Prěni raz su młode swójby z Worklec sobotu při tamnišej sportowni, kotruž tuchwilu přetwarjeja, Worklečanske wubědźowanje z mjenom Workwub přewjedli. Wot popołdnja w dwěmaj móžachu tam dźěći z Worklec a wokoliny swoje sportowe znamješko złožić. Za nje dyrbjachu w disciplinach dalokoskok, mjetanje bulika, sprint a 800 m běhanje wšelake časy a dalokosće docpěć. Stajnje najlěpši w starobnych skupinach dóstachu myto.
Dwě hodźinje pozdźišo, potajkim w štyrjoch, nastupi sydom cyłkow ze wsy k staflowemu běhej. Běchu to Łučny puć, Nulik, Hłowna dróha, Hłowna dróha II, Kucharjo, Pilne pčołki a Wódni mužojo. Stafla wobsteješe stajnje z muža, žony, dźěsća a jokera. Jedne koło po dworje šule wjedźeše přez hrajkanišćo a wuchowanske schody při šuli zaso wróćo k sportnišću a běše něhdźe 700 metrow dołhe. Dobyło je mustwo Wódnych muži, za kotrež startowaše Richterec swójba. Mać Jadwigu wšak wšitcy jako dobru sportowču znaja. Wona hraje we Worklečanskej Viktoriji blidotenis a je wrotarka Serbskeje koparskeje wubranki.