W Drježdźanskej Wulkej zahrodźe je tuchwilu jónkrótna wustajeńca přistupna. Wot 6. awgusta wabi wona wopytowarjow do tamnišeho palaisa, a to hišće hač do klětušeho 8. januara. Tele dny je takrjec połčas přehladki „Notre-Dame de Paris – katedrala pućuje po swěće“. Drježdźany su jeje prěnja stacija w Němskej. Po tym zo měješe premjeru na swětowej wustajeńcy Expo w Dubaiju, bě wona w Parisu, we Washingtonje a dalšich dźewjeć městach na štyrjoch kontinentach widźeć.
Nětko Drježdźany. W palaisu we Wulkej zahrodźe kročiš po přestrjencach, kotrež runaja so špundowanju hrodu. Z tak mjenowanym „histoPadom“ w ruce wotkrywaš sej wot jedneje stacije k dalšej stawizny wuznamneje katedrale w francoskej stolicy. Słyšiš rjemjeslnikow z 12. lětstotka, kak woni štomy za jeje twar wobdźěłuja. Sy pódla na krónowanskej swjatočnosći Napoleona a dyrbiš bohužel tež přihladować, kak so wulkotne twarjenje pali.
Njedawno přeprosychu nas naši čěscy přećeljo na wopyt škleńčernje do Kunratic pola Cvikova. Za dobru hodźinu sej tam dojědźechmy. Wustupiwši z awta njewědźachmy, hdźe najprjedy hladać. Krasna „škleńčana zahroda“ so zboka nas wukuli. Kaž w Alicinym dźiwotwornym swěće: štomy z wijatymi so hałuzami a pisanymi płodami, škleńčane kerki kaž w zymskim raju, fantastiske rostliny, raki a rački, kraki, na flamingow podobne twórby a wjele wjace. Wšitke tute wuměłske dźěła steja mjez přirodnymi rostlinami, tak zo jedne to druhe wudospołnja a wuběrnu jednotu twori. Po šćežkach dundajo dachmy bajkojty swět na so skutkować.
Pohlad do škleńčernje
Njezapomnity to kónc tydźenja, kotryž dožiwi cyłkownje 28 studowacych towarstwa Sorabije Lipsk spočatk septembra. Zhromadnje podachu so mjenujcy na swój prěni wulět do čěskich Kytlic (němsce: Kittlitz). Z wjacorymi awtami sej tam pjatk popołdnju do pensije „Olivín‟ dojědźechu. Po tym zo běchu so studowacy mjez sobu witali a swoje wačoki w ferialnych budkach wotstajili, dachu so do zhromadneje wječerje. Scyła běše jědź tón kónc tydźenja jara mnohostronska, dokelž běše kóždy jednotliwc něšto wot doma sobu přinjesł. Někotři napječechu tykanc, tamni běchu wosebitu solotej spřihotowali a zaso tamni nahromadźichu płody a zeleninu ze swójskeje zahrody.
Rejujo sćoplichu so młodostni w skupinkach za dźiwadźelniske zwučowanja pod nawodom Clemensa Bobki (nalěwo). Čěski awtor Jindřich Vacek čitaše sobotu wječor ze swojeje knihi wo tym, kak je Serbow we Łužicy dožiwił. wobraz 2: Dźakny dar serbskich studowacych
z łužiskim mjedom a drjewjanym lipowym łopješkom za Společnost přátel Lužice. Pod nawodom Michała Donata a Theje Čórlichec přewjedźe studentski chór w Praze swoje prěnje proby za schadźowanku.
Fota: Lukáš Novosad (1), Pětr DźisławkPo Božej mši ze serbskim podźělom so łužiska skupina před cyrkwju k fotu zestupa.So w Praze
na schadźowanku přihotowali
Serbska hudźbna skupina
Brankatschki
je minjeny kónc tydźenja we Wojerecach na Krabatowych wikach wustupiła. Druhi raz su so tute w Zusowym měsće wotměli. Nimo serbskeje hudźby pokazachu tam tež serbsku narodnu drastu z Wojerowskeje kónčiny kaž tež nowu, modernu drastu. Na wobrazu widźimy dźěl wobsadki Brankatschkow: Wotlěwa su to Krystof Cyž, Syman Hejduška a Dawid Cyž. Tekst a foto: Krystof Cyž
Běh wo pokal Alojsa Andrickeho njeje póndźelu jenož kopicu dźěći do Radworja přiwabił, ale tež syłu młódšich a staršich młodostnych. Na najwšelakorišich distancach běchu dobyćerjo w starobnej skupiny młodostnych Ben Grubert z Chasowa (4 000 m, hólcy, U18), Emelie Wagnerec z Pěskec (2 000 m, holcy, U16), Anika Zarjeńkec z Hórkow (4 000 m, holcy, U18), Damian Jurk z Hórkow (2 000 m, hólcy, U16) a Nick Kutschke z Wulkeje
Dubrawy (6 000 m, mužojo, U20). Tekst a foto:
Konstantin Hrjehor
W Drježdźanach zahajichu serbscy studenća nowy zymski semester z měšćanskej rallye,
w Lipsku su so młodźi Sorabisća zaso k tradicionelnemu wobrazej zestupali. Profesor Edward Wornar, direktor Lipšćanskeho Instituta za sorabistiku, je tónkróć nimo dweju noweju studentow wučerstwa tež studenta a studentku ze słowjanskeho wukraja jako stipendiatow Załožby za serbski lud witał.
Matej Dźisławk
Čłonojo Młodźinskeho
zetkawanskeho centruma
w Serbskich Pazlicach su po wjesnym swjedźenju w juliju tež zaso party při wjesnym haće na nohi stajili. Na dwěmaj dnjomaj přichwatachu zaso wjacore sta młodostnych do serbskeje wsy. Pjatk wječor piskachu tam hłownje party-hity z 1990tych a 2000tych lět, sobotu potom hnydom wjacori tačelowjerčacy
aktualnu techno- a party-hudźbu wotpiskachu. Młodostni ze Serbskich Pazlic, kotřiž zestupachu so do swjedźenja k zhromadnemu skupinskemu wobrazej, běchu znowa chětro spokojom z kóncom
tydźenja! Tekst a foto: Lea Kralec
My čěšćinarjo 9. lětnika podachmy so w juniju do čěskeje stolicy. Rano zetkachmy so wšitcy při Budyskim dwórnišću. Po dwěmaj hodźinomaj dojědźechmy do Libereca. Tam mějachmy chwile, sej wulkotne čěske město bliže wobhladać. Z luksusowym busom podachmy so dale do Prahi. Prjedy hač so prěnim přednoškam wěnowachmy, kotrež dyrbjachmy našim sobušulerjam wo zajimawostkach města prezentować, móžachmy sej wšitcy něšto k wobjedu popřeć. Po přednoškach na Wjacławskim naměsće a před starej operu započinaše so hrimać a dešćować. Podachmy so do studentskeho internata a tam rozdźělichmy stwy. Ćmowe mróčele nad Prahu so zhubichu a z dobrej naladu a motiwaciju nawróćichmy so do centruma. Tam pokročowachmy z wuskušowanjom „Kralowskeho puća‟. Slědowachu přednoški wo časniku Orloju, Karlowym mosće, Narodnym dźiwadle a Hrodźe. Puć na Hradčany běše tróšku napinacy, ale wulkotneho wuhlada dla so próca wudani. Wječor dachmy sej tradicionalnu čěsku jědź, potajkim „smaženy sýr z bramborem a tatarskej omačku‟ zesłodźeć. Wučerpani nawróćichmy so do internata.
Myslimy-li na pućowanja, jewja so w myslach hnydom hory, doły abo łuki. Na kóždy pad njeskónčna přiroda.