SkupinaAstronawt

pjatk, 01. oktobera 2021 spisane wot:
1

2

3

1. Prjedy hač je skupina Astronawt swój nowy spěw w Mnichowje zahrała, dósta rapper Pětr Dźisławk hišće poslednje pokiwy z režije. 2. Jurij Hantuš a Pětr Dźisławk so w pře- stawce tež raz na městno sydnyštaj, hdźež hewak prominenća ­tuteje show sedźa, zo bychu na najwšelakoriše prašenja wotmołwili. 3. Tež zhromadny skupinski wobraz jako dopomnjenka na tute jónkrótne dožiwjenje wězo falować njesmědźeše.
show sobu wuhotowała

Spočatk awgusta běch zhromadnje ze swojej hudźbnej skupinu Astronawt w Mnichowje. W tamnišim filmowym studiju Bavaria bu show z titlom „Das große Deutschland-Quiz“ nahrawana. Format wusyłanja je tajki, zo maja wjacori prominentni na prašenja moderatorki Sabiny Heinrich wotmołwjeć. Temy zaběraja so z regionalnymi a nadregionalnymi zajimawosćemi Němskeje. Show na sćelaku ZDF je poměrnje nowa a hakle ­lětsa zaběžała. Spočatk awgusta su jedne z přichodnych wusyłanjow natočili.

Hižo 6. klubowa party při haće

pjatk, 01. oktobera 2021 spisane wot:
Foće: Lea Kralec

Srjedź septembra je Serbskopazličanska młodźina znowa němskich a serbskich ­młodostnych na swoju klubowu party při haće přeprosyła. Kónctydźenski spek­takl zahaji so pjatk z flatrate-party. Wo hudźbne wobrubjenje postarachu so DJjojo z młodźiny­ sameje. Sobota bě hłowny dźeń zarjadowanja. Na main-floorje wjerćachu ­hnydom wjacori DJjojo swoje tačele – SCALA, SimplexX, Don Promillo a nowačkaj JanH™ a DJ Lehmenn’s. Frank Wjesela běše na tamnym jewišću skerje za wšelke šlagry a partyjowe klasikarje zamołwity. Pjatk měješe mjenje rjany kónc. Skupina młodostnych – wočiwidnje prawicarjo – naškarachu tam njeměr a je wopytowarjow křiwdźiła. Zamoł­wići ­zarjadowanja wołachu na to policiju k pomocy. Wona je wječor zakónčiła a so tež zwonka ležownosće wo měr postarała. Jakub Langa

Serbscy jěcharjo wuspěšni

pjatk, 01. oktobera 2021 spisane wot:
Foto: ­Konstantin Hrjehor

Za serbskich čłonow konjaceho spor­­toweho towarstwa „Při Klóšterskej ­wo­­­dźe“ Pančicy-Kukow běše domjace jěchanske wubědźowanje před dwěmaj tydźenjomaj w Hórkach přewšo wuspěšne. Křesćan Za­hrodnik bu z kobłu Namibiu (wo­braz) sakski wicemišter w mnohostron­skim jěchanju. Třeće městno docpě Jakub Bobka. Marlene Matikec doby mnohostronske jěchanje klasy E, Britta Zahrodnikowa pak bu prěnja w dre­suro­wym pruwo­wanju klasy A. W mustwo­wym hódnoće­nju stejachu Franci­ska Bobkec, ­Mar­­lene Matikec, Paulina Borowitzec a Mayte Het­man­kec cyle ho­rjeka na podesće.

Konstantin Hrjehor

Seminar we Łužicy přewjedli

pjatk, 01. oktobera 2021 spisane wot:
Foće: Jakub Wowčer

Serbske młodźin­ske towarstwo Pawk je swój štyridnjowski ­seminar w septembrje z mło­dost­nymi ­aw­tochtonych mjeńšin Něm­skeje pře­wjedł. Mjez sydom wobdźělnikami běchu tež zastupjerjo mjeńšiny Danow w Němskej a Saterskich Frizow. Młodostni rozjimachu ­temu diskriminacije, w kotrej formje so wona jewi a kak jej napřećo stupiš. Nimo sobotneho Powerserba wulećachu sej wobdźělnicy nje­dźelu do Delnjeje Łužicy. Seminar bě Pawk ­hro­madźe z Młodźinu europ­skich narodnych mjeńšin MENS a z pomocu Domo­wi­­ny orga­nizo­wał.

Jakub Wowčer

Fota: Jurij Bjeńš (2), Feliks Haza (1)Z a prěni a druhi lětnik Workle­čan­­skeje za­kładneje šule běše minje­ny pjatk cyle rja­ny dźeń, do­kelž witachu w šuli wosebite­ho hosća. Z Něm­sko-Serbskeho ludoweho dźi­wadła bě mje­nujcy čmjeła Hana (hraje Ju­lija Klingnerec) puć k Wor­klečanskim wuk­njacym na­makała, zo by jim pokazała, kak sej ­wo­na a jeje přećeljo do dowola wuleća. Tež tónkróć ju dźěći zaso lubowachu, so njesměrnje wótře smějachu a jej ze zahoritosću sćěhowachu. Wulka chwalba na tutym městnje za wulkotny dźi­wadźelniski wukon. Jurij Bjeńš

Čmjeła Hana bě sej njedawno do Ralbic wulećeła a rozprawješe dźěćom tamnišeje pěstowarnje wo přihotach na jeje dowol. Tón wšak tež wona, po dołho trajacych wobmje­zo­wanjach koronawirusa dla nuznje trjeba. A tež hosći měješe čmjeła Hana na premjerje w Ralbicach sobu. Zmij Domabor powě­daše wo Galapagosu, Pinguin Kurt wo se­wjernym čopje a Hana hotowaše so na jězbu z dowolowej łódźu po wulkim morju.

W zelowej zahrodźe byli

pjatk, 01. oktobera 2021 spisane wot:
Foto: Jurij Bjeńš
Hižo w druhim šul­skim tydźenju poby 3. lětnik Wor­klečanskeje zakład­neje šule w zelowej zahrodźe w klóštrje Marijina hwězda. Rano podachu su šulerki a šulerjo z rjadowniskej wučerku knjeni Borboru Bukowej a šulskej wjednicu Sabinu Hejdušcynej pěši do Pančic-Ku­kowa, zo bychu tam wjac wo neplach nazhonili. Projekt nawjedo­waše knjeni Meixnerowa. Dźěći přihotowa­chu sej mjez druhim sami dobry wobjed z neplow a podachu so nasyće­ni kaž tež mudriši zaso na dompuć. Jurij Bjeńš

Kak su Tři Žony swoje mjeno dóstałe

pjatk, 24. septembera 2021 spisane wot:

Max Grundmann bě original. W jeho Běłochołmčanskej hospodźe „Tři lipy“ knježeše zwjetša wulkotna nalada. Wón pochadźeše z – we Wojerecach a wokolinje – derje znateje a česćeneje swójby wobchodnikow, předewzaćelow a rjemjeslnikow. „… wysokozrosćena postawa ze šěrokimaj ramjenjomaj, korpulentna hač do wysokeje staroby; muž, kiž je hubu stajnje na prawym blaku měł. Swojim hosćom napřećo bě, tak so praji, přeco jara šćedriwy“, piše Werner Thomas w swojej knize „Powěsće a dalše sta­wiznički wokoło a z Běłeho Chołmca“ wo bywšim hosćencarju, kiž bě so z kolesom jěducy stajnje z hrónčkom „Purumpumpum, der Grundmann kummt“ připowědźił. Wšědny dźeń zmištrowa ze šćipatym jazykom a (sebje)ironisce. „Wón přežiwi čas kejžora a je so njehladajo někotrehožkuli wušparanja tež přez dobu Hitlera předrěł“, Thomas dale piše, „… zwjetša hódnoćachu jeho hdys a hdys prowokowace wustupowanje jako žort.“ To njeje pozdźišo za čas Němskeje demokratiskeje republiki hinak było. Postajenja knježerstwa, wólby abo tež wšědny dźeń w hospodźe komentowaše wón na cyle swojorazne wašnje.

Rentnar a što potom – wuměnkarsku swobodu wužiwać abo wužadanje přiwzać (33)

Ludźi ze słódnym mjedom zapleńčić, so zamołwiće wo wěstotu druhich starać a lubowarjow chóroweho spěwanja z lóštnymi pěsnjemi zawjeselić ma mjeztym 80lětny agilny Pěskečan Beno Pólk za samozrozumliwe. Tele tři wužadace ­činitosće wobhladuje wón jako nošne stołpy swojeho wuměnkarskeho derjeměća. Formował a skrućił bě sej je z přikubłanymi kajkosćemi z časa dźěćatstwa.

Narodźiwši so w druhim lěće suroweje Druheje swětoweje wójny nazhoni jako najmłódše mjez sydom Pólkec dźěćimi, što rěka pod chuduškimi poměrami a přiwšěm z lubosću maćerje kubłany wotrosć. Nan je dźě so hakle 1949 z wójnskeje jatby domoj wróćił. Derje dopomina so Beno Pólk hišće na swój šulski čas. Sedmjo nóžkowachu při kóždym wjedrje – při rjanym wjedrje bosy a hewak w črijach z drjewjanymi pódušemi – do Njebjelčanskeje šule. Nazymu ducy domoj dachu sej za Serbskimi Pazlicami stajnje prawu rěpku słodźeć, a hłódny brjuch bě změrowany.

Potencial wobsteji a je wuznamny

pjatk, 24. septembera 2021 spisane wot:

Wobchad z regionalnej twarskej kulturu gmejnam w biosferowym rezerwaće Hornjołužiska hola a haty wulke wužadanje

Tykowane chěže wotbłyšćuja w biosferowym rezerwaće Hornjołužiska hola a haty za region typisku twarsku kulturu. W kotrej měrje pak wone hišće aktualny wobraz tamnišich komunow postajeja? Abo što gmejny činja, zo bychu pomhali wonu twarsku substancu zachować, tele swědstwa hornjołužiskeje wjesneje architektury wonkownje saněrować a zdobom nutřka načasnym narokam žiwjenja wotpowědować?

Za skupinu studowacych w masterskim směrje Regionalne wuwiće a přirodoškit Wysokeje šule za naslědne wuwiće w braniborskim Ebers­waldźe bě wot zarjada biosferoweho rezerwata namjetowana tematika „Sydlenske wuwiće a za region typiske twarjenje w biosferowym rezerwaće“ přewšo wužadowaca. Tak zaběrachu so z njej we wobłuku studentskeho projekta. Za čas koronapandemije su woni ze Stróže hišće młodu tradiciju zhromadneho dźěła mjez partneromaj dale wjedli.

W serialu „Na serbskich slědach

po Praze“ wjedźe bywši Pražan

Marek Krawc čitarjow na městnosće

w čěskej stolicy, kotrež maja

tež za nas Serbow wulki wuznam.

Dźensa: Klementinum

Po Praskich Hradčanach je Klementinum najrozsahliša skupina baroknych twarjenjow w čěskej stolicy. Do lěta 1556 běchu 32 małych domow, sydom statokow, tři cyrkwje, dwě zahrodźe kaž tež jedyn klóšter na jeho městnje blisko Karloweho mosta. Po zasydlenju jezuitow 1556 wu­zwolichu sej jich zastupjerjo tónle powabliwy blečk wosrjedź stareje Prahi, zo bychu sej tam swoje nadobne sydło natwarili, kotrež ma hač do dźensnišeho raz kruteho, wot wonkowneho swěta wotzamknjeneho hrodu. W jeho nutru pak knježeše a knježi nadal čiłe wědomostne žiwjenje.

Serbska debata

nowostki LND