ST Marijina hwězda
– Póst Germania Budyšin 0:2 (0:0)
Zestawa domjacych: O. Schmidt – Wróbl (46. Smoła), Škoda (46. Lipič), Łušćanski, R. Hawš (46. Bejmak), Peschmann (46. Hübner), T. Jurš, O. Hawš, P. Schmidt, Pakoßnick (46. Czapik), D. Jurš
Do starta noweje serije we wokrjesnej lize testowachu koparjo ST Marijineje hwězdy doma přećiwo wokrjesnemu wyšemu ligistej Póst Germania Budyšin. W prěnim połčasu bě hosćićel runohódny přećiwnik, tak zo klasowy rozdźěl widźeć njebě. Prěnje wrota hosći so nimohry dla njepřipóznachu (10.), a wulkošansa Dawida Jurša njebě tohorunja wuspěšna (21.). Přećiwniski wrotar Günther bě wuběrnje reagował a kop wotwobarał. Wobaj cyłkaj pospytaštej so nětko z wólnymi kopami. Wšitkim pak pobrachowaše trěbna preciznosć. 0:0 k połčasej bě sprawne.
