Přez lěta hižo zetkawaja so młodźi sportowcy w juniju na Budyskej Młynkec łuce, zo bychu so na wokrjesnej spartakiadźe wo medalje w lochkoatletiskich disciplinach wubědźowali. Stajnje su tež serbske dźěći a młodostni pódla, najwjace z nich za hosćićelske Wuchodosakske lochkoatletiske towarstwo Budyšin, kotrež wubědźowanje z wulkej prócu organizuje.
W starobnej klasy W 14 wusahowaše Tereza Pöpelec (SJ Chrósćicy). W sprinće na 100 m bě wona z 13,35 sek. najspěšniša, tež w kulostorku (9,10 m) ju nichtó njedosćahny. K tomu skoči w dalokoskoku ze 4,59 m na slěborne městno. Wusahowace wukony pokaza tež za Jednotu Kamjenc startowacy Marko Ryćer (MU18) na 200metrowskej čarje (23,56 sek.) a w dalokoskoku (5,49 m), štož wunjese jemu złoto a slěbro.