Wohnjostroj žortow, rejow a skečow

pjatk, 21. februara 2020 spisane wot:

Serbscy a němscy karnewalisća w jubilejnej sezonje norskemu ludej wjele wjesela wobradźeja

Pod hesłom „WCV swjeći kulojće, 50 lět su pisane“ wuhotuje Serbskopazličanske karnewalowe towarstwo połstatu sezonu. Swój pisany program předstajichu minjenu sobotu na prěnim kapičkowym wječoru. Jutře slěduje dalši tajki.

Kelko dźěła, prócy a předewšěm časa nało­žuja čłonojo Serbskopazličanskeho karnewaloweho towarstwa za jednotliwe dypki swojeho programa, wědźa dokładnje jeno ći, kotřiž su na tym bjezposrědnje wobdźěleni. Dožiwiło pak je jón minjenu sobotu něhdźe 150 wopytowarjow lětušeho prěnjeho kapičkoweho wječora, kotrychž staj princ Marcel II. a jeho princesna Christina II. alias Marcel Hoza a jeho mandźelska Christina ze swojimi dźěćimi Metodom, Józefom a Luciju tež serbsce witałoj.

Britiski čorny humor na premjerje komedije „Dołhož fenki běža“ publikum přeswědčił

Wjacore lěta hižo bjezdźěłny Eric Swan (Měrko Brankačk) na socialnym zarjedźe z falšowanymi próstwami pjenjezy ka­sěruje. Jako to na ničo njetukacy přećel Nor­man Bassett (Jurij Šiman) zhoni, jeho z krutymi słowami namołwja: „To, štož sy činił, je ćežke złóstnistwo!“

Jako potom tež hišće pruwowar socialneho zarjada Mister Jenkins (Torsten Schlosser) před durjemi steji, njemóže Eric přiznać, zo je sej wšitke wopačne próstwy wumyslił. Nadobo pak hrozy so jeho konstruowane žórło pjenježnych dochodow sypnyć. Štož je wjele lět tak derje běžało, započina naraz chabłać. Jeho­ ­wućek je nuzowa łža. Ale z njej woči­ni šatulu pandory, a jeho dalše wumy­slene nuzowe łžě ćahnu so dale a hłubšo. Zo njeby Mister Jenkins ničo pytnył, dyrbja přitomne wosoby, naraz tež hišće wumyslene wosoby hrać, kotrež bě Eric na zarjedźe přizjewił. Kołwrótne koło zaměnjenjow so započina a so bjez přestaća hač do kónca hry wjerći.

Stajnje so smjeli

Radwor – helaw!

pjatk, 21. februara 2020 spisane wot:
Foto: Martina Hančikowa

Hižo spočatk februara su dźěći Radworskeho katolskeho dnjoweho přebywanišća póstnicy swjećili. W hosćencu „Meja“ běchu nanojo a maćerje staršiskeje přirady zaso wšitko rjenje spřihotowali a sej do toho hłójčku łamali, kak móhli hosći zabawjeć. Wězo słuša k tomu tež póstniska narěč z namołwu „Radwor – helaw“, kotraž bě po cyłej „Meji“ słyšeć. Tež DJ Alex bě přichwatał, zo by hudźbne přeća indianow, cowboyjow, prin­cesnow a dalšich spjelnił. Tež wšelake hry su k po­ra­dźenju popoł­dnja při­nošo­wa­li. A po­bracho­wać nje­smědźa­chu wězo słódne pampu­chi a dal­še přiku­ski, wo kotrež bě so star­šiska rada próco­wała. Wul­ki dźak wšitkim, kotřiž su cho­wan­cam dźěćaceho domu spodobne póst­niske zarjadowa­nje zmóžnili.

Bianka Šeferowa

Camprowarjo tu a tam

pjatk, 21. februara 2020 spisane wot:
Sobotu, 15. februara, je so za nas póstniski čas započał. Dźěći, starši, samo dźědojo a wowki kaž tež kubłarki Witaj-pěstowarnje „Pumpot“ su zhromadnje camprowali. Dobreje nalady a spěwajo smy w Němcach dom wot domu šli a wobydlerjow zawjeselili. Wjedro je derje z nami měniło. Tež wobydlerjo na mnohich statokach nas lubje witachu. Naše tyzki a měški so ze šćedriwymi darami derje pjelnjachu. Za to wutrobny dźak wšěm wulkomyslnym darićelam. Tekst a foto: Diana Libšowa

Foto: Štefan Paška

Posledni dźeń do zymskich prózdnin rěkaše za wuknjacych Šule Ćišinskeho hejso­wać a póstniske wjeselo měć. Po wudawanju połlětnych informacijow w rjadownjach je tam farar Tomasz Dawidowski dom swjećił. Wšojedne hač princesny, princy, ryćerjo, myški, kóčki abo psy – zhromadnje smy so pomodlili a kěrluše zaspěwali – a to wšo w pisanych kostimach. Krótko po tym dóstachu štyrjo šulerjo 3. lětnika wopismo, zo smědźa so na čitanskim wubědźowanju w Budyšinje wobdźělić. Woni budu našu šulu jako ći najlěpši 3. lětnika zastupować. Bórze pak spěchachmy wšitcy do awle šule, zo bychmy porjadnje póstnicy woswjećili. DJka Jana hižo čakaše, zo by nas z naj­wšela­ko­rišimi wjesołymi pěsničkami zawjeseliła. Kóžda rjadownja měješe tež hišće wosobinski přinošk. Dachmy sej pampuchi zesłodźeć, a hač do připołdnja smy rejowali a hejsowali.

Šulerjo SZŠ Šula Ćišinskeho Pančicy-Kukow

Kóžde lěto wjesele chwatamy do kupnicy. Žabka abo indianka, abo snano rjana damka, Póstnicy su rjany čas, swjećimy jón rady zas. Sym zwěsćiła, zo njeje scyła lochko zhonić, što chce štó póstnicy być. Někotři činja z toho potajnstwo. Sym so přećelow prašała: Što chceš póstnicy być? Změješ wosebitu frizuru? Sy sej kostim wobstarała? A budźeš šminkowana? Helena mi powědaše, zo budźe wona hula-rejowarka. Kostim ma wot swojeje maćerje. Wězo chce so tež šminkować. A wulce swjećić chce w Kulowje. Carla změje cyle wosebity kostim. Wona budźe paw a změje woprawdźite pjerja na kostim přičinjene. Změje tež ekstra frizuru a budźe šminkowana. Póstnicy su rjany swjedźeń dokelž móže so kóždy něšto žortne zwoblěkać. Ja lětsa trójce póstnicy swjeću. Leandra Nowakec

Moja přećelka Marta póńdźe jako piratka. Wona je sej dźěl kostima kupiła, dźěl měješe hižo doma. Ja sama pak budu paw. Sym chcyła kostim měć, kiž je moderny a zwěrjeći. To budu cyle rjane póstnicy!

A tu hišće žorćik!

LND je njedawno wobrazowy słownik „Swět wokoło nas“ za słuchopisak BOOKii wudało. Sabina Salowscyna ­je sej dźěćacu knihu z wosebitym poskit­kom za nas wotkryła.

Nowostka na knižnym regalu błyšći so w pisanych barbach a narěči hnydom prawu skupinu: dźěći. Njemało, dokelž so hižo na wobalce wotdaloka mała Leńka kaž tež Tadej a Beno na čitarja směja a na dyrdomdeje wabja. Tak móžu wam přeradźić, zo steji Šołćic swójba w srjedźišću nowowudateho wobrazoweho słownika. Tón měri so na maćernorěčnych runje tak kaž na serbšćinu wuknjacych. Kniha je bjezdwěla za kóždu rěčnu kaž tež za wjacore starobne skupiny myslena. Dajće so překwapić.

Z Leńku, Tadejom a Benom po wšědnym dnju

Na žurli so špundowanje čumpało

pjatk, 14. februara 2020 spisane wot:

Lěta zawrjeny hosćenc při Klóšterskej wodźe je jedne z najstaršich twarjenjow w Pančicach-Kukowje – bórze je zwottorhaja

Mnozy zwjazaja čas swojeje młodosće ze žurlu a hosćencom w Pančicach-Kukowje, hdźež chodźachu a jězdźachu ze wsy a wokoliny, Wotrowa hač do Kulowskich kónčin a z Delan w 70tych a 80tych lětach kóždy tydźeń na reje. Bě dźě to cyle wosebita žurla w hornim po­scho­dźe z małej galeriju. Napřećo hosćencej, kotryž lěta Blochecy wobhospoda­richu, bě Nestlerec rěznistwo zaměstnjene. Daloko woblubowane kołbasy, šunki a słódne mjaso syły kupcow přićahowachu, tak zo so přeco dołhe rynki čakacych tworjachu. Ludźo w NDRskim času dźě tež druhdźe ničo druhe znali njejsu.

Awtarkne zastaranje z milinu je přichod

pjatk, 14. februara 2020 spisane wot:

Energijowa a strukturna změna we Łužicy staja mnohe wužadanja tež na łužiske komuny, a to nic jenož nastupajo hospodarstwo a dźěłowe wiki, ale wosebje tež hladajo na to, kak budźe w přichodźe móžno, so zastarać z milinu. Hdyž budu za nimale dwaceći lět milinarnje přestać z brunicy milinu dźěłać, budu hinaše formy­ produkcije miliny zastaranje wjesnych kónčin zawěsćić dyrbjeć. Ma-li so to bjez problemow zwoprawdźić, dyrbi so hižo nětko wo tym rozmyslować. Prěnje kroki do směra wužiwać alternatiwne formy energije kroča so w mnohich komunach.

Regionalnje so sami zastarać

Zabawna měšeńca stareho a noweho

pjatk, 14. februara 2020 spisane wot:

Měrćin Weclich prezentuje popularnu hudźbu w nowym šaće na jewišću

„klawěr – brewěr“ je hesło wosebiteho koncerta, na kotrymž chce znaty spěwytwórc Měrćin Weclich 29. februara a 1. měrca zhromadnje z projektnej hudźbnej skupinu a tójšto hosćimi w Budyskim Kamjentnym domje přerěz­ serbskeje popularneje hudźby prezentować. Bosćan­ Nawka je so z nim rozmołwjał.

Knježe Weclicho, hdy sće zakładnu mysličku za koncert zrodźił a što za tym tči?

nawěšk

SERBSKE NOWINY podpěruja:

Novi Sad – kulturna stolica Europy

nowostki LND