FC Energiji powětr wušoł

srjeda, 26. apryla 2017 spisane wot:

Po wukonje sprawne 1:1 docpěł je regionalny koparski ligist FC Energija Choćebuz njedźelu doma přećiwo amateram Herthy BSC. Pózdnje nawjedowanje Strelija Mamby (77.) za FCE wurunachu runohódni hosćo z wobhladanjahódnym konterom w 85. min. Choćebuženjo pokazachu wosebje w prěnim połčasu wahawu hru, kotrejž pobrachowachu zasadźenje a tak wužiwajomne šansy.

Remis dźens tydźenja pola Berlinskeho AK je chowancam trenarja Clausa-Dietera Wollitza po zdaću poslednje nadźije rubił, načolnika z Jeny hišće z prěnjeho městna w tabulce storčić. Za kulisami FCE sonděruja zamołwići tučasnje aktualny kader a rozhladuja so po chuduškich wikach štwórteje ligi, zo bychu w nich za zesylnjenjom pytali. Wulke mzdy pak nowopřichady w Choćebuzu wočakować njesmědźa. To pytanje za woprawdźitymi zesylnjenjemi přidatnje poćežuje. Georg Zielonkowski

Šnóruje kopački w Hnašecach

srjeda, 26. apryla 2017 spisane wot:
Serbske koparki njehraja jenož na krajnej runinje wo dypki, ale tež na wokrjesnej, kaž tule rodźena Prawočanka Bernadet Brězanec (naprawo). We wokrjesnej lize wona w žónskim koparskim mustwje ST Hnašecy-Dobruša sobu za bulom honi. Dotal je cyłk, kotryž hraje na małym polu, trójce dobył, štyri razy remis docpěł a dźewjeć króć podležał. Foto: Jörg Stephan

Rezerwa bykow čisło přewulka była

srjeda, 26. apryla 2017 spisane wot:

RB Lipsk II

– Budissa Budyšin 4:1 (2:0)

Zestawa hosći: Große – Heppner, Iliadis, Hausdorf, Salewski, Hoßmang, Kloß, Rosendo (83. Němec), Hermann (72. Žuljević), Barth (83. Šisler), Müller

Z někotrymi starosćemi w zestawje je so Torsten Gütschow z regionalnym koparskim ligistom Budissu Budyšin k RB Lipskej II nastajił. Dorost zwjazkoweho ligista pak hosćom wjele njedowoli. Woni njemějachu nimale žanu šansu, rezerwa Lipšćanskich bykow porno tomu tójšto. Zběhnjeny bul Johna-Patricka Straußa přez Mareka Großu wjedźeše k 1:0 (27.). Krótko do połčasa zwyši Timo Mauer za domjacych na 2:0 (45.).

Narěč trenarja Torstena Gütschowa w přestawce koparjow Budissy hišće raz motiwowaše. Spěšnje poradźi so hewak słabym Budyšanam přez Daniela Bar­tha, zastatk na 2:1 pomjeńšić (49.). Mustwo ze sprjewineho města hraješe nětko lěpje a nadźiješe so hišće wurunanja. Hrajerska klasa RB-youngsterow pak so přesadźi. Mauer třěli 3:1 (75.) a Federico Palacios 4:1 (88.). Za Budyšanow bě rezerwa bykow cyle jednorje čisło pře­wulka. Clemens Werner

Prěnje dobyće druheje połserije

wutora, 25. apryla 2017 spisane wot:

FSV Budissa Budyšin

– 1. FC Lok Lipsk 2:1 (0:1)

Zestawa domjacych: Große – Kolan, Patka, Hausdorf, Heppner, Salewski (88. Němec), Hoßmang, Kloß, Müller (59. Hermann), Rosendo, Barth (77. Iliadis)

W druhej z třoch hrow w tak mjenowanym jendźelskim tydźenju wočakowaše Budissa na Młynkec łuce koparjow 1. FC Lok Lipska. Team trenarja Torstena Gütschowa běše sej předewzał skónčnje raz dobyć. Pavel Patka móžeše ze škitnej masku w mjezwoču domjacemu škitej trěbnu stabilitu dać. We wrotach steješe tónkróć Marek Große a pokaza přeswědčiwy wukon. Kaž hižo často startowaše Budissa derje do hry a měješe prěnje móžnosće, nawjedowanje docpěć. Daniel Barth pak njemóžeše přetworić. Přichodnu wrotowu scenu bě Barth spřihotował, wotpołožiwši bul Ezequielej Horacijej Rosendźe, kiž jón nimo wrotow třěli. Hosćo swoju prěnju składnosć hnydom wužichu. Daniel Becker docpě 0:1 (22.) ze 16 metrow. Znowa běchu Budyšenjo po někotrych­ dobrych šansach w zastatku.

Lěpši byli a přiwšěm jenož remis

wutora, 25. apryla 2017 spisane wot:

Arnsdorfske KT

– ST Marijina hwězda 0:0

Zestawa hosći: O. Schmidt – Wróbl, Njek, Škoda, R. Hawš, Peschmann (89. Čornak), O. Hawš, T. Jurš, P. Schmidt, Winkler, Pakoßnick (79. D. Jurš)

K dalšej směrodajnej partiji poda so prěnje koparske mustwo Sportoweho towarstwa Marijina hwězda do Arnsdorfa. Bohužel pak dosahaše sobotu na kóncu jenož k bjezwrotowemu remisej, byrnjež hosćo přez dołhi čas hru postajeli. Z wěsteje defensiwy postarachu so woni wo někotre rjane nadběhi. W 4. min. namaka Oskar Hawš w wrotarju domjacych swojeho mištra, w 22. min. bu Paul Schmidt w poslednim wokomiku blokowany. Wobě móžnosći bě Alex Winkler přihotował. Pančičenjo ćišć dale zesylnichu, tak zo měješe hosćićel w škiće chětro wjele dźěła. W 26. min. prasny třělwa Tomaša Jurša na nutřkownu žerdź. Dźesać mjeńšin do połčasa njebě fortuna znowa na jich stronje, a Jakob Pakoßnick sadźi wólny kop do aluminija.

Djumo dwoje wrota třělił

wutora, 25. apryla 2017 spisane wot:

FC Hornja Łužica Neugersdorf

– FSV Budissa Bautzen 2:0 (1:0)

Zestawa hosći: Wohlfeld – Kolan, Iliadis (86. Šisler), Hausdorf, Heppner, Milde, Pfanne (31. Kloß), Hoßmang, Salewski, Němec (65. Müller), Rosendo

Z derbyja w Neugersdorfje bychu sej koparjo Budissy Budyšin rady dypk sobu wzali. Prěnje móžnosće woni tež mějachu. Daloka třělwa Franza Pfanny pak dźěše snadnje nimo wrotow. Někotre mjeńšiny pozdźišo poda so samsny hrajer sam na wrotarja domjacych, zo by jeho přewinył, njebě pak wuspěšny. Hosćićeljo sčinichu to lěpje a docpěchu přez Bocara Djuma nawjedowanje (22.). Dalši dyr do tyła dósta Budissa w 31. min. Pfanne bu foulowany, so při tym zrani a dyrbješe so wuměnić dać. Krótko do połčasa móhli hosćo hišće wurunać. Třělwu Paula Mildy pak Neugersdorfski wrotar wotpopadny.

W zwjazkowej koparskej lize muži hraje mustwo RB Lipsk super sezonu; mało ludźi pak wě, zo tam w Lipsku tež rodźena Budyšanka Aline Wegerdt za bulom honi. Ze 17lětnej łužiskej zastupjerku žonjaceho mustwa RB Lipsk je so za Serbske Nowiny Hanspeter Benad rozmołwjał.

Hdźe sće kopańcu hrać započała?

A. Wegerdt: To bě w mojim ródnym měsće pola Budissy (po tym hraješe wona pola FFV Lipsk, přisp. red.)

Što běchu dotalne wjerški Wašeje karjery?

A. Wegerdt: Z koparskej wubranku Sakskeje smy w starobnej skupinje turněr Sewjerowuchodneho koparskeho zwjazka Němskeje dobyli.

Kotre cile hišće maće?

A. Wegerdt: Chcu z RB Lipskom rady do regionalneje ligi postupić a snano raz w němskej zwjazkowej lize hrać.

Što činiće, hdyž za bulom njehoniće?

A. Wegerdt: To zetkawam so z přećelkami a přećelemi abo ze swójbnymi. Šulske wěcy su tež wažne. A nakupować wězo tohorunja rady chodźu.

Kak so Wam w Lipsku pola RB lubi?

A. Wegerdt: Tu hraja jara dobru kopańcu a hrajerki móža so optimalnje dale wuwiwać. Jónkrótne su přećelstwa, kotrež tu nastawaja. Zamołwići a trenarjo su cyle jednorje perfektni.

30. jubilejny běh na Mnišonc

póndźela, 24. apryla 2017 spisane wot:

Při chětro wětřikojtym zymnym wjedrje je so minjenu srjedu hižo 30. jubilejny běh wo hórskeju kralow wot Hornjohórčanskeje sportoweje hale hač na wjeršk 449 metrow wysokeje hory Mnišonc přewjedł. Při tymle wubědźowanju ze zdźěla jara nahłymi stupanjemi mějachu mužojo kaž žony wšitkich starobnych skupin, tež ći najstarši, 230 metrow wysokostneho rozdźěla přewinyć. Cil běše za nich direktnje při woblubowanym hosćencu z wuhladnej wěžu, ke kotremuž je so 62 atletow a 15 atletkow zdračowało.

Mjez mužemi je sej 31lětny Hartmut Engert z Budyšina titul hórskeho krala w 14:36 min zawěsćił. Pola žonow bě 32lětna Franziska Kranich z Niskeje hórska kralowna w 17:17 min. Na 3,3 kilometrach wubědźowaštaj so tež zaso najstaršej wobdźělnikaj cyłeho zarjadowanja: 70lětna Hella Helmowa z Rakec (37:32 min) a 82lětny Jurij Nuk z Budyšina (33:10 min), kotrajž so tohorunja hač na wjeršk dodrapaštaj. Wobeju počesći Hornjohórčanske sportowe towarstwo w starobnymaj klasomaj.

Z dypkom móža spokojom być

póndźela, 24. apryla 2017 spisane wot:

SJ Chrósćicy

– LSV Nowe Město nad Sprjewju 0:0

Zestawa domjacych: Králíček – Teichmann, Cyž, Sentivan, Šafář, Žur (84. Gries), Schulze, Dórnik (70. Bětnar), Runt (65. Młynk), Henčl, Věchet

Při typiskim haperlejskim wjedrje wočakowaše prěnje koparske mustwo Sportoweje jednoty Chrósćicy njedźelu tabulkoweho susoda z Noweho Města nad Sprjewju. Nalětnje słónco, dešć, sylny wětr a krupy njeskićachu pak žane dobre wuměnjenja za šwarnu kopańcu. W cyłym prěnim połčasu hosćo lěpje nadběhowachu. Před wrotami pak wostachu přiwšěm njestrašni. Chróšćanam pobrachowachu cyle jednorje organizacija w defensiwnym dźěle, měr kaž tež ideje při natwarje a trěbna agresiwnosć a wola w dwubojach. Přeco zaso kombinowachu so Nowoměšćenjo z dwójnymi přihrawkami před šěsnatku. Na zbožo njezamóchu nadběhi konsekwentnje zakónčić. Krótko do połčasa pak dóstachu jědnatku, štož wuwabi prašace so mjezwoča a reklamaciju mjez domjacymi. Tež fanam běše hwizdanje njejasne. Kaž pak zawinowar Petr Šafář po hrě přizna, njebě rozsud tola tak wopačny. Domjacy wrotar Petr Králíček třělwu wotwobara.

Biskopičanske běhi na dołhe distancy přewjedli

póndźela, 24. apryla 2017 spisane wot:

Mjeztym hižo jubilejne 40. běhi na dlěše distancy wotměchu so při wětřikojtym a zymnym wjedrje sobotu do jutrow w Biskopicach. Po swojim wašnju je tele wubědźowanje sobu najstarše w Sakskej, kotrež měješe z nimale 700 wobdźělnikami 1989 swój dotalny rekord. Hosćićelske Biskopičanske sportowe towarstwo TV 1848 zliči pak tež lětsa cyłkownje 420 starterow, kotřiž doběžachu na hłownych distancach 4,5 km, 10 km, 21,1 km (połmarathon) a na 0,8 km kaž tež na 2,3 km za dźěći a šulerjow do cila.

Na třoch hłownych distancach je so tež sydom serbskich starterow wuspěšnje wubědźowało. Woni wuwojowachu sej w starobnej klasy jedne prěnje a jedne 3. městno, tři štwórte, jedne šeste a jedne 14. městno. Cyłkownaj dobyćerjej w połmarathonje běštaj Sebastian Guhr z Kamjenca (1:17:05 h) a Franziska Kranich z Niskeje (1:32:53 h). Kathrin Mehnertowa z Budyšina wubědźi sej w sk 40 chwalobne 3. městno w spěšnych 1:55:00 h.

Serbska debata

nowostki LND