Koparki Serbskeho gymnazija dźesaty raz w sakskim finalu
Hižo 10. raz je so jedne holče koparske mustwo Serbskeho gymnazija Budyšin (SGB) za krajne kónčne koło kwalifikowało. Před lětomaj běchu sej aktualne dobyćerki (hlej foto) sensacionelnje slěbornu medalju w starobnej klasy IV wubědźili, štož bě dotal najwjetši wuspěch šulerkow serbskeho kubłanišća na tej runinje. Nětko kiwa znowa sakske finale, kotrež budźe 16. junija w Freitalu. Minjeny tydźeń poby šěsć holčich koparskich cyłkow z wuchodneje Sakskeje w Großröhrsdorfje, zo bychu tam we wobłuku šulskeho sportoweho wubědźowanja „Młodźina trenuje za olympiju“ regionalneho mištra w starobnej klasy III (7. a 8. lětnik) zwěsćili. Tak hraješe kóždy přećiwo kóždemu 12 mjeńšin, a to paralelnje na dwěmaj hrajnišćomaj.