńk z Pěskec a Simon Žur z Worklec, najlěpši wrotar bě Worklečan Herbert Wagner.
FC Hansa Rostock
– FC Energija Choćebuz 0:2 (0:1)
Zestawa hosći: Spahić – Weidlich, Stein, Matuwila, Bender, Schneider, Schlüter, Viteritti (34. Holthaus), Geisler, Mamba, Rangelow (70. Scheidhauer)
We wuchodnym derbyju steještej sej cyłkaj napřećo sebi, kotrejž běštej naposledk dołho bjez wuspěcha. Rostock njeje štyri razy pospochi dobyć móhł, Choćebuz samo pjeć razow. FC Energija poda so tuž chětro pilnje do hry. Po 22 mjeńšinach pak by pokutny kop pilnosć nimale podusył. Cebio Soukou měješe z jědnatku hobersku šansu za domjacych, třěli pak bul wyše wrotow Avda Spahića. Choćebuženjo přećiwnika přeco zaso z rjanymi kombinacijemi nadběhowachu. Jedna tajka wjedźeše přez Felixa Geislera a Kevina Weidlicha w 23 min. k nawjedowanju. Móžnosć wuži Lars Bender z třělwu do dołheho kuta k 0:1.