Wot meje serbscy beachvolleyballisća hłownje w Róžeńće zaso w pěsku wo dypki wojuja. Wot toho časa su dotal 21 z 42 hrow přewjedli. Hłowny organizator Jurij Bjeńš podawa tule po połojcy sezony krótki facit.

Lětsa dyrbi kóžde mustwo wot spočatka z třoch hrajerjow wobstać. Loni je mjenujcy přewjele partijow chorosće abo dalšich terminow dla wupadnyło. Třeći, narunanski akter hišće njebě, a rezultat wšeho bě, zo njemóžachu někotre mustwa sezonu dokónčić. Ideja z třećim akterom je na kóždy pad wunošna, te abo tamne mustwo tež raz z hinašej dwójku nastupi.

Přiwšěm su dale wulke problemy, so hižo wot wšeho spočatka na hrajne terminy dojednać. Byrnjež sej wšitcy hotowy hrajny plan za cyłu sezonu přeli, tak zo bychu dwójki wědźeli, w kotrym tydźenju su na rjedźe, so bohužel tak prawje na njón njedźerža. Přez Facebook a Whatsapp sej mustwa nětko mjez sobu pisaja, hdy so komu hodźi. Loni hrajachu husto srjedź tydźenja – lětsa skerje kónc tydźenja.