SV Großdrebnitz
– SJ Njebjelčicy 0:4 (0:0)
Zestawa hosći: Hahn – Kral (85. F. Ričel), Hoier, Haška, Šołta, Hanuza, Cyž, Dubaw, Lejnart, Čornak (68. Hrjehor), Hoelzel (75. C. Ričel)
Na dotal njeznatym kopanišću započa Njebjelčanske mustwo hru měrnje a wěsće. Domjacy so wobarachu, do šěsnatki Njebjelčanow pak so lědma předrěchu. Tak bě tež wrotar Nico Hahn w prěnim połčasu nimale bjezdźěłny. Dwě wulkej šansy nadźěłachu sej chowancy trenarskeje dwójki Panic/Krawčik w prěnich 45 minutach. Hnydom na spočatku partije přesadźi so Robert Lejnart na lěwym křidle a połoži bul wróćo před wrota. Tam smokny jón Tadej Cyž hnydom na klětku, ale wrotar storči kulowatu kožu z wulkej prócu runje tak přez łatu. Po hratej poł hodźinje pósła Lejnart na prawej stronje młodeho Leopolda Hoelzela, třělwa z połneho běha pak dźěše snadnje wyše łaty.