Jubilejny 25. jěchanski a skakanski turněr w Hórkach
Konjace sportowe towarstwo Při Klóšterskej wodźe Pančicy-Kukow je minjenej sobotu a njedźelu w Hórkach swój jubilejny 25. jěchanski a skakanski turněr přewjedło. Mjez wobdźělnikami bě tež něhdyši olympiski dobyćer a swětowy mišter Frank Ostholt ze sewjerorynsko-westfalskeho Warendorfa. Na woběmaj dnjomaj widźachu wjacore sta ludźi cyłkownje 18 pruwowanjow z něhdźe dwěsćě sportowymi konjemi, ze 120 jěcharkami a jěcharjemi. Mjez sportowcami běchu z dwójnikomaj Francisku a Felicitas Bobkec z Miłoćic, Jakubom Bobku z Worklec, Pětrom a Clemensom Bobku z Miłoćic, Katju Žurec z Pančic-Kukowa, Hanu Brězanec z Prawoćic, Stefanie Žurowej z Worklec a Křesćanom Zahrodnikom z Chrósćic tež wjacori serbscy starterojo, kotřiž wojowachu ze swojimi konjemi we wšelakorych kategorijach wo dypki. Franciska Bobkec z Miłoćic na přikład docpě z konjom Sweetyjom w kombinowanym pruwowanju druhe a sotra Felicitas z Diddlom 5. městno.