Sand in Taufers (SN/JaW). Němcy z Južneho Tirola su 3. koparske mišterstwa awtochtonych narodnych mjeńšin Europy dobyli. Z 2:1 rozsudźichu woni sobotne finale w Sandźe in Taufers přećiwo Okcitanam za sebje a zawěsćichu sej třeći króć pokal. Pola žonow dobychu tohorunja Němki z Južneho Tirola. Wone přewinychu w finalu Okcitančanki z 3:2. Bronzowu medalju wubědźichu sej Němki z Ruskeje. Pola muži zaručichu sej třeće městno Korutanscy Słowjency. K hrě wo 3. městno pak nastupić njetrjebachu, dokelž buchu Chorwaća ze Serbiskeje z turněra wuzamknjeni. Tući běchu so w połfinalu njesportowsce zadźerželi a hrać přestali, samo policija dyrbješe zapřimnyć. Kaž organizaciski komitej europeady zdźěli, su so woni mjeztym zamołwili. Serbska koparska wubranka muži docpě 12. městno. Serbske koparki wjeselachu so nad 5. městnom, nimo toho dóstachu pokal za najfairniše žónske mustwo.