Bordeaux. Sensacija Madźarska, drohotny Alaba, prěnja žołto-čerwjena karta, překwapjenje nowačk-Islandska. Z tutymi krótkimi hesłami hodźał so pjaty hrajny dźeń europskich koparskich mišterstwow wopisać. A tež tole hišće za wčerawši dźeń přitrjechi: „Tuni koparjo su druhdy wjace hódni.“ David Alaba (Awstriska), profijowy kopar FC Bayern Mnichow, je z 45 milionami eurow dwójce telko hódny kaž cyłe madźarske mustwo. Tunja madźarska jědnatka je wčera w skupinje F jasneho faworita Awstrisku z 0:2 (0:0) porazyła, štož běše prěnja wulka sensacija EM. Awstričenjo drje super do hry startowachu, zbožo k wrotam pak jim pobrachowaše. Po 32 sekundach měješe Alaba wulku šansu, trjechi pak jenož žerdź. W druhim połčasu bě Madźarska jasnje lěpše mustwo. W 62. mjenšinje docpěchu woni samo 1:0 přez Adama Szalija. Krótko po tym so naši susodźa hišće wosłabichu, jako dósta Aleksandar Dragović prěnju amplowu kartu turněra (66.). Wo kónčne 2:0 bě so zaměnjeny Zoltan Stieber z krasnymi wrotami postarał.