Sport (30.09.16)

pjatk, 30. septembera 2016 spisane wot:

Wrotarjo trenuja

5. oktobra zarjaduje sportowe towarstwo Benjamin Rudolph z.t. w koopera­ciji z Budissu Budyšin treningowy dźeń wrotarjow. Po hesle „Trenować kaž profije“ njech so wrotarjo raz dźeń kaž profije čuja. Cyłkownje změja w Budyšinje tři treningowe jednotki w poskitku. Započatk budźe we 8.30 hodź. na arealu Budissy Budyšin na Neujowej promenadźe 1. Dalše informacije pod www.torwartschule-rudolph.de

Viktoria při wysokim saku

We wobwodnej volleyballowej lize přewjedźe prěnje muske mustwo Viktorije Worklec sobotu hrajny dźeń w Ralbičanskej ćěłozwučowarni. W 14 hodź. nastupi wone přećiwo Běłej Wodźe, wokoło 16 hodź. přećiwo Mittelherwigsdorfej. Wšitcy su wutrobnje přeprošeni.

Wubědźowani woborow

Wohnjowi wobornicy wubědźuja so jutře a njedźelu hišće raz: jutře wot 15 hodź. w Róžeńće a zajutřišim w samsnym času we Worklecach. Tele wurisanje budźe zdobom finalne wo pokal zarjadniskeho zwjazka Při Klóšterskej wodźe.

Kónctydźenska kopańca

01.10. 15:00 Wojerowski FC

 – Sokoł Ralbicy/Hórki

02.10. 15:00 SJ Chrósćicy – Laubegast

02.10. 15:00 ST Radwor – FSV Łuty

02.10. 15:00 Mar. hwězda – SJ Njebjelčicy

12. Budyski běhz wutrobu

štwórtk, 29. septembera 2016 spisane wot:

Šulerjo a wučerjo Serbskeho gymnazija Budyšin (SGB) su hižo wot spočatka pódla a naběžachu sej lětsa wjace hač 2 800 eurow.

Při rjanym słónčnym wjedrje wotmě so hižo 12. Budyski běh z wutrobu we hłownej organizaciji Ludoweje banki Budyšin. Znowa nastajichu wobdźělnicy wjacore rekordy. Wjace hač 2 000 sportowcow Budyskich gymnazijow kaž tež Wjele­ćanskeho a Biskopičanskeho gymnazija a powołanskeje šule za hospodarstwo a techniku zmištrowachu prěni raz wjac hač 15 000 kołow, kóžde něhdźe 700 metrow dołhe. Jednotliwe mustwa wobstejachu z třoch běharjow, kotřiž so wotměnjejo jednu hodźinu za dobry zaměr angažowachu: tónkróć za Němski dźěćacy škitny zwjazk městne zjednoćenstwo Budyšin. Dalši rekord wobsteješe w naběžanych skoro 28 000 eurow. Z tychle pjenjez nałoža 80 procentow za projekty Němskeho dźěćaceho škitneho zwjazka. Zbytk rozdźěla na sobu skutkowace šule.

Prěnje domjace dobyće sezony

štwórtk, 29. septembera 2016 spisane wot:

ST Marijina hwězda

– Arnsdorfske KT 2:0 (0:0)

Zestawa domjacych: O. Schmidt – Wróbl, Łušćanski, Jurš, Lipič, P. Schmidt, Bělk (66. Škoda), O. Hawš, Smoła, Winkler, Pesch­mann

Na šestym hrajnym dnju wokrjesneje ligi běchu koparjo z Arnsdorfa do Pančic přijěli. Trenar domjacych Tobias Škoda dyrbješe mustwo trochu přestajić, dokelž běchu někotři hrajerjo wupadnyli. Wosebje pak chcychu woni před swójskim publikumom skónčnje prěnje dobyće žnjeć. Wobaj cyłkaj nerwoznje započeštej, bórze pak hosćićel režiju přewza. Prěni naspomnjenjahódny nadběh zapisachmy sej w 24. min. Přez staciji Matijas Łušćanski a Stanij Smoła dósta so bul ke Křesćanej Bělkej, kiž trjechi z kónčkojteho kuta jenož wonkowny sak. Najebać dobre móžnosće přez Smołu (30.), Bělka (35.), Paula Schmidta (36.) a Falka Peschmanna (41.) pak hač do přestawki žane wrota njepadnychu. Znowa pokazachu so słabosće při zakónčenju nadběhow.

Serbske lochkoatletki lětsa najlěpše

srjeda, 28. septembera 2016 spisane wot:

Hižo někotre lěta wobdźěla so Serbski gymnazij Budyšin (SGB) na lochkoatletiskich wurisanjach we wobłuku wubědźowanja „Młodźina trenuje za olympiju“, a to dotal stajnje z dobrym wuslědkom. Loni je sej holče mustwo we wuchodosakskim finalu druhe městno zawěsćiło, a to z jeničce dźesać dypkami zastatka.

Lětsa witaše rjane słónčne wjedro wšitkich sportowcow na Budysku Młynkec łuku. Hnydom w prěnim wubědźowanju poradźi so Terezy Pöpelec wusahowacy běh na 100 m (12,67 sek.), štož je zdobom nowy šulski rekord. Třeća najlěpša bě Kira Hrjehorjec z 13,4 sek. We wysokoskoku docpě Lea Krječmarjec najlěpši wuslědk wšitkich holcow. Wona přeskoči łatu 1,51 m wysoko. Holcy wubědźowachu so hišće w kulostorku, dalokoskoku, mjetanju hlebije, w staflowym běhu a w běhu na 800m.

Prěni raz wu­bědźichu sej holcy SGB prěnje městno a po­jědu klětu na sakske krajne finale do Kamje­nicy.

Kónčny staw lětušeho šulskeho loch­koatle­tiskeho wubědźowanja „Młodźina trenuje za olympiju“ w holčej starobnej klasy II je slědowacy:

1. Serbski gymnazij Budyšin (6 495 dyp.)

2. Gymazij Scholl Lubij (6 364)

3. Foucaultowy gymnazij Wojerecy (6 362)

Dalši derby z poražku so skónčił

srjeda, 28. septembera 2016 spisane wot:

Sokoł Ralbicy/Hórki II

– Rakečanske ST II 1:3 (1:1)

Zestawa domjacych: Hrjehor – Šnajder, T. Matka, Bogusz, Materna, M. Matka, Šołta, Čórlich, Kurjat, Šmit (67. Šwejda), Jakubaš

Po wysokej poražce w Radworju steješe dalši koparski derby na hrajnym planje. Sokoł Ralbicy/Hórki II wočakowaše Rakečansku rezerwu. Přećiwnik bě nimo Konječana Šołty tež hišće z Korchom a Čornakom z prěnjeho mustwa zesylnjeny. Domjacy hrajachu najprjedy z wěsteho škita a łakachu na zmylki přećiwnika. W 2. min. bu Jakubaš rjenje swobodnje hraty a měrješe so sam na wrota, ale zwrěšći. Na tamnej stronje docpě dołha třělwa nadběhowarja a wrotar Hrjehor zakroči ze sylnej paradu. Po poł hodźinje Sokoljo nawjedowachu. Rakečanski kopar bě swojeho wrotarja nahrał. Jakubaš to spózna, wulišći sej bul a wrotarja přewiny. W 40. min. pruwowaše Korch Hrjehorja, kiž zamó k róžkej wotwobarać. Do połčasa pak dyrbješe tola hišće zady so přimnyć.

Wuslědki (28.09.16)

srjeda, 28. septembera 2016 spisane wot:

Wokrjesna koparska liga stafla II

Hory II – Mód.-běli Njeswačidło 0:2 (0:1)

HZ Wulke Ždźary – ST Radwor 3:3 (2:1)

Ralbicy/Hórki II – Rakecy II 1:3 (1:1)

1. HZ Wulke Ždźary 6 19  :  9 16

2. ST Ćisk II 6 14  :  5 15

3. ST Radwor 6 21  :  8 13

4. HZ Łaz/Běły Chołmc 6 19  :  8 10

5. ST Lubuš 6 10  :  8 10

6. Rakečanske ST II 6 9  :  12 10

7. Wojerowski FC II 6 12  :  17 9

8. LSV Bluń  6 11  :  8 8

Klewernosć pobrachowała

wutora, 27. septembera 2016 spisane wot:

FC Energija Choćebuz

– Budissa Budyšin 1:0 (1:0)

Zestawa domjacych: Meyer – Baude, Matuwila, Stein, Schlüter, Kruse, Putze (62. Mamba), Ziegenbein, Viteritti, Weidlich (46. Gehrmann), Förster (62. Svab)

Zestawa hosći: Wohlfeld – Kolan (40. Hänsch), Patka, Klippel, Heppner, Baudis, Pfanne, Milde, J. Müller, Barnickel (72. Šisler), Barth (72. Němec)

Wosebje w kónčnej fazy hry pola Energije Choćebuz stejachu koparjo Budissy Budyšin před wulkej překwapjenku. Ta pak nochcyše so jim poradźić. Nimale bychu woni wulkemu faworitej w domjacym stadionje dypkaj wotewzali. Mustwo z Hornjeje Łužicy bě tež po zažnym zastatku, kotryž docpě Fabio Viteritti z rjanej třělwu do kuta (10.), dale do sebje wěriło. Hižo w prěnim połčasu běchu prěnje akcenty hosći widźeć. Bohužel pak je so kapitan Martin Kolan zranił (40.).

Prěnje tři dypki žnjeli

wutora, 27. septembera 2016 spisane wot:

Biskopičanski FV II

– SJ Chrósćicy 1:2 (1:1)

Zestawa hosći: Králíček – Schulze (46. Šiman), Cyž, Sentivan, Šafář, Dórnik, Młynk (64. Hillman), Runt (89. Dehn), Domaška, Gries, Věchet

Po štyrjoch poražkach dyrbjachu za koparjow Chróšćanskeje SJ w Biskopicach skónčnje dypki sydać. Domjacy, kotřiž­ běchu swój kader z wosom hrajerjemi prěnjeho mustwa zesylnili, steja a stejachu runja Chróšćanam w pincy tabulki. Biskopičenjo mějachu z wólnym kopom prěnju strašnu třělwu. Králíček pak bě na straži a zwjertny bul wyše łaty. Róžk zhłójčkowa hosćićel nimo wrotow. Mjeńšinje pozdźišo přeběža domjace lěwe křidło Chróšćansku defensiwu, ale Dórnik třělwu w poslednim wokomiku na wrotowej liniji wotpopadny. Po spěšnym konteru poradźi so Biskopičanam nawjedowanje (36.). Jich nadběhowar Bartosz Szymanski trjechi nisko do čorneho. Mjerzace to wrota, krótko do přestawki pak čěska dwójka Runt/Šafář zasłužbnje wuruna. Runt zběhny wólny kop mudrje wot wrotow preč. Šafář sej po kulowatu kožu doběža a třěli z wótreho kuta do saka k 1:1 (42.).

Wostudła partija jenož remis wunjesła

wutora, 27. septembera 2016 spisane wot:

SJ Njebjelčicy

– Hermsdorfske ST 1:1 (0:1)

Zestawa domjacych: Wićaz – Pawlik, Hommel, Haška, Hoelzel, Cyž, Lejnart, Šołta (50. Kubaš), Čornak, Korjeńk (56. Zeller), Janca

Při najlěpšich wonkownych wuměnjenjach wotměchu koparjo Njebjelčanskeje SJ na domjacym trawniku dypkowu partiju přećiwo postupnikej z Hermsdorfa. Přiwisnicy kaž tež přewodźerjo aktiwnych ličachu z třomi dypkami za domjacych. Štož pak so tu publikumej poskići, bě wšo druhe hač porjadna kopańca. Spočatnje nastachu dosć dobre šansy, ale nichtó z nazhonitych Njebjelčanow njebě kmany na wrota přećiwnika třělić. Tak wosta jenički strašny kop Gabriela Čornaka w 25. min. najlěpša akcija prěnjeho połčasa. Čornak pak trjechi jenož do łaty. Tak dóńdźe, kaž hižo někotři na kromje hrajnišća připowědźichu, w 45. min. k nawjedowanju hosći.

Wuslědki (27.09.16)

wutora, 27. septembera 2016 spisane wot:

Regionalna koparska liga

Lok Lipsk – FC Viktoria 2:2 (0:2)

RB Lipsk II – Schönberg 4:1 (1:0)

Energija Choćebuz – Budissa  1:0 (1:0)

1. Jena 8 22  :  1 24

2. RB Lipsk II 8 12  :  7 17

3. Hertha BSC II 8 13  :  10 16

4. Energija Choćebuz 8 11  :  5 15

5. BFC Dynamo 8 17  :  7 14

6. Lok Lipsk 8 13  :  8 14

7. Babelsberg 03 8 16  :  13 14

8. FC Viktoria 8 17  :  8 13

9. Berlinski AK 8 10  :  11 12

10. Nordhausen 8 11  :  14 10

11. Schönberg 8 11  :  16 10

12. Neugersdorf 8 13  :  11 9

13. Fürstenwalde 8 7  :  14 9

14. Auerbach 8 6  :  14 8

15. Budissa Budyšin 8 8  :  14 4

Serbska debata

nowostki LND