W treningowym lěhwje byli

štwórtk, 21. januara 2016
artikl hódnoćić
(0 )

Po tym zo běchu so koparjo Njebjelčanskeje SJ na druhu połseriju wokrjes­neje ligi z prěnim treningom pod hołym njebjom­ hižo přihotowali, podachu so woni do kónctydźenskeho treningo­weho lěhwa w lěsnym parku Grünheide pola Auerbacha we Vogtlandźe. 16 hra­jerjow a třo přewodnicy nastajichu so na puć. Jich prěnje wubědźowanje bě bowling.

Za pjatk rano běše běh po lěsnym arealu postajeny a snědani přizamkny so dwójna treningowa jednotka na kumštnym trawniku. Popołdnju trenowachu we wulkej sportowej hali pod nawodom­ Njebjelčanskeje trenarskeje dwójki Detlef Panic/Handrij Krawčik a po krótkim wočerstwjenju dale pod hołym njebjom.

Dokelž bě so sněžiło, ale nic dosć wokoło treningoweho areala, rozsudźištaj trenarjej, sobotu sej dojěć do zymskosportoweho centruma Klingenthal/Mühlleiten. Z wupožčenymi sněhakami podachu so Njebjelčanscy koparjo do dźesaćkilometrowskeje lojpy hač k ho­rje Aschberg. To bě dobra wotměna k ćělnemu napinanju a zdobom skrućenje cyle hinašich skupin myškow.

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND