Hižo dźesaty raz wotmě so kónc tydźenja při Lejnjanskim jězoru pola Wojerec wubědźowanje z mopedami NDRskeje marki Simson. Wurisanje mjenuje so hižo wot załoženja tohole hoberskeho eventa „Steil ist Geil“. W mjenje zarjadowanja tči tež nimale kompletna myslička lóštneho motorsportoweho zarjadowanja. Pěskowa hora, na kotruž so jednotliwi wodźerjo Simsonowych mopedow podadźa, je při nahłej skłoninje přibrjoha. Přidatnje maja tam přeco hišće mjeńše a wjetše zadźěwki. Tak ma na přikład kóždy wodźer wulku łužu přewinyć, zo by minimalnu dołhosć swojeje jězby we wubědźowanju docpěł. Na kóncu čara hišće raz chětro nahle stupa. Tam so jenož ći najlěpši horje zdračuja. Myto za dobyćerja bě lětsa znowa Simson Star z připowěšakom.