ST 1922 Radwor – ST Ćisk II 3:1 (2:0)
Zestawa domjacych: Ch. Šěrak – Henka, F. Šěrak, Hančik, Bejmak, Wjeńka (88. Sćapan), Schulze, Nuk, Buša (60. Omran), Šram, von Karwin
W druhej domjacej hrě rěkaše za chowancow koparskeho trenarja Pětra Bejmaka jenož tole: dypkować. Tele předewzaće so domjacym runje w prěnim połčasu dosć derje poradźi. Z direktnymi přihrawkami, spěšnymi nadběhami a rjanymi kombinacijemi poskićichu woni přihladowarjam wobhladanjahódnu kopańcu. We 8. min. móžachu hižo prěni raz juskać, jako běše noha kapitana Nica Buše najdlěša. Ze sylnej přihrawku z praweje kromy šěsnatki bě jeho Hančik posłužił. Dalše móžnosće přez Bejmaka, Schulzu, Šrama a Bušu pak k dalšim wrotam njewjedźechu. Hakle we 18. min. so Schulze přesadźi a z nimale identiskeje pozicije kaž při nawjedowanju zwyši Hančik na 2:0. Ale tež hósć z Ćiska sej hru jenož njewobhladowaše. Wosebje standardne situacije přinošowachu k strašnosći před klětku domjacych. Krótko do połčasa so před wrotami Šěraka mócnje paleše. Z tróšku zbožom móžeše Radworski škit situaciju po róžku hosći sporjedźeć.
