SJ Njebjelčicy

– ST Hnašecy-Dobruša 2:7 (2:3)

Zestawa domjacych: D. Ričel (46. Hahn) – Kral (46. Šołta), Deleńk, Hrjehor, Hoelzel (77. Šram), Janca, Hommel, Lejnart, Cyž, F. Ričel (77. Mjechela), Čornak

Za swoju třeću testowu hru su sej Njebjelčanscy koparjo sylneho přećiwnika z Hnašec-Dobruše přeprosyli, zastupjerja wokrjesneje wyšeje ligi. Zo budźe to ćežki bój, bě wšitkim zwoprědka wěste. Nimo toho pobrachowachu Njebjelčanam štyrjo stajni hrajerjo w defensiwje. Prěnje wrota pak docpě Robert Lejnart, a to hižo w 1. min. Šibale sadźi wón bul hnydom po zakopje direktnje přez wrotarja wysoko do saka k 1:0. Hosćo, chowancy bywšeho Chróšćanskeho trenarja Dirka Rettiga, pak dołho njetrjebachu a w 9. min. wurunachu. Dalše wrota docpěchu woni w 26. min. přez direktny wólny kop a 1:3 dwě mjeńšinje po tym. Po hratej poł hodźinje skrótši Tomy Hommel rjenje na 2:3, štož bě zdobom staw prěnjeje połojcy hry.