13. žabjacy běh
Při horcym a tužnym wjedrje wotmě so minjeny pjatk w Běłej pola Kamjenca mjeztym 13. nócny žabjacy běh po tamnišej hatnej krajinje. Na distancomaj 2 km a 9,6 km wubědźowaše so 971 běharkow a běharjow, mjez nimi tež 15 serbskich. Na 2 km wobsadźichu ze serbskich starterow Florian Čórlich z Konjec 25. městno (sk pod 10), Jonas Glücklich z Kamjenca jědnate (sk pod 12) a Adrijana Matkec z Worklec 9. městno (sk pod 16).
Při chowanju słónca w 21.24 hodź. startowachu tradicionalny a hłowny běh z wutřělemi hońtwjerjow z jich třělbow. Na 9,6 km dźěše wo požadany pokal žabjaceho krala a žabjaceje kralowny. Wubědźiłoj staj sej jón Marc Schulze a Juliane Schmidt, wobaj z Drježdźan. Na tutej distancy, na kotrejž su sta swjatojanskich muškow ze swojim swětleškom atletam dračinu tróšku wolóžili, běštaj najspěšnišej Serbaj Roman Měrćink z Baćonja (sk 20), kiž wobsadźi 6. městno, a Manuela Jurkowa z Łupoje (sk 30) na 5. městnje.
Lubowarjo walkinga wubědźowachu so tohorunja na 9,6 km; woni pak startowachu hižo w 20 hodź. Mjez nimi wojowaše tež serbska atletka Corinna Měrćinkowa z Chelna, kotraž wuwojowa sej mjez žonami cyłkowne 3. městno.
Přećiwnik zasłužbnje dobył
HZ Radwor/Wulka Dubrawa
– HZ Kinspork/Łužnica 1:3 (1:0)
Za Radwor/Wulku Dubrawu zasadźeni: Konrad Noack – Johannes Jatzwauck, Julius Jendrewski, Christoph Jens Puppe, Markus Bolzmann, Leon Hübner, Lukas Spindler, Toni Rudolph, Paul Mehnert, Maximilian Flaton, Tom Kießetz, Pawoł Hančik, Dominic Noack, Tim Muder, Jakob Jatzwauck.
Wróćohru wo titul wokrjesneho mištra w starobnej klasy młodźina A chcyše dwěsćě ludźi widźeć. W Radworju nastupištej Hrajnej zjednoćenstwje Radwor/Wulka Dubrawa a Kinspork/Łužnica. Prěnja hra we Łužnicy bě so 3:3 skónčiła. Po tójšto šansach za wobaj cyłkaj poradźichu so Hančikej překwapjace wrota k nawjedowanju (41.).
Krótko po znowazahwizdanju k druhemu połčasej měješe njetrjebawši foul na kromje šěsnatki fatalne sćěhi. Wólny kop ze zdalenosće 18 metrow zadyri k 1:1 we wrotach (48.) hosćićelow. Woni běchu šokowani a popadnychu sej hišće dwoje dalše wrota (72., 74.).
Widźał, słyšał, napisał (28.06.16)
Awtor dźensa
André Strelow
Europeada 2016, koparske mišterstwa narodnych mjeńšin Europy, bě minjeny tydźeń w italskim Južnym Tirolu. Tež ja běch pódla, a mi zwostanje tójšto rjanych dožiwjenjow w pomjatku. Serbske koparki a serbscy koparjo smědźa woprawdźe spokojom być. Žony, dokelž docpěchu pjate městno, hladajo na ćežke předkoło, w kotrymž dyrbjachu přećiwo finalistkomaj nastupić. W swojej poslednjej hrě chowanče trenarja Pětra Bejmaka a mustwoweho nawody Handrija Rachele pokazachu, zo móža so z druhimi mustwami měrić. Rjenje tež bě, zo wudobychu sej fairplay-pokal. Tón su sej woprawdźe zasłužili.
Wuslědki (28.06.16)
Wokrjesna koparska liga, stafla I
Radwor – ST Budyšin 8:3 (3:3)
1. ST Budyšin 28 100 : 40 68
2. Malešecy 28 75 : 34 58
3. Załom 28 82 : 31 56
4. HZ Budestecy 27 78 : 42 53
5. Kubšicy 28 67 : 32 52
6. Radwor 28 78 : 37 49
Chorwaća so zamołwili
Sand in Taufers. Narodna mjeńšina Chorwatow ze Serbiskeje je so pola organizaciskeho komiteja koparskeje europeady w Južnym Tirolu za cofnjenje połfinala oficialnje zamołwiła. To zdźěli předsyda organizaciskeho komiteja Siegfried Stocker. Lokalny zarjadowar je zamołwjenje přiwzał. W połfinalnej hrě přećiwo Okcitanam běchu so Chorwaća njesportowsce zadźerželi a hrać přestali. W kónčnym hódnoćenju sadźichu jich tuž na 23. městno. Nimo toho njebudu jim kawciju za zapisanje wróćo płaćić.
Jan Hrjehor
Hru wo 12. městno dobyli
Serbska koparska wubranka muži
– Wubranka Sewjernych Frizow 9:0 (6:0)
Za SKWm zasadźeni: Chrystof Gloxyn – Karl Petrick, Fabian Bejma, Pětr Domaška, Simon Žur, Bosćij Bjeńš, Dawid Jurš, Denny Gloxyn, Jonas Krawčik, Antonius Wałda, Dirk Šołta, Bosćij Cyž, Tadej Cyž, Bosćij Bejma, Robert Lejnart, Křesćan Bejmak, Feliks Hrjehor, Denny Kral, Bosćij Kinderman, Fabian Korjeńk, Patrik Woko
Zaměstnjenje Europeada 2016
Žony:
1. Němki z Južneho Tirola
2. Okcitančanki
3. Němki z Ruskeje
4. Ladinjanki
5. Łužiske Serbowki
6. Retoromanki
Mužojo:
1. Němcy z Južneho Tirola
2. Okcitanojo
3. Korutanscy Słowjency
4. Madźarojo ze Słowakskeje
5. Němcy z Ruskeje
6. Ladinojo
7. Romojo z Madźarskeje
8. Słowacy z Madźarskeje
9. Retoromanojo
10. Danojo z Němskeje
11. Južni Serbja z Chorwatskeje
12. Łužiscy Serbja
13. Sewjerni Frizojo
14. Manksojo
15. Romojo z Madźarskeje
16. Němcy z Madźarskeje
17. Krimscy Tatarojo
18. Němcy z Pólskeje
19. Cymbrojo z Italskeje
20. Aromunojo
21. Němcy z Danskeje
22. Wubranka mjeńšin z Estiskeje
23. Chorwaća ze Serbiskeje
Kilian Hrjehor
Snadne dobyće
Porchow – Radwor 0:1 (0:1)
Zestawa hosći: Wróbl – Henke, Buša, Šěrak, Nuk, Šram, Zähr, Omran, Winar, Wjeńka, Schulze (77. Mark)
W předposlednjej hrě sezony dyrbjachu Radworscy koparjo pola třećeho najwuspěšnišeho mustwa druheje połserije nastupić. Trjebachu tuž někotre mjeńšiny, zo bychu swoju liniju w hrě namakali. Přiwšěm woni dominowachu a nadźěłachu sej wjele šansow. Prěnjej składnosći Winarja njeběštej hišće wuspěšnej, we 38. min. pak ta Omrana. Winar bě so na prawym křidle jara derje přesadźił, tak zo dyrbješe Omran přihrawku jenož hišće k 1:0 přez liniju stłóčić. Krótko do přestawki mějachu domjacy prěnju dobru móžnosć. Po dołhim wólnym kopje „lěpješe“ Wróbl na wrotowej liniji, ze zdalenosće třoch metrow pak zhłójčkowa Porchowski nadběhowar na zbožo jenož na wonkowny sak.
W druhim połčasu so hižo wjele naspomnjenjahódneho njesta. Po dołhim času njetrjebaše Radwor tónkróć žane přećiwniske wrota přijimać. Fabian Wróbl
