Što nam skiwlenje po poražce 0:2 přećiwo Francozam přinjese? Ničo! To je kopańca, cyle jednorje kopańca! Přizamkuju so tuž facitej Tonija Kroosa. Hłowu horje a dale dźe! Portugalska bě w předkole špatnu ko­pańcu hrała a so hakle w połfinalu zasłužbnje přesadźiła. Němska je cyle porjadnu a spodobnu kopańca pokazała, je štwórćfinale zbožownje dobyła a měješe w połfinalu njezbožo. Zbožo pobrachowaše tež w nadběhu, jako třělwa Kimmicha do žerdźe dyri a Lloris jeho hłójčkowany bul na wrotowej liniji dźeržeše. Čehodla dyrbjeli přeco Němcy zbožo měć? Su dźě mnohe dalše dobre mustwa. Što je z Polakami? Jim bych tohorunja zaćah do połfinala popřał, wšako rjanu kopańcu hraja. W třělenju jědnatkow přećiwo Portugalskej woni tež zbožo na swojej stronje njemějachu. Nowy europski mišter budźe pak Portugalska pak Francoska. To je kopańca ... Jan Hrjehor

Marseille. Krótko do połčasa wčerawšeho połfinala europskich koparskich mišterstwow mjez Němskej a hosćićelom Francoskej bě Schweinsteiger w duelu w powětře bul na ruku dóstał. Hakle w třećim abo štwórtym wospjetowanju sym tež ja nje­trjebawšu akciju spóznał. Italski sudnik Rizzoli pak bě hnydom na jědnatku rozsudźił, štož bě prawy rozsud. Griezmann ju wěsće přetwori (45.+2). Do toho běše němska wubranka jasne lěpše mustwo, w nadběhu pak njezamó so přesadźić. Tež Müller nic, kiž njeje na nětčišich europskich mišterstwach ani jedne wrota třělił. Z Hummelsom, Khediru a Gomezom pobracho­waše trenarjej Löwej wažna trójka: Hummels na přikład w hrajnym natwarje a Gomez jako strašny nadběhowar. Francozojo wšak tajkeho maja. Griezmann měješe do hry hižo štwore wrota na swojim konće. Te polěpši wón wčera z dalšimaj přećiwo Němskej na šěsć. Do 2:0 (72.) bě Kimmichej bul w šěsnatce wotskočił. Pogba bě hnydom na městnje, wuhra Mustafija, kiž bě za zranjeneho Boatenga do hry přišoł, a třěli bul wysoko do šěsnatki. Tam jón Neuer prawje njewotwobara a Griezmann bě na městnje.

Na 45. jěchanskim a skakanskim turněrje w Kulowje startowaše 242 jěcharkow a jěcharjow z 15 wšelakich sportowych zjednoćenstwow na 350 konjach. Na parcoursu dožiwichu přihladowarjo něhdźe 600 startow. Za organizatorow a pomocnikow běše to mamutowy program, wosebje při wuhotowanju a wuličenju. Sobotu dyrbjachu program poł hodźiny přetorhnyć, dokelž so hrimaše a dešćowaše. Škoda pak žana nastała njebě.

Na sportowym polu přeswědčištaj wuspěšnaj domoródnaj jěcharjej Andre Schlegel a Ellen Altenkamp. Tež dalše jěcharki z Kulowa běchu na wubědźowanja derje přihotowane. Sofija Brězanec, Magdalena Wowčerjec, Laura Kaiser, Nadine Schneider a Elisabeth Bulankec wudobychu sej tak mjenowane zaměstnjenja, štož je tohorunja wuspěch. Elisabeth Bulankec­ wjeseleše so zdobom hišće na show­program, kotryž bě wona wot 1. meje z dalšimi dorostowymi jěchar­kami zwučowała a je jón nětko bjez zmylka jěchała.

Woprašachmy so Matijasa Kubicu, předsydu Kulowskeho jěchanskeho towarstwa, hač njeje wužadanje za wobdźělnikow přewulke tajki hoberski program zmištrować?

Sobotu, 2. julija, wotmě so mjeztym hižo 37. Oberlichtenauski lětni běh. Na ćežkim, ale jara woblubowanym wurisanju w rjanej zapadołužiskej hórskej krajinje je lětsa nimale 200 entuziastow běhanja swoje mocy a wutrajnosć měriło. Čin­jachu to po a na Heji (Keulenberg) na distan­comaj 5 km a 13 km. Ličba serbskich běharjow mjez nimi bě lětsa tróšku mjeńša.

Wosebje wuzběhnyć matej so wukonaj Romana Měrćinka a Richarda Paški na 13 km. Ze 108 starterow na tutej čarje wuwojowaštaj sej serbskaj atletaj, wu­bědźowacaj so w sk 20-29 lět, dobrej městnje: Roman Měrćink třeće a Richard Paška 4. městno. Cyłkownaj dobyće­rjej běštaj Sven Kunath a Franziska Kranich.

Běh na 5 km dobyłoj staj John Vieh­weger a Jasmin Eisold. Předšulske dźěći a šulerjo wubědźowachu so we wotpowědnych starobnych skupinach na 0,7 km. Běhi hódnoćachu so za rjadnu lis­ćinu, za Sakski cup a za Drježdźansku wobwodnu lisćinu. Jurij Nuk