Konjacy sportowcy wubědźowachu so kónc tydźenja w Kulowje. Nimo znatych jěcharkow a jěcharjow stejachu na startowych lisćinach znowa wjacore njeznate mjena młodych koni. Halena Jancyna je so w tym zwisku raz pola Chróšćanskeju konjaceju sportowcow Křesćana Zahrodnika a Lukasa Wenderotha wo dźěle z młodymi konjemi wobhoniła.
Zelena sezona je so hižo před wjacorymi tydźenjemi zahajiła. Kak dotal na nju zhladujetaj?
K. Zahrodnik: Powšitkownje sym jara spokojom. Sym na wjacorych turněrach hižo někotre prědnje městna docpěł.
Hdyž dorostowe konje wuzwolitaj, dyrbitaj zawěsće na wěste wěcy dźiwać.
K. Zahrodnik: Najwažnišo je, zo wěm, što chcu z konjom činić: Chcu so z nim na turněrach wobdźěleć? Kak daloko chcu z nim přińć? Kotru jěchansku disciplinu najradšo mam? Po tym sej rasu konja wuzwolu. Tež genetiku konja dyrbju sej wobhladać. Potom so wězo wuspytam a hladam, hač so na konju derje čuju.
Kelko časa trjebataj za wukubłanje konja?