Złoto w regionalnym finalu na Budyskej Młynkec łuce.
Najwuspěšniše holče koparske mustwo w stawiznach Serbskeho gymnazija Budyšin (SGB) skwalifikowa so tydźenja třeći raz za krajne finale, a to w minjenych štyrjoch lětach. Po dobyću slěborneje medalje w juniju 2013 a šestym městnje w juniju 2015 pojědu serbske šulerki kónc meje 2016 znowa do Lipska.
Do Budyšina bě sej šěsć holčich cyłkow z wuchodneje Sakskeje dojěło, zo by we wobłuku šulskeho sportoweho wubědźowanja „Młodźina trenuje za olympiju“ regionalneho mištra zwěsćiło. Wulosowanje chcyše, zo hnydom w prěnjej partiji turněra faworitaj na cyłkowne dobyće mocy měrjachu. Koncentrowani startowachu holcy SGB a po dwěmaj mjeńšinomaj we wrotach Goethoweho gymnazija Biskopicy zaklinka. Tadeja Šeferec postara so wo nawjedowanje. Krótko po połčasu zwyši kapitanka Lea Krječmarjec na 2:0. Jeje mócnu flanku z lěweje strony njedocpě žana hrajerka a tež nic wrotarka. Krótko do wothwizdanja bě znowa Tadeja Šeferec na prawym městnje, jako přihrawku Karoliny Šrajterec direktnje k 3:0 přetwori.