ST Hodźij – ST Radwor 1:3 (1:1)
Zestawa hosći: Wróbl – F. Šěrak, Buša, Bauer, S. Henke, Šram, Karwinski, Nuk, Winar (81. Mark), T. Henke (87. Zähr), Schulze (89. C. Šěrak)
W Hodźiju chcychu Radworscy koparjo dobyć a so tak do jutrow z třomi jejkami-dypkami wobdarić. Z bojownosću a dołhimi třělwami spytachu domjacy wrota docpěć. Pola Radworčanow běše widźeć, zo chcychu na njerunym trawniku swoju hrajersku lěpšinu wužić. Najlěpši přikład bě w 10. min.: Wróbl posłuži Winarja, kiž na křidle doprědka smaleše a tam bul Schulzej přihra. Schulz połoži jón wróćo Winarjej, a tón z mócnym kopom Adlera w Hodźijskich wrotach pruwowaše. Pjeć mjeńšin pozdźišo trjechi Schulze za Radwor 1:0. Šram bě Schulzu z rjanej přihrawku do běha posłužił. Před domjacym wrotarjom wosta Schulze měrny a suny kulowatu kožu do dołheho kuta. Jědnatku we 28. min. pak najlěpši třělc domjacych Riedel wuruna. Radwor njemóžeše ćišć přez cyły prěni połčas dźeržeć, štož domjacym přeco strašne nadběhi zmóžni. Jedyn tajki wotwobara Wróbl w 35. min. z mócnym refleksom na liniji.